Yeesaya 10

Bin gbítí ti-Dindaan ŋuulee

(Kpèè 5.8-24)

1 Mbusu dɔ̄ ki cí binib bin yōontí marab

bin kaa bí deedeeyee,

binib bin ŋmà marab

bin kɔ̄ntí bi-jutiibi falaayee ki yōontée.

2 Baa tìì biwɔfib dinyɔɔbundi ibɔsoon laŋki

ki ŋmìntī m-nibul nandambi tin sá bi-yatee.

Bi fìkì bikpiipoobi,

ki fúkuĺ ataŋkpiibil wanti.

3 Mimmee ditafadaaldi wiiŋŋu dal,

ni yaa láa ká kubuŋkpaaŋŋu páaǹnée,

ni làá dāá nín ŋá mana dee?

Ŋma ní ni làá dāá sāǹ kí kɔ́

kí ká dijòońdi dee?

La ní ni làá dāá yóoń ni-gaajati dee?

4 Kun ni dāa pée ŋūǹ kí ŋée di sá

ní nīn bōō bisarkadambi kansikin,

àá ní lítí kí nīn dɔ̄ anikpil kansikin.

Ama nì míǹ kɔkɔee, ti-Dindaan ŋuul kaa sɔ̄ŋkì,

u-ŋuul dáá gbíntìi dàn̄ bi-pu.

Asuur yab kpitii jítì mara pu

5 Ti-Dindaan lī yii:

«Mbusu dɔ̄ ki cí Asuur tiŋki^a

kin sá m-ŋuul bambaaŋŋuee.

Ndɔ ŋun kā u-ŋaan nee ní m làá dūú dàkà m-bum.

6 M dū-kì ki tú kí cùú já nì

ditimbundi din kaa dū Unimbɔti ki yíiń tibee.

M tīī-kì ditundi kí cùú já nì dinibul

din gbítí m-ŋuulee,

kí fūkul̀-kì kí kóoǹ ki-gaajawanti,

kí tāā-kì kii didandi pu kpatee.

7 Ama Asuur tiŋki kíǹ kaa dàkafī míǹ,

ki-landɔkɔŋu nyáń ŋu-ba.

Di sá yii kíǹ pée dàkafī dinàandi pu ní,

kí kúntí atimbun tikpil tikpil.

8 Kì lì yii:

<M-janjakpilib kɔkɔ kaa sá bibɔtiibi níii?

9 Maa ŋá Kalnoo tiŋki

kii m nín ŋá Kaarkeemiisi tiŋki pueeee?

Maa ŋá Amati tiŋki

kii m nín ŋá Aripaadi tiŋki pueeee?

Maa ŋá Samaarii tiŋki

kii m nín ŋá Damaasi tiŋki pueeee?

10 M ŋúń ki jáń ki fōō awaa beeŋi,

laakin awaa nìn bí ki wīikí ki jítiǹ

Jeerusaleem nì Samaarii timmu yaŋee.

11 M nín ŋá Samaarii nì ki-waaŋi pu nee,

maa làá ŋmā kí ŋá Jeerusaleem nì ki-waaŋi mimmaaa?>»

12 Ti-Dindaan yaa láa dóò ditundi din u cáá kí tɔ̄ Jeerusaleem tiŋki nì Siiyɔn jool puee, u làá dāá dáaĺ Asuur bɔtiu tafal u nín cáá dilambil ki dàkà u-bee pu. 13 Di sá yii ubɔti gbanti lī yii:

«An sá m-ŋal pɔŋŋu nì m-ciiŋyi pu

ní m ŋá tin bí nee kɔkɔ,

kun puee man cáá dinyil ní.

M kpītì ŋkpaanyɔmu mun

nìn bí anibul kansikinee,

ki fúkúl̀ bi-wanti tin bi kpáafèe.

M kpákatì bi-bɔtiibi bi-beeŋi pu

kii ubaatandaanee ní.

14 Kii unil nín dàatī u-ŋal

kí páatí kunɔndii puee,

míǹ ní m kóoǹ anibul gaajati.

Kii bi nín wúkutí ajin ŋin unoon yíkìi fée puee,

míǹ ní m kóoǹ tiwan kɔkɔ kitiŋ pu,

ní báà unil kaa cīŋkì u-baaa,

kaa wāaǹ kinyɔkɔ ní kaa nín múlifì.»

15 Kicɔkɔ mun ŋūǹ kí dàkà ki-ba

un di ŋúb́-kì ki cáa gàatēe ceeee?

Kijiseekikaai ŋūǹ kí gúntí ki-ba

un cáá-kì ki tūǹ ditundee puɔɔɔ?

Mbambaan kaa ŋūǹ kí fíiǹ un ŋúb́-ŋuee ŋal,

míǹ ní ndɔ kaa tí ŋūǹ kí dúkutí un ŋúb́-ŋuee ŋal.

16 An pu ní ti-Dindaan

Unimbɔti Mpɔŋkɔdaan

làá yàntī u-nib bin gbìfèe ń dúntí.

Ŋŋmi làá pōō u-nyooti taapu.

17 Ti-Dindaan un sá Isirayeel tiŋki walifiŋuee

làá kpántí kii ŋŋmee ní,

circir Nimbɔtiu ŋmilimbiliŋ

kí fōō ikuŋkum nì abɔjanaakun,

kí wà kɔkɔ múb ŋwimbaanti.

18 U làá wà kí bīil̀ u-bambannyaaŋku

nì u-subiŋmɔkaaŋi kpaabu kɔkɔ.

U làá dāá nīn náań nì unil un

iween ŋmɔ́ ki bíil̀ee ní.

19 Án làá dāá pée kíń isufi fiii yéè ní Asuur bambaŋkun

áli gba campɔnti dāa ŋūǹ kí kàaǹ-i.

Isirayeel yab biba làá dāá kíń

20 Ŋyunti gbantee, Isirayeel yab bin làá dāá nīn bí dimaŋfalinee, Jaakɔb nibul bin làá dāá kíńee kaa dāa gíti cɔ́tí un di bí ki gbáà-bee pu. Bi làá dāá nīn kíǹ ki cɔ́tí ti-Dindaan pu, Isirayeel circir Nimbɔtiu pu ní. 21 Bin làá dāá kíńee làá dāá gítiń Unimbɔti Mpɔŋkɔdaan cee, Jaakɔb naantiibi bin làá dāá kíńee làá fàtīí gítiń. 22 Isirayeel, báà a-naantiibi yaa wīikí kii dibul din dɔ̄ tiŋku gbandee, bi-kansikin biba di làá fàtīí gítiń ti-Dindaan cee. Ti-Dindaan nín lēē ki síiǹ yii u làá nàan̄-kèe, see ú ŋá míǹ, ní deedee ń dāá gbí kitiŋ pu kii mbunee. 23 Tiŋman, ti-Dindaan Unimbɔti Mpɔŋkɔdaan nín sòon̄ ki yóoǹ pu yii u làá nàan̄ kitiŋ kɔkɔee, see u nāaǹ-kì^b.

Ní taa fàŋkìmaan Asuur yab

24 An pu ní ti-Dindaan Unimbɔti Mpɔŋkɔdaan lī yii: «M-nibul yab bin kóò Siiyɔn jool puee, ní taa fàŋkì Asuur yab bin ŋúb́ mbambaan ki gbáà-ni, ki ŋúb́ ni-boon ndɔ kii Eejipiti yab nín nìn ŋáań-ni pu dooooyee. 25 Ama an kíǹ ŋyunti fiii nàanyɔkɔ diŋuul din m gíí ni-puee ń sɔ̀ŋkì ní ḿ fōō Asuur yab pu mbum kí nàan̄-bi.» 26 Ti-Dindaan Mpɔŋkɔdaan làá dúkutí u-bambaaŋŋu kí fáá Asuur yab kii u nín nìn fáá Madiyan yab pu Ooreeb jool puee, ní kí tàntī u-kpandɔŋu dimɔɔl pu kii u nín nìn ŋá pu Eejipitee^c.

27 Ŋwiin gbantee, u làá dāá páatí

diwaŋgul din pá ni-gbigbipati puee,

ní kí túutí-ni ditúndi din u túǹ-ni

ni-silii gīīyee.

Diwaŋgul làá dāá wāŋkì

ní án bútí-ni.

Binannanliibi tóobiń Jeerusaleem tiŋki

Unannanli nín jɔ́ḿ Samaarii tiŋkin,

28 bi bāań Ayaati tiŋkin.

Bi cōom̀ ki jítì Miigirɔn tiŋki pu,

ní ki cáá bi-wanti ki yóoǹ Miikimaasi tiŋkin.

29 Bi cōom̀ ki jítì ntaŋkpafaŋfakamin ki bí yii:

«Tí gbíntí kí dòom̄maan Geeba tiŋkin.»

Niinee dinyoondi kɔ́ Raama tiŋkin yab,

ní binib bin kóò Giibeeya,

Sayuul tiŋkinee sáǹ ki kátì.

30 Galiim tiŋkin yab, nín̄ tátímaan!

Layiisa tiŋkin yab, ní pīlifì.

Anatooti yab gbí isaa^d!

31 Madimeena tiŋki yab bíi sáń kí ŋmátí,

ní bin kóò Geebiim tiŋkinee bíi nyàab̀ kibalilaŋ.

32 Ŋwiin gbantee binannanliibi

làá dāá yūĺ Noob tiŋkin,

ní ki dāa sòoǹ ki dàkà Siiyɔn jool,

Jeerusaleem gbantaŋki ŋŋal.

33 Kpèè, ti-Dindaan Unimbɔti Mpɔŋkɔdaan

di kɔ́fí asupan nì mpɔnee.

U gāatì isukpaan ki lúkufì,

isufi in fɔ̀kɔ̀ee dɔ̄ kitiŋ.

34 Ti-Dindaan làá dāá dū kicɔkɔ

kí gàatì kubambaŋŋun sugboomu,

ní Leebanɔn seedir sufii in ŋān̄ee

lítì ki dɔ̄ kitiŋ.