Yeesaya 11

Ubɔti ubɔ làá nyā Daafiidi maaliŋun

1 Disubambil diba làá dāá kpìtī Jeesee^a sunyeel pu,

disupɔmbil diba làá cɔ́tí u-nyaaŋyi pu.

2 Ti-Dindaan Fam làá dāá nīn bí u-pu.

Mì làá dāá tīī-u iciin nì mpɔn

ú gàntī tin ŋān̄ee nì tin kaa ŋān̄ee.

Mì làá dāá tīī-u isaŋki nì dibaatandi.

Mì làá dāá yàntī ú béé ti-Dindaan

kí nīn fàŋkí-u.

3 Kun dāa mɔ̄ǹ-uee di sá ú nīn fàŋkí ti-Dindaan.

Waa làá kpèè unil nimbiin

ní kí sòoǹ u-bɔti,

kaa làá tí pīlifì tin binib sòoǹee

ní kí sòoǹ kí ŋāŋkì tibɔti.

4 U làá dāá sòoǹ binandambi bɔti nì deedee,

ní kí dāá sòoǹ kitiŋ nee pu wɔfib bɔti nì ibaamɔn.

U-nyɔɔbundi dāa gbáà kitiŋ

nee pu nib kii mbambaanee ní,

ní tibɔti tin dāa nyēē u-nyɔkɔnee

dāa kù bin sá bitɔŋfitiibee^b.

5 Deedee di làá dāá nīn sá-u dambala,

ní ibaamɔn dāa sá-u gbaja u gbìn̄ u-caŋ^c.

6 Sinsiŋku nì dipibil di dāa kóò dicilpu,

ní ugbii ń dāá dòon̄ kí kɔ́ĺ kiŋɔbiki.

Dinabil nì digbikintipɔmbil dāa kpáfí dibɔɔbaantiil ki jīǹ,

ní kinaacimpɔmbiki dāa kpàá bi-kɔkɔ.

7 Unasal nì digbiŋgbil dāa pēē kunaakpaapɔɔu,

ní bi-biyaamu dāa pēē ŋkɔŋkoon.

Gbikinti dāa ŋmóò timool kii unaayee ní.

8 Kibipɔŋ dāa kā ukoobu faliŋu pu ki gbíiĺ,

ní campɔnti ń dāá dū u-ŋal

kí bɔ̄ ukoowaati faliŋun.

9 Baa dāa gíti ŋáań tikpitil,

kaa dāa gíti bíiĺ tiba

ti-Dindaan circir jool kɔkɔ pu,

kun puee bi làá dāá béé

ti-Dindaan kitiŋee kɔkɔ pu

kii nnyim nín gbéè tiŋku puee^d.

10 Ŋwiin gbantee, Jeesee naantiiu

di dāa sá kudaaŋŋu ki tīī

duulinya nibuliŋ kɔkɔ.

Atimbun kɔkɔ làá dāá nyàab̀-u^e,

ní laakin u dāa bée, tinyool làá dāá nīn jìliŋkī.

Bin bínní kuyuŋuee gítintam

11 Ŋwiin gbantee, ti-Dindaan

làá dāá tàntī u-ŋal nliliitiim

kí fīī u-nib bin kíǹee kí líí.

An dàkà yii bin ŋmátì ki bíń

Asuur tiŋki nì Eejipiti tiŋki

nì Paatroosi tiŋki nì Kuusi tiŋki

nì Eelaam tiŋki nì Sineeyaar tiŋki

nì Amaati tiŋki nì ntimu mun

ní tiŋku māntìi túee kɔkɔ.

12 U làá dāá tīī atimbun kɔkɔ kudaaŋŋu,

kí kpāafì-ŋi yii u làá fàtīí kóoǹní

Isirayeel yab bin bi cūnnì kuyuŋuee,

kí kpāfì Juuda naakookun yab

bin kpátìi gbí duulinya jaaŋŋi kɔkɔnee.

13 Niinee ipoompoon in Eefiraayiim yab

cáá Juuda yab puee làá gbèen̄,

ní bí dāá kpɔ̀ kí céetí Juuda nannanliibi.

Eefiraayiim kaa ti làá ŋá Juuda pu ipoompoon,

ní Juuda kaa ti làá nīn sá

Eefiraayiim nannanliu.

14 Bi làá lúuń Fiiliistii yab ŋwìiń jeetilaŋki pú,

kí kpāfì kí fūkul̀ bin kóò ŋwìiń nyalaŋki púee.

Bi làá dāá já kí pɔ̄ɔkiǹ Eedoom nì Moowaab yab,

ní Amɔn yab ń dāá nīn bí bi-taapu^f.

15 Ti-Dindaan làá yàntī Eejipiti mɔɔl ń kpā,

kí dàkà Eefiraati mɔɔl ŋŋal kí kpàtī di-pu.

U làá púfí di-pu

kí cúú-dì kí yàkatī abuntaa aluli,

ní unil dāa ŋūǹ kí táká anaataka kí dùtī^g.

16 Didandi dāa bí u-nibul din kíǹ

ki bí dimaŋfalin Asuur tiŋkinee ń dī.

Án dāa bí kii bi-naanjab

nín nìn nyáń Eejipiti tiŋkin puee ní.