Yeesaya 13

Babiloon tiŋki kúntitam

1 Tibɔti tin ti-Dindaan sòon̄ Babiloon tiŋki^a pu ní Amɔtisi jipɔɔn Yeesaya ká dileedakal poonee sèé.

2 Ti-Dindaan bí yii:

«Ní cóoḿmaan kudaaŋŋu ŋaabiki

dijool din kūń isufi nì timool kpée yilpu.

Ní kúum̀maan mpɔn kí yíiń bijanjaliibi.

Ní kábitiń-bi bí dī akpambal

punyɔmmu pu kí kɔ́.

3 M tīī binib bin dū bi-ba ki sú-mee mara.

M yíiń m-janjaliibi bin sá bimɔntiibee,

bin di fàal̀ m-jajil puee,

bí dāan̄ kí lēē m-ŋuul kí dàkà.»

4 Ní pīlifì kuwoou nín gàń ajoon pu puee,

a lì kii dinikitikpaandi di bí ki wòoǹee.

Ní pīlifì an nín tùm̀ pu dàii abee poonee,

anibul ŋin kóoǹ ki kpáfèe kansikinee.

An sá ti-Dindaan Mpɔŋkɔdaan

di bí ki kpèé bijanjaliibi

bin làá cù kujaauee.

5 Ti-Dindaan nì bin làá lēē u-ŋuul kí dàkèe

nyánní ndandati, kitiŋ gbèennyɔkɔ.

Bi làá nàan̄ kitiŋ nee kɔkɔ.

6 Nín̄ sūm̀maan ki yáliŋkí,

kun puee ti-Dindaan wiiŋŋu tóobiń!

Ŋu dòoń kí nàan̄ tikɔkɔ,

Unimbɔti Mpɔŋkɔdaan di túnní-ŋu^b.

7 An pu ní binib kɔkɔ ŋalii jòon̄,

tiwun yɔ̄tì.

8 Dinyoondi làá kɔ́-bi

ní iwàlfi nì ŋwunnyaŋfi ń cúú-bi.

Bi làá nīn bí ki yáliŋkí nì bi-ba,

kii upɔdaan di kā imatiŋween puee.

Bi làá nīn kíǹ ki kpèé tɔb nì bitii,

ní bi-nimbiliŋ ń mántí cínciŋ.

9 Kpèè, ti-Dindaan wiiŋŋu di dòońee,

ŋwiin ŋun disaasɔl kaa dāa bée,

ŋwiin ŋun di sá u-ŋuukpaandi wiiŋŋuee.

U làá dāá yàntī kitiŋ ń kpántí kuteeu,

kí dāá céetí bikpitiŋaliibi kɔkɔ.

10 Iŋmalbijaa nín kpáfì kpáfì pu ki bí yilpuee

kaa làá ti nín̄ wāĺ.

Ŋwìiń tin lì yii ŋu nyēēyee, an fātìi bɔ̄ntì,

ní uŋmal mun kaa dāa gíti pīiǹ^c.

11 Ti-Dindaan bí yii:

«M làá dáaĺ duulinya nib tafal bi-tuŋkpitiŋ pu,

m làá dáaĺ binikpitib tafal bi-kpitii pu.

M làá kúntí bin dàkà bi-bee bi-lambil pu,

kí sìntī bin tɔ́kɔ́ bi-jutiibi puee taapu.

12 M làá yàntī binifoobi ń taa ti nín̄ gbōō kii sindaariyamɔntee,

ń taa ti nín̄ gbōō kii Oofiiri tiŋkin sindaariyauee^d.»

13 M làá cìŋkì yilpu

ní kitiŋ nyeel ń jìkì màkà maka,

man ni-Dindaan Mpɔŋkɔdaan ŋuul pu,

ŋwiin ŋun dì làá fōō lìblib kii ŋŋmee pu.

14 Niinee, kii upeeman un bi bíi jèe,

àá ipii in kaa cáá upikpaalee nín sáń puee,

míǹ ní báà ŋma làá dāá sāǹ kí gítí u-nibul cee,

báà ŋma làá dāá gítí u-tiŋki pu.

15 Bin kɔkɔ bi làá dāá kée,

bi làá dāá yāŋkì-bi ipiin,

bin kɔkɔ bi làá dāá cúúyee,

kitàataajiki ní bi làá dāá dūú kpɔ̀-bi.

16 Bi-nimbilaaliyin ní bi làá dāá tāā kí mátí bi-biyaamu,

kí dāá fūkul̀ bi-wanti tin bí bi-diiŋŋinee,

kí dāá cūtì bi-nimpoobi mpɔn kí dòon̄ nì bi.

17 M làá lùkutī Meedeesi yab kí dū-bi kí tɔ̄ bi-pu.

Binib gbanti tafal kpá nì animbil,

áli gba bi kpèé ki sìŋkīǹ sindaariya ní.

18 Bi làá tɔ̄ binaacimpɔmbi ipiin kí kpɔ̀,

kaa làá gàntī mbipɔmu,

kaa làá sɔ̄ mbiyaawaamu mun saai.

19 Babiloon tiŋki kin di ŋān̄ abee kansikinee,

kitiŋ kin di ŋān̄ Kaaldee yab cee kii dibeedimbilee

làá kpántí kii Soodoom nì Goomoora timmu

mun Unimbɔti nìn nāaǹee ní.

20 Kí yòon̄ kí nīn pée cá jaanjaanee,

unil kpá kí gíti kàl̄ Babiloon tiŋkin,

kì làá nīn dɔ̄ fám ní kí nīn cá jaanjaan.

Biwaŋkpaaliibi bin yìiǹ ki kpàá bi-waŋkutee gba

kaa làá dāá cóoń bi-tantib ki-pu,

bipikpaaliibi kaa làá dāá kpàà bi-piii ki-pu.

21 Ilambunti di dāa kíǹ ki kóò kitiŋ gbantin,

ní atulinjoo ń dāá gbí ki-diiŋŋin.

Kì làá dāá kpántí laakin taataabi kóòyee,

ní iŋɔjaa dāa yùkufī ki-digbuŋŋi pu^e.

22 Isaakpan dāa kpátí kí gbí ki-dikpaaŋŋi poon,

ní sinsiŋkub ń gbí ki-beeciŋŋi amɔntee poon.

Babiloon tiŋki kúntitam tóobiń, an bāań gba,

báà ŋwimbaanti kaa làá gbéeǹ.