Yeesaya 14

Bin bi cúú ki cūnnì kuyuŋuee gítintam

1 Ti-Dindaan làá sɔ̄ Jaakɔb naantiibi saai. U làá fàtīí lēē Isirayeel nibul dí nīn sá u-yal. U làá fàtīí kàan̄-bi bi-tiŋki pu. Binicambi làá kūtì bi-pu ní bi nì Jaakɔb naantiibi ń ŋá ubaanti.

2 Anibul aba làá dāá yòon̄ní Isirayeel yab kí fàtīí gíiǹní bi-tiŋki pu. Ti-Dindaan tiŋki pu niinee, Isirayeel yab làá dāá dū binicambi gbanti, bininjab nì binimpoobi kɔkɔ kí kpántí bi-yumbui. Bi làá dāá cúú binib bin nìn cúú-bi kuyuŋuee kuyuŋu. Bin nìn wɔ́b́-bee làá dāá nīn kíǹ ki bí bi-taapu.

Babiloon bɔtiu kpiisilaŋŋu

3 Isirayeel nibul, a-gìńdi nì a-yaliŋkii nì kuyuŋu kun bi cúú-see boonee, ti-Dindaan làá tīī-si diŋuŋfil. 4 Niinee a dāa gà nlan nee kí bèel̀ Babiloon bɔtiu yii:

«An kúntiǹ uwɔ́bilee mana ní?

U-lambilee bí la ní?

5 Ti-Dindaan cúú bitɔŋfitiibi tambɔndi ki gíì,

u cúú biwɔ́biliibi kpandɔŋu ki kɔ́fì.

6 Un nìn tàfí anibul nì diŋuul,

ki nìn gbáà binib kaa gbèentí,

ki nìn cáá tipɔmbɔti ki jīǹ atimbun pu dibeel,

ki nìn kā ŋi-pu kàtì kati.

7 Kɔŋkɔnnee kitiŋ kɔkɔ ŋūŋfì ki ká dipɔɔsɔŋkil.

Báà ŋma kíǹ ki fàal̀.

8 A-puee, ki kpáaǹ siipreesi sufii bí ifaal poon,

ní a nín lítì ki dɔ̄ee, Leebanɔn seedir sufii lì yii:

<Un nìn jɔ́miń ki gàatī-tee kaa ti làá jɔ̄mìń.>»

9 Taapu taŋkpiilin yab

nín gbìl̄ yii a dòońee,

ní bi bí ki bɔ́ntí bi-ba

ki cí yii á dāan̄.

A-puee bi fīkitì bitaŋkpiibi

bin nìn sá bikpaambi kitiŋ puee,

ní ki yāntì atimbun kɔkɔ bɔtiibi

yíkì bi-beejaliŋ pu ki yúl̀ a-pu.

10 Bi-kɔkɔ làá sòoǹ kí lì yii:

«Si mun kaa ti cáá mpɔn kii timbee dee,

ti nì si ŋá ubaanti dee!»

11 Bi bíi bɔ̀ɔ́ tibati

ní ki téé a-kpaanti ki tɔ́ ditaŋkpiilin.

Akoosibil di kíǹ ki sá-si kilambaŋ,

ní ijiliŋkpaam sá-si satabiiŋkaa.

12 Sii utaafaaŋmalbija un wāĺ kílkilee^a,

an dī mana ní a nyánní yilpu ki lítìń ní?

Sii un nìn jáà ki pɔ́ɔkíǹ atimbunee,

an dī mana ní bi téé-si ki lúkú míǹ?

13 A nìn bí ki lì a-ban yii:

«Man làá jɔ̄m̀ kutaa pu,

m làá jɔ̄ntiǹ m-beejal yilpu

kí nīn bí Unimbɔti ŋmalbijaai yilpu.

M làá kàl̄ dibeel dijool yilpu,

laakin ní inimbɔti kàal̀ ki kpáfí,

ŋwìiń nyalaŋki pú kúntilaŋkee.

14 M làá jɔ̄m̀ atagban yilpu kúntí kunti,

m làá nīn bí kii Yilpu Fɔ́ŋŋŋ Nimbɔtiuee ní.»

15 Ama a sīntì ki bàn̄ ditaŋkpiilin,

kubookpaaŋŋu taapu taapu^b.

16 Bin ká-see kpèé-si dímmm ní ki lì yii:

«Mimmee unil un nìn yàntī kitiŋ pu nib jìkì,

ní abee cìŋkēe sèéee?

17 Úǹ di kaa nìn nàantí ntimu,

ki nìn yàntī kitiŋ kpántí kuteeu

kaa líikí bisarkadambeeee?»

18 Atimbun bɔtiibi kɔkɔ yaa kpíìyee,

báà ŋma dɔ̀ u-kaakulin nì tinyool ní kí ŋùŋfì.

19 Ama siiyee, bi dū-si ki fá,

kaa síb́-si a-kaakulin^c.

A bí kii kibiki kin bi màl̄ kaa yōoǹ

kì dɔ̄ kaa bí ŋkpèéyee ní.

A dɔ̄ binib bin bi kūūyee nyìkī a-pu.

Bi dū kitàataajiki ki sāatì ki cífì cífì-si,

ki téé-si ki tɔ́ kubookpaaŋŋun ataŋkpee pu,

kii dinikpil din dɔ̄ binib tà ki jītée.

20 Baa làá kpāfì sii nì bi kuceeu,

kun puee a nāaǹ a-tiŋki,

ní ki kūū sisi a-ba nibul.

Dalba dalba baa làá ti pútí

a-nibooliŋu binikpitib nee yindi.

21 Ní bɔ́ntí kí kpɔ̀ mbininjabiyaamu

inikpiti in mu-baabi ŋáaǹee pu!

Án nín làá ŋà pu bí taa láa yīkì

kí já kí fōō kitiŋ

kí náań ntimu kí gbéeǹ duulinya kɔkɔnee.

22 Ti-Dindaan Mpɔŋkɔdaan bí yii: «M làá jáǹ Babiloon yab. M làá kúntí Babiloon yindi nì ki-nib bin kíǹee, nì bi-biyaamu nì bi-naantiibi kɔkɔ.» Man ni-Dindaan di lī míǹ. 23 «M làá yàntī Babiloon tiŋki ń kpántí kubɔɔu, laakin ní jɔmbaaŋkib kóòyee. M làá dū dinàandi ŋaaŋŋu kí ŋàtī-kì.» Man ni-Dindaan Mpɔŋkɔdaan di lī míǹ.

Ti-Dindaan làá nàan̄ Asuur pɔŋŋu

24 Ti-Dindaan Mpɔŋkɔdaan di pūtì ki lī yii:

«Tiŋman pu, tin m bɔ́ntì kí ŋée, see án ŋá míǹ,

m nín lēē kí ŋá puee, see án ŋá míǹ.

25 M làá kúntí Asuur yab pɔŋŋu m-tiŋki pu,

m làá tāā kí mátí-bi m-jooŋŋi pu.

M làá léetí kpancikil un bi léeǹ m-nibee pu,

kí túutí-bi ditúndi din bi túee.

26 Ti-Dindaan nín sòon̄ tin ki yóoǹ

duulinya kɔkɔ puee dee,

u nín bɔ́ntì pu ki yóoǹ kí dáaĺ

atimbun kɔkɔ tafal puee dee.»

27 Ti-Dindaan Mpɔŋkɔdaan yaa lēē kí ŋá puee,

ŋma di ŋūǹ kí lì yii ú taa ŋá míǹ?

U yaa gúntì u-ŋal,

ŋma di ŋūǹ kí cúú-ŋu?

Ti-Dindaan bíi kpáafí Fiiliistii yab

28 Dibindi din ubɔti Akaasi kpíìyee ní bi báakì tibɔti tin bí nee^d.

29 Nimbi Fiiliistii yab kɔkɔ^e,

án taa nín̄ mɔ̄ǹ-ni yii

ndɔ ŋun bi dūu gbáń-nee nín gíìyee.

Di sá yii ukoobu un kpíìyee poon

ní ukoowaati làá nyānní,

ní ukoowaatee ń màal̀ kukoobiliŋŋu kun ŋàaǹee.

30 Binandambi làá dāá ká kí jī kí díkí,

biwɔfib làá dāá ŋùŋfì nì ŋgbansɔŋfi.

Ama m làá yàntī sii biyaamu ń kpú ŋkùm,

ní kí yàntī bí kpɔ̀ mun kíǹee.

31 Kitiŋ punyɔkɔki, nín̄ yáliŋkí,

ntimu, nín̄ sūǹ ki tátímaan.

Fiiliistii yab kɔkɔ wunti yɔ̄tì,

di sá yii nnyiim miba nyánní ŋgan pú ki dòoń.

Binannanliibi gbanti kansikinee,

báà unil kaa sáǹ ki wāatì dijanjakitil.

32 Ti làá dāá kíí ditimbundee tuuŋyi yii ba?

Yii: «Ti-Dindaan u-ba di náań Siiyɔn tiŋki.

Niin ní u-nibul yab bin sá biwɔfibee

làá dāá sāǹ kí kɔ́.»