Yeesaya 17

Damaasi nì Isirayeel beeŋi làá lítí

1 Tin ti-Dindaan sòon̄ Damaasi tiŋki puee sɔ̀^a.

Damaasi tiŋki kaa làá nīn gíti sá kitiŋ ki bí,

kì làá kpántí adigbun ŋma ní.

2 Binib làá yīkì kí fá Arooweer timmu.

Tiwaŋkuti di làá jī mpaan mu-poon kí nīn bí

ní báà uniseen kaa dāa bí ki páb̀-tì.

3 Ntimu mun bi máń agun ki túee

kaa ti làá nīn bí Eefiraayiim beelin.

Damaasi tiŋki kaa dāa gíti cáá ubɔti.

Aram yab bin làá dāá kíńee

nì Isirayeel yab wíiŋŋu làá dāá nīn ŋmà ní.

Ti-Dindaan Mpɔŋkɔdaan di lī míǹ.

4 Ŋwiin gbantee, Jaakɔb nyooti làá bàtī,

ní u-wunti tin nìn bí màlmalee ń sāǹ.

5 Án làá dāá nīn bí kii dijincal yuntiŋu,

ukpaal nín cēē tikpaajin

kí kóoǹ kí bíĺ abɔn abɔn puee ní.

Án làá nīn bí kii bi nín lúlifí tikpaajin

Reefayiim tantakalin puee ní.

6 <Án làá dāá pée kíń tijinlulifikaal ní, tin ní bi lúlifèe,

kii bi nín yaa kītì ɔliifi subiliŋ,

an nín kīntí abil ali kii ata pu ki lúń yilpuee,

àá abil anaa kii aŋmoo ŋin kīntí asupan puee.

Tibɔti tin ní ti-Dindaan Mpɔŋkɔdaan,

Isirayeel Nimbɔtiu sòon̄ee dee.

7 Yaadalee, binib làá dāá dū bi-nimbikpeeŋu kí báań bi-náanliu pu, bi làá dāá fàtī bi-nimbiin kí túĺ Isirayeel circir Nimbɔtiu cee. 8 Baa dāa gíti fàtīí kpèè isaraafan in bíǹ bi-ba máńee. Baa dāa gíti fàtīí kpèè diwaal Aseera windɔi àá isaraafan in pu bi tùutī talaalubee watil pú.

9 Yaadalee bi làá dāá sāǹ kí fá bi-timmu mun bi máń agun ki túee, kii dooooyee Eefi yab nì Amɔɔr yab nín nìn sáǹ ki fá bi-timmu pu Isirayeel yab nimbiinee ní. Bi-timmu gbanti làá dāá kpántí kii kuteeuee.

10 Isirayeel, a súntì Unimbɔti un fīī-see pu.

Aa ti téetí ditaŋkpal din a sáǹ ki kɔ́ee pu.

An pu ní a cóoǹ isufi in cáá kunyaaŋŋuee,

ní ki búĺ asubil ŋin di nyánní ntincamunee.

11 Ŋwiin ŋun a cóoǹ-iee, ní i yíkì ki wíiǹ,

kutaafaauee ní iwambool in a búĺee ń púkuḿ.

Ama ní nnaabu wiiŋŋu dalee,

tin a cáńee kɔkɔ ń wāŋkì a-cee,

ní án kaa dāa cáá dicáaǹdi.

Anibul wooku

12 Mbusu bɔti!

Anibul kupaau di dòońee.

Kuwoou kun bi gàńee náań nì tiŋku wooku ní.

Atimbun bintindi náań nì

tinyiŋgban nín yíkí ki yāŋkí tɔb puee ní.

13 Atimbun gbanti wooku

náań nì nnyiŋkpaam wooku ní.

Ti-Dindaan kpìl̄-mì

ní mì sáǹ ki nín cá ndandati,

a lì kii dijool pu buŋku

nín yòontí timɔkulindi ki féeń puee,

kii kubuŋu nín yòontí kikuŋkumbɔŋ biliŋ puee,

a lì kii kubuŋkpaaŋŋu nín yòontí kukpɔŋkpɔŋu puee.

14 Kujoouee, an sá dinyoondi ní,

ama ku dāa lì yii ku wúntée, bi wáŋkì.

Binib bin dòoń ki fúkuĺ-ti ki gbákaĺ-tee,

kun dɔ̄ ki cí-bee dee.