Yeesaya 16

Moowaab yab mēē Jeerusaleem yab ń jòoń-bi

1 «Ní yòom̄maan dipibil doooo Seera tiŋki

kin bí kuteeu watil púee kí cùnnì kí tīī

Juuda bɔtiu un kóò Siiyɔn jool puee.»

2 Moowaab yab nimpoobi bí Arinɔn buŋŋu

laakin bi ŋūǹ kí còom̀ kí dùtēe.

Bi náań nì inoon in bi jìn̄ ki nyántì i-diikun i yàl̄ee.

3 Bi bí ki lì Jeerusaleem yii:

«Tùkù-ti kun ti máaǹ kí ŋée, ŋá tiba kí tīī-ti.

Wúń ti-pu kuwiŋkaŋu nee pu,

kii kunyeeu, dibɔmbɔndi nín bīī puee.

Dū ti-yab bin sáǹ ki kɔ́-see kí báĺ,

taa bìitī bin bíi sáńee pu.

4 Yàntī Moowaab yab bin sáǹ ki kɔ́-see ń kàl̄ a-cee,

nín̄ sá-bi kibalilaŋ unàanli cee.

Diwɔ́bil bɔti làá gbèen̄, tipɔmbɔti làá kúntí.

Unàanli làá yīkì ti-tiŋki pu.

5 Niinee a-ŋanti puee,

ubɔti beel làá nīn bá ki pɔ̄ɔ̄.

U làá dāá kpòotī Daafiidi beel nì deedee.

U làá dāá nīn bí kii ubɔsoonli

un deedee bɔti máǹ u-nimbiliŋ,

ní u néeń ibaamɔn bɔti tikpilee.»

Jeerusaleem kaa làá ŋmā kí tūtuǹ Moowaab

6 Ti gbìl̄ bi sòoǹ

Moowaab yab lambikpaandi pu.

Ba lambikpaandi díǹ bulifi dee!

Bi dàkà bi-ba, ki yòontí bi-ba yilpu

ki mɔ̀ɔǹ tikpil,

ama tin bi sòoǹee kaa cáá taapu.

7 Kɔŋkɔnnee Moowaab yab bíi sūǹ bi-tiŋki pu,

bi-kɔkɔ bíi sūǹ.

Bi yaa téetì fiinyi subiliŋ kalaabi

bin bi nìn ŋmóò Kiiri-Areeseeti tiŋki puee,

bi yáliŋkí ní.

Bi-wunti yɔ̄tì kpataaa!

8 Di sá yii Eesbɔn tiŋki sati kɔkɔ bíil̀

kii Siibima tiŋki fiinyi sufiiyee.

Ŋyunti puee, isufi gbanti damam di nìn gbéè

bin nìn sá atimbun kpilibee.

I nìn yú ki tin bàn̄ Yaseer tiŋkin,

ki nìn nyēē kuteeun an kɔkɔ pu.

I nìn tɔ́ apan an lákatì Ŋyaam mɔɔl pu.

9 An pu ní m kútì Yaseer yab pu

ki bíi sūǹ Siibima fiinyi sufii pu.

Eesbɔn nì Eelalee, m làá dū m-nyinnyim

kí yàaǹ-ni ní sɔ̀ŋkì.

Kun puee ni nín nìn kìtī ni-subiliŋ,

ki cēē ni-jikaati nì dipɔɔpindi

ki fàal̀ puee kɔkɔ kúntì.

10 Dipɔɔpindi nì ifaal kúntì ni-kpaaŋŋin.

Naa ti gà ilan ki kūuntí ni-fiinyi kpaaŋŋin.

Kubɔbiku kun poon ni nìn tà fiinyi biliŋ

ndamam còol̀ee kūń.

Dipɔɔpindi faalii kúntì^a.

11 An pu ní m bí ki sūǹ Moowaab tiŋki pu.

M bíi yáliŋkí kii bi nín bɔ̀ɔ́ kubeeu

ki gà kunimbaau laŋyi puee.

M bíi yáliŋkí m-pɔbil poon Kiiri-Areesi pu^b.

12 Moowaab yab làá gīī kí dàb̄ ŋgbantamu pu.

Bi làá cùú kɔ́ bi-waadiikun kí tīminsì,

ama tiba kaa làá kpántí.

13 Tibɔti tin ti-Dindaan nìn sòon̄ Moowaab tiŋki pu dooooyee dee. 14 Ama kɔŋkɔnnee ti-Dindaan bí yii: «Kí yòon̄ díǹ kí cáá sāā abin ata deedeeyee, Moowaab tindaŋkpilib nì samaa kɔkɔ kaa dāa gíti bí tiban. Bin làá dāá kíńee kaa làá dāá nīn náaǹ, ní kaa dāa pɔ̄ɔ̄ mun.»