43
1 Ama kɔŋkɔnnee, Jaakɔbti-Dindaan un di náań-see,
úǹ un di máń-see, Isirayeel
nín sòon̄ puee sèé:
«Taa fàŋkì, di sá yii m dá-si ki líì,
ki yíiń-si nì a-yindi, man di yì-si.
2 A yaa bíi dùtī nnyim, m làá nīn bí a-cee,
a yaa tí bíi dùtī ibun, i kpá ki làá yòon̄-si.
A yaa bíi còom̄ ŋŋmi poon, ŋuaa làá wà-si,
ní aŋmilimbil kaa làá gbēē-si.
3 Di sá yii man a-Dindaan di sá a-Nimbɔtiu,
man Isirayeel Circir Nimbɔtiu di sá a-Fiiliu.
«M dū Eejipiti tiŋki ní ki tīī ki fātìi dá-si ki líì,
ní ki dū Kuusi nì Seeba timmu ki kpántì-si ki fōō-si ki líì.
4 Di sá yii a pɔ̄ɔ̄ kudaau m-nimbiin,
ní maa mɔ̄ a-pu ki néeń-si.
An puee m dū binib ki téeǹ a-yil,
ní ki dū anibul ki pàn̄ a-maŋfal pɔndi.
5 «Taa fàŋkì, kun puee m bí a-cee.
M làá yòon̄ní a-naantiibi
doooo ŋwìiń nyalaŋki pú kí gíiǹní,
kí yòon̄ní-bi doooo ŋwìiń jeetilaŋki pú
kí kpāfì.
6 M làá lì ŋgan pú yab yii: <Gíim̀maan-bi kí tīī-mi>,
ní kí lì ŋgiil pú yab yii:
<Taa cúúmaan-bi kí kàan̄!>
Gíiǹnímaan m-jipɔmbi bin bíń ntindandatimunee,
kí gíiǹní m-bisalib bin bíń kitiŋ kúntilaŋkee.
7 Gíiǹnímaan binib bin fōō m-yindee,
binib bin m náań,
ki máń, ki nyántì
bí nīn tìì-mi tinyoolee.»
Nimbi di sá m-seeradambi
8 Ní nyāntí dinibul nee doo!
Dì cáá animbil ama ní kaa wāĺ,
ki cáá atafal, ama ní kaa gbìl̀.
9 Atimbun kɔkɔ ń kóoǹ kí kpāfì dicilpu,
anibul kɔkɔ ń kóoǹ kí kpāfì.
Bi-kansikin ŋma di ŋūǹ kí tùkù-ti tin bíi jītí nee?
Ŋma di ŋūǹ kí yàntī tí gbìl̄ tin jítèe?
Bí cáań bi-seeradambi kí dàkà yii bi cáá mbaamɔn!
Ní bi-seeradambi gbanti ń pīlifì bi nín sòon̄ puee
kí lì yii: «An sá ibaamɔn!»
10 «Nimbi m-nibul di sá man seeradambi.
Ni sá m-tɔntɔnliibi bin ní m lēēyee ní.
M là yii ní fōō-mi kí kíí,
kí béé kí gbìl̄ yii man di sá Unimbɔti.
Kí wàatī ḿ nīn bée, unimbɔti ubɔ nìn kpá,
ní m-boonee ubɔ mun kaa làá ti nín̄ bí.
Ti-Dindaan di lī míǹ.
11 M-baba nì m-baba di pée sá ni-Dindaan,
man boonee, ufiil ubɔ nì ubɔ pée gíti kpá.
12 Man di fìil̄, ki sòon̄ ki síiǹ
ní ki yàntī binib béetí-tì.
An sá man, kaa sá unimbɔticaan ubɔ
un bi ŋūǹ kí ká ni-ceeyee.
Ni sá m-seeradambi ní man sá Unimbɔti.
Ti-Dindaan di lī míǹ.
13 Míǹ ní m làá nīn sá kí nīn cá jaanjaan.
Ubɔ kpá ki ŋūǹ kí fōō u-juti m-ŋaan.
Tin ní m yaa ŋée, ubɔ kaa ŋūǹ kí kpántí-tì?
M làá lēē unil ubɔ kí tɔ̄ ni-cee
14 Ti-Dindaan un di dá-ni ki líìyee,
úǹ un sá Isirayeel Circir Nimbɔtiuee
nín lī puee sɔ̀.
Ni-puee, m làá tɔ̄ unil ubɔ Babiloon tiŋkin.
M làá yàntī kitiŋ punyɔmmu ń cúú pìitī.
Tiŋman, Babiloon yab ceeyee,
mmɔn làá dāá kpántí iyaliŋki,
bíǹ Kaaldee yab bin kā bi-meelabin
ki bí ki tátí ki fàal̀ee.
15 Man di sá ni-Dindaan, ni-Circir Nimbɔtiu,
Isirayeel Náanliu nì ni-Bɔtiu.»
Nsampɔɔn làá dòon̄ kuteeun
16 Ti-Dindaan nín lī puee sèé.
Úǹ di nìn tɔ́ didandi dimɔɔlin,
ki cátì nsan nnyim min nyóòyee poon.
17 Úǹ di nìn nyántì janjatɔrɔkub nì itaamu,
ki kpáaǹ ajanjakiti nì bibaatandambi dicilpu.
Bi-kɔkɔ lítì kaa ti yíkì,
bi kpíì kɔkɔ múb, ki wùn̄ ki kúntì kii ŋfitilaŋmiiyee.
18 «Ní taa ti téetí tibɔkpikil pu,
ní taa ti dàkafì tin jítèe pu.
19 Di sá yii m làá fàtīí ŋá tiwan mpɔma,
tì kíĺ ki bíi nyēē gba, naa wāĺ-tàaa?
M làá tɔ̄ nsan kuteeun,
kí yàntī ibun ń cɔ́tí kitiŋkuliŋŋi pu.
20 Kumooun peelii làá dāá nyɔ̄ŋkì-mi,
ki kpáaǹ sinsiŋkub nì taataabi.
Di sá yii m làá dāá yàntī
nnyim ń pùub̀ kuteeun,
ní ibun ń cɔ́tí kitiŋkuliŋŋi pu.
Tiŋman, m làá tīī dinibul din m lēēyee
nnyim dí nyɔ̀.
21 Dinibul din m máń ki tīī m-bee
làá dāá gāā ilan kí nyɔ̄ŋkì-mi.»
Unimbɔti nì Isirayeel nibul cáá ibɔsoon
22 Jaakɔb, an kaa sá man ní a tíminsì ki yíiń,
Isirayeel, a gīī nì mi ní.
23 Saa cáań apibil ki ŋá bisaraawɔkaabi ki tīī-mi,
kaa tí kūū tiwaŋkuti ki ŋá saraabi ki tīī-mi tinyool.
Man kaa dū-si ki kpántì uyumbu
á nīn ŋáań tijin saraabi ki tìì-mi,
kaa tí páb́-si yii á nīn sèetī talaalutuukaabi ki tìì-mi.
24 An kaa sá man pu ní a dū a-nimbiliŋ
ki dáal̀ talaalutuukaabi bin sɔ́fèe,
kaa tí dū tiwaŋkuti saraabi kpam
ki tīī-mi m ŋmɔ́ ki díkí.
Ama a dū-mi ki kpántì uyumbu a-kpitii pu ní,
a-yìntitam yāntì m gīī.
25 Ama an sá mama m-ba di dū a-kpitii ki pú-si,
maa làá ti téetí a-yìntitam pu.
26 Téetí-mi tin a cáá kí kɔ̄kɔl̀-mee
man nì si tí cù ibɔsoon.
Pée kàaǹ a-bɔti kí lēē kí dàkà yii tì ŋān̄.
27 A-naanja upeepeekaa nìn yīntiǹ-mib,
ní a-bɔnaatiliibi yíkì ki bíi jáà nì mi.
28 An pu ní m kpákatì bikpilib bin m nìn kāaǹee,
ki dū Jaakɔb nibul ki tīī bí kpɔ̀ kí céetí,
ki dū Isirayeel yab ki tīī bi-nannanliibi ń bèel̀-bi.