Yeesaya 44

1 Kɔŋkɔnnee pīlifiǹ-mi,

m-tɔntɔnliu, Jaakɔb nibul,

Isirayeel, sii un ní m lēēyee.

2 Man a-Dindaan un máń-see,

man un náań-si ki tākaǹ a-na poon,

ní ki tútúǹ-see nín lī puee sèé:

«Taa fàŋkì, m-tɔntɔnliu Jaakɔb,

sii Yeesurun^a un ní m lēēyee.

3 Di sá yii m làá yàaǹ

kitiŋ kin kūńee pu nnyim,

kí yàntī ibun ń pùub̀ kitiŋkuliŋŋi pu.

M làá dāá yàntī m-Fam ń kpákatiń a-biyaamu pu,

ní kí bìin̄ a-naantiibi pu.

4 Bi làá nyā kii timool nín nyēē kusaaun puee,

kii isufi nín nyēē ki yú dibuŋgbándi puee.

5 Ubɔ dāa lì yii: <Man sá ti-Dindaan yɔu ní>,

ní ubɔ mun ń dāá lì yii: <M sá Jaakɔb dicaŋkun ní>,

ní un kíǹ mun ń dāá ŋmà u-ŋal poon yii:

<Ti-Dindaan di yì-mi>,

ní án dāa mɔ̄ǹ udaan bí nīn yíì-u Isirayeel yindi.»

Ti-Dindaan boonee, ubɔ kaa ti bí

6 Ti-Dindaan, Isirayeel Bɔtiu

un di dāā u-nibul ki líikée,

ti-Dindaan Mpɔŋkɔdaan

nín lī puee sèé:

«Man di sá upeepeekaa ní ki sá uluŋkikaa,

man boonee, unimbɔti ubɔ kaa ti bí^b.

7 Ŋma di bí kii man?

Udaan ń téeń mpɔn kí sòoǹ

kí cántí taapu kí tùkù-mi!

Udaan ń lì tibɔti tin jítì

doooo m nín náań dinibupeepeekaalee,

ní kí lì tin bí ki dòoń fool boonee!

8 «Dinyoondi ń taa kɔ́-ni,

ní taa pée fàŋkìmaan!

Maa pée sòon̄-tì ki lēē-tì ki dàkā-ni dooooyeeee?

Nimbi di sá m-seeradambaa!

Unimbɔti ubɔ gíti bí ki kútì man puɔɔɔ?

Aayee, ni-taŋkpal din pɔ̄ɔ̄yee,

maa ti nyí diba ki kútì man pu!

Binib bin mɔ́ɔ̀ awaayee kaa bí tiban

9 Binib bin mɔ́ɔ̀ awaayee kɔkɔ kaa bí tiban.

Bi-wammɔɔkaati tin bi néeń gbantee kaa kèetī tiba.

Tiwan gbanti di sá bíǹ seeradambi,

ama tì sá biseeradambi bin kaa wāĺ tibaaa,

kaa nyí báà tibaaa,

ní ki làá kɔ́ǹ-bi icooyee ní.

10 Kí mā diwaal,

kí mɔ́ɔ́ diwaal din kaa ŋūǹ kí kèetī tiba poonee,

an sá digbaantundi ní.

11 Kpèè, icoo làá cúú bin kɔkɔ

nóó diwaal gbantee.

Bin máń diwaal gbantee mun pée sá binib ní.

Bi-kɔkɔ ń kóoǹní kí kpāfì kí dāan̄:

dinyoondi làá kɔ́-bi ní icoo ń cúú bi-kɔkɔ!

12 «Ucaa dù tikúti kí púĺ ŋŋmin,

kí dū nsílin kí gbá

ní kí dū u-pɔŋŋu kí mɔ́ɔ́ diwaal.

Ama ŋkùm yaa cúú-uee,

waa ti cáá mpɔn.

U yaa kaa nyùn̄ nnyimee,

digìńdi kɔ́-u dee.

13 «Ukpiŋkpiiti dù ŋŋmii ní kí ŋmàntī ndɔ,

kí lēē u nín là diwaalee ń nīn bí puee,

kí dū kicɔkɔ kí kpítí,

ní kí dū kijijɔlfikaai kí jɔ̀lifì,

ní kí kpítí-dì kí nántíǹ unil,

ní di kíǹ ki cáá kunyaaŋŋu kii unilee.

U yaa ŋá míǹ ki dóòyee ní ú yòon̄-dì

kí cáá kɔ́ǹ kí yóoń kuwaadiin.

14 «U gāā seedir subu,

ki lēē seeni subu nì teereebinti subu,

isufi in bí kubambaŋŋunee kansikin ki yāntì i wíiǹ.

U cóoǹ peeni subu ní utaa yāntì bu wíiǹ.

15 Busubu gbanti ní binib làá dūú kpāā ŋŋmi.

Búǹ ní binib làá dūú kpāā ŋŋmi kí wùl̀,

àá kí dūú kpāā ŋŋmi kí púĺ kpɔnɔ.

Busubaantiibuee ní bi tí dūú ŋá

unimbɔti ki gbàantí ki jáaḿ.

Bi dùú kpítí diwaal ní ki tòotī.

16 Bi dù ndɔee dijandi kí kpāā ŋŋmi,

ní kí dū tinan kí páań kí ŋɔ̄fì kí ŋmɔ́ kí díkí.

Bi tí ŋūǹ kí wùl̀-ŋu ní kí lì yii:

<Àaa! Ndɔee fòol̄ tiŋan,

ŋŋmi kɔ́-mi fíŋfiŋ ki mɔ̄.>

17 Dijandi din kíǹee, ní bí dūú kpítí diwaal

ki yíì-dì unimbɔti.

Bi gbàantí di-nimbiin ki jáaḿ-dì,

ki mèé-dì ki lì yii:

<Fīī-mi, kun puee sii di sá m-nimbɔtiu!>»

18 Binib gbanti kaa nyí tibaaa,

kaa gbìl̀ tibɔti taapu mun.

Di sá yii bi-nimbiliŋ ŋúb́

ní baa ti wāĺ báà tiba,

bi-pɔbiliŋ tīlifì

ní baa ti gbìl̀ tibɔti taapu.

19 Bi-kansikin ubɔ kaa kóò u-ban kí dàkafì,

ubɔ kaa cáá iciin nì dinyil kí lì yii:

«M dū ndɔ nee dijandi ki kpāā ŋŋmi,

m púĺ kpɔnɔ ŋŋmi ŋun m kpāāyee pu,

ki dū tinan ki páaǹ ki ŋɔ́fì ki ŋmɔ́.

Mimmee, m làá dū digindi din kíǹee

kí kpítí diwaal, ntimbiil wantaaa?

Mimmee m làá gbàan̄ kí jāam̀ didɔgindaaa?»

20 Bi dū bi-ba ki tīī tin sá ŋfantamee ní.

Bi-pɔbil din gáatèe

yāntì bi-yiliŋ lábitì.

Ŋaa ŋūǹ kí fīī-bi.

Ama bi-kansikin ubɔ kaa lī yii:

«Kun m ŋúb́ m-ŋaan nee

kaa sá tinyimɔŋwan deeee?»

A sá m-tɔntɔnliu ní, á taa súntí míǹ

21 «Jaakɔb nibul, á téetí tin bí nee,

Isirayeel nibul, a sá man tɔntɔnliu ní.

M máń-si á nīn sá m-tɔntɔnliu ní.

Isirayeel nibul, maa làá súntí a-pu.

22 M yāntì a-yìntitam wáŋkì kii ditagbandee,

ki yāntì a-kpitii wáŋkì kii ditaafaapɔ̀ńdee.

Fàtīí gítiń m-cee, kun puee m dá-si ki líì ní.»

23 Yilpu, nín̄ tátí ki fàal̀,

kun puee ti-Dindaan túń u-tundi.

Kitiŋ taapu taapu, téeń mpɔn,

ajoon, nín̄ gàmaan ipampakalan,

ki kpáaǹ kubambaŋŋu nì ku-sufii kɔkɔ.

Ti-Dindaan dá Jaakɔb nibul ki líì,

u fīī Isirayeel ki lēē u-nyooti ki dàkā.

Duulinya náanliu di sá iyunti kɔkɔ Dindaan

24 Ti-Dindaan un dá-si ki líìyee,

úǹ un máń-si ki tākaǹ a-na poonee

nín sòon̄ puee sèé:

«Man ni-Dindaan di náań tikɔkɔ.

Man baba di kpátì kutagbɔŋu ki dāntì yilpu,

man di tí dū kitiŋ ki kpátì ki bíl̀ taapu,

báà ubɔ kaa tútúǹ-mi.

25 M ŋáań bibɔɔbi nín sòoǹ tiŋyee fám.

M cúú bin kàal̀ abɔɔjalee yiliŋ ki lábitì.

M pīiǹ biciŋfitiibi nyɔmmu,

ní ki yāntì bi-ciiŋŋu kpántì tiwaatibɔti^c.

26 Ama m-tɔntɔnliibi nín sòoǹ tiŋyee,

m yàntī an ŋáań míǹ,

ní m-tuuŋyi nín bɔ́ntì kí ŋá puee,

m tí yàntī an ŋáań míǹ.

M lī Jeerusaleem pu yii:

<Binib ń fàtīí kɔ́-kì>,

ki lī Juuda timmu pu yii:

<Bí fàtīí mā-mu.>

Tiŋman, bi làá fàtīí mā adiin

kí tɔ́kɔń mu-digbuŋŋi pu.»

27 M lī ibuŋkpaan in nyóòyee yii:

«Ní kpāmaan,

m làá yàntī ni-nyim ń fóotí.»

28 M lī Siirusi pu yii:

«U sá upikpaal un m lēēyee ní.

U làá yàntī tin kɔkɔ m lèe ń ŋá.

U làá lì Jeerusaleem tiŋki pu yii:

<Bí fàtīí mā-kì>,

ní kí lì kunimbɔtidii pu yii:

<Bí fàtīí bíĺ ku-nyeel^d!>»