Yeesaya 59

Tin sá ni nì Unimbɔti kansikin diganlakalee

1 Kpèè, ti-Dindaan ŋal kaa bí kigiŋgiŋ

kaa ŋūǹ kí fīī-ni,

u-tafal mun kaa kpáá

kaa ŋūǹ kí gbìl̄ tin ni sòoǹee!

2 Ama an sá ni-yìntitam

di cāabìń diyakatil

ni nì ni-Nimbɔtiu kansikin.

Ni-kpitii di yì-tì ní

u fātì u-boon,

kí taa gbìl̄ tin ni sòoǹee.

3 Di sá yii ni-ŋalii táká fatiku,

ní tikpitil táká ni-ŋambiyaamu.

Ni cáá ni-nyɔmmu ki mɔ́ntí inyimɔn,

ní ki sòoǹ ki bíiĺ ni-jutiibi.

4 Ubɔ kaa yíì u-juti tibuul

ki nóó deedee saŋŋu.

Naa dì ibaamɔn kí mɔ̄tì ni-jutiibi pu.

Ni máká tin kaa bée pu,

ki sòoǹ tinyimɔmbɔti.

Ni cáá ikpiti pool

ní ki màl̄ nnaabu.

5 Bi náká ukoowaati jiŋŋi pu,

ki lù tinaŋgbantalindi.

Un di yaa ŋmɔ́ an jiŋŋee kúù ní.

Dijindi din kamaa pu ní bi yaa nákáǹee

kákatí ukoobu ní.

6 Bi-naŋgbantalinti kaa ŋál̀ tiwampeeŋkaal,

ní unil kaa ŋūǹ kí dū tin bi lùn̄ee kí bìin̄.

Atuun ŋin ní bi tūǹee sá atuŋkpiti ŋma ní,

ní bi cáá bi-ŋalii ki ŋáań tipɔmbɔti ŋma!

7 Ni sáń malaa malaa kí cùú ŋá ikpiti,

ni yáb̀ kí cùú kpɔ̀ maanyiibab.

Ni-landɔkɔi sá ilandɔkɔkpiti.

Laakin kamaa ní ni yaa jítèee,

ni ŋáań tipɔmbɔti ní ki bíiĺ tikɔkɔ.

8 Naa nyí ŋgbansɔŋfi saŋŋu,

baa kāntí deedee laakin ní ni còom̄ee.

Ni-saŋyi kɔkɔ sá in gɔ́ĺ gɔ́ĺee ní,

un kamaa di yaa dī-iee kpá kí ká ŋgbansɔŋfi^a.

Unimbɔti nibul béè yii di yīntì

9 An pu ní Unimbɔti kaa bíi mɔ́tí ti-pu,

kaa bíi sòoǹ kí pɔ̀-ti.

Ti bàà cɔ́tí kí ká ŋwalifi,

ama ní ti kɔ́ dibɔmbɔndin.

Ti bàà kā ki cí án nyáatí ti-pu,

ama ní ti bí ki còom̄ an bɔ̀ǹ ti-pu.

10 Ti bí ki táfí kii bijɔfub di náká digundee.

Ti bí ki tìliŋkī kii bin kaa wāĺ

laakin bi còom̄ ki cée.

Ti gbéetí kuwiŋkaŋu pu

kii ti bí ntaafaabɔmbɔminee.

Ti baasii pée cáá ŋgbampɔn tiŋan,

ama ní ti bí kii bitaŋkpiibee.

11 Ti-kɔkɔ bí ki mùuǹ kii agbiŋgbilee,

ti bí ki yáliŋkí kii abeenanjilee.

Ti bàà kā ki cí Unimbɔti ń sòoǹ kí pɔ̀-ti,

ama ní taa ká báà tiba.

Ti bàà kā ki cɔ́tí yii ti làá ká difiil,

ama ní dì dáá gbíntìi dátiǹ-ti.

12 Di sá yii ti yīntiǹ-si tikpil,

ní ti-kpitii kɔ́kɔĺ-ti.

Ti pée dàkafī ti-yìntitam pu ní kaa gbèentí,

ti nyí ti nín ŋá-si ikpitee.

13 Ti-Dindaan, ti yīntiǹ-si,

ki nyáń a-boon,

ti gbēeǹ kaa ti nóó sii ti-Nimbɔtiu.

Ti pée sòoǹ min ní ti làá ŋá

kí wɔ́b́ bin kíǹee

kí já nì see ní.

Ti bɔ́ntí ti-pɔbilin kí sòoǹ

tinyimɔmbɔti ŋma ní.

14 An pu ní bi dū ibaamɔn

ki ŋá ŋkpaŋkpamboon

ní taa ŋūǹ kí bà deedee laŋki.

Di sá yii ibaamɔn kaa ti bí kubɔsoondiin,

ní kí sòoǹ tibɔti deedeeyee kaa ti bí ku-ni.

15 Tiŋman, ibaamɔn wáŋkì,

ní un là kí nīn yú deedeeyee, bi fúkuĺ-u.

Ti-Dindaan làá ŋá tiba

Ti-Dindaan wál̀ tíǹ kɔkɔ.

U ká yii ibaamɔn kpátam

kaa sá tiwammɔntiil.

16 U dáań ki ká yii báà uniseen kpá,

an ŋá-u bitii yii ubɔ kaa pée bíi ŋáań tiba.

An pu ní u lēē yii úǹ u-ba làá tɔ̄ u-tundi,

u-deedeeu làá tīī-u mpɔn ú ŋá míǹ.

17 U dū deedee ki pēeǹ kii dijanjabɔkutilee,

ki dū difiil ki cíkiǹ kii kijanjafuuliiyee.

U dū ipɔntoon bɔkutil ki pēeǹ,

ní ki dū ipoompoon ki bīiǹ kii dibɔkutipaaŋkaalee^b.

18 U làá téeǹ báà ŋma tin u máaǹee.

U-ŋuul sá ki tīī u-nannanliibi ní,

ní ditafadaaldi sá ki tīī bin kaa là u-bɔtee,

ki kpáaǹ gba ntimu mun nnyim māntìi túee.

19 Niinee, binib làá dāá fàŋkì ti-Dindaan yindi

doooo ŋwìiń jeetilaŋki,

ní kí dāá fàŋkì u-nyooti

doooo ŋwìiń nyalaŋki.

Di sá yii ti-Dindaan làá dāá dāan̄

kii mbun ŋun nyim pùub̀ mpɔn,

kubuŋkpaaŋŋu téekí-mèe ní.

20 Ti-Dindaan làá dāan̄ Siiyɔn tiŋkin,

kí fīī Isirayeel nibul poon

binib bin di fá bi-kpitiiyee^c.

Ti-Dindaan di lī míǹ.

21 Ní ti-Dindaan kútì ki lī yii: «Mpèé ŋun làá nīn bí man nì bi kansikinee sèé: <M-Fam bí ni-pu, m-nyɔɔbuŋŋi kā ni-nyɔkɔn. Ŋi làá nīn sá ki tīī ni nì ni-biyaamu nì ni-naantiibi ní kí yòon̄ kɔŋkɔnnee kí nīn cáa cá jaanjaan. M kpá kí fàtīí fōō-dì.> Man ni-Dindaan di lī míǹ.»