Dinyɔɔboobil din fáatì Unimbɔtee
58
1 Ti-Dindaan di bí-mi yii:Téeń mpɔn, taa mɔ̄tì a-ba pu!
Kúuǹ mpɔn kii dikantándee!
Tùkù m-nibul di-yìntitam,
tùkù Jaakɔb naantiibi bi-kpitii.
2 Kutaa kamaayee, bi nyàab̀-mi,
ní ki là kí béé m-saŋyi.
Bi bí kii ditimbundi din
ŋáań tin bí deedee
kaa féeń di-Nimbɔtiu marabee ní.
Bi là yii ḿ nīn sòoǹ tibɔti nì deedee,
ní ki là ḿ nīn pìlīǹ-bi.
3 Ama ní bi bí ki lì yii:
<Ba pu ní tí nīn bōob̀ kinyɔkɔ
ŋyunti ŋun ní sii kaa wāĺ-tee?
Ba pu ní tí sìntīǹ ti-ba taapu
ŋyunti ŋun ní sii kaa nyí
yii ti bíi ŋáań tibee?
Niinee ní m kíí yii:
Ni-nyɔɔboobil wiiŋŋuee,
ni gíti tūǹ atuun ŋin cāabìń-ni ipaatee,
ní ki sàantí ni-tɔntɔnliibi.
4 Ni bōob̀ kinyɔkɔ ní ki kpákà ki jáà,
ní ki gbáà tɔb aŋaŋkul.
Naa ŋūǹ kí bóob́ kinyɔkɔ míǹ
kí nīn kā ki cí yii
bí gbìl̄ ni-nyɔkɔ pu yilpu.
5 Dinyɔɔboobil din fáatì-mee
nín máaǹ kí nīn bí puee deeee?
Ni nín máaǹ kí sìntī ni-ba taapu puee deeee?
Ní nīn tīī diyil kii kukaluuee,
àá kí nīn pēē kpɔsata,
àá kí nīn dɔ̄ ŋfantam poon ní?
An ní ni yíì yii dinyɔɔboobilaaa,
ŋwiin ŋun fáatì man ni-Dindaaneeee?
6 Dinyɔɔboobil din man lèe sèé.
Á gbìntī binib bin kaa ŋá tiba bi bóob́-bi ikusakee,
kí cúú diwaŋgul din nyìkī bi-puee kí nyìkitī,
kí tīī bin bi wɔ́b́ee dibatɔl,
an dàkà yii kí kúntí tin kɔkɔ
nyìkī bi-pu baa tɔ́ bi-bee.
7 Sii nì un ŋkùm cááyee
ń yàkatī a-jinti kí jī,
kí fōō uwɔfi un kaa cáá
kikɔlaŋee a-dumpu.
Á tīī un kaa cáá kí pèen̄ee tiwan ú pèen̄.
Á taa fàtī a-boon kí tīī a-nabikia.
8 Niinee a-walfiŋu làá nyā kí páań kii ntaafaawìińee,
ní a-buuŋyi kaa làá pée sūŋkì ní kí kpú.
A-baamɔŋyi di làá nīn līī a-nyɔkɔpu,
ní ti-Dindaan nyooti ń nīn pá a-boon.
9 A yaa láa yíińee,
ti-Dindaan làá dāá kíí-si.
A yaa láa kúuǹee,
u làá dāá lì yii: «M sèé!»
A yaa kúntì a-tiŋkin kun nyìkī binib pu,
kaa ti dàkà bin kíǹee kiŋambiki ki lāā-bi,
kaa ti sòoǹ ki bíiĺ-bi,
10 ki yaa ŋmìntī a-ba
un ŋkùm cááyee ń ká kí jī,
ki cáa kpīintí binandambee,
a-walfiŋu làá nīn ŋmíntí dibɔmbɔndin,
dibɔmbɔndi làá nīn sá a-cee
kii ŋwiimpuee ní.
11 Ti-Dindaan di làá nīn pée kpòotī-si.
Báà kuteeun, u làá tīī-si á jī kí díkí
ní kí tīī a-kpabiŋ mpɔn.
A làá nīn sá kii bukpaa bun bi yāaǹ nnyim tiŋanee,
kii nnyimbul ŋun nyim kaa fóotí jaanjaanee.
12 A làá fàtīí mā adiin ŋin nìn lítèe.
A làá mā-ŋi kí tɔ́kɔń adinyee
ŋin bi nìn dūu fá abin abinee pu.
Bi làá dāá yíiń-si yii:
«Dinibul din fàtīi māā digundi,
laakin bátì bátì ki lítèe,
nì din ŋáŋkí kitiŋ sàmbiyaamuee.»
Ŋwiŋŋuŋfikaa ŋun di fáatì Unimbɔtee
13 «Tí dūú ŋmàntī tin bí nee:
Aa tūǹ ditundi diba ŋwiŋŋuŋfikaa dal,
kaa bàntī m-circir wiiŋŋu dal.
A yíì ŋwiŋŋuŋfikaa yii
<Mmɔn wiiŋŋu>,
ki yíì ti-Dindaan circir wiiŋŋu yii
<tinyool wiiŋŋu>,
ki tɔ́-ŋu kaa tūǹ diba, kaa bàntī
kaa gbíntí kubɔcaau pu ŋwiin gbanti dal.
14 Niinee man a-Dindaan làá kpántí a-pɔɔpindi.
M làá yàntī á còom̀ kí jītí
kitiŋ nee jooŋŋi pu kii ujajilee.
M làá yàntī á jī a-naanja Jaakɔb tiŋki difakal.»
Tiŋman man a-Dindaan di lī míǹ.