64
1 A bàà làá nīn bí kii ŋŋmiŋun wù kimɔgbaai
àá ki yàntī nnyim nùuǹee ní.
Niinee a bàà làá dàkà a-nannanliibi
dinimbɔticil din ní a sée.
A-nimbiinee, atimbun bàà làá nīn jìkì
2 a yaa láa ŋá titumbilindi
tin baa láá ká ki kée.
Tiŋman, a làá kpákatiń
ní ajoon ń cìŋkì a-nimbiin.
3 Dalba dalba ubɔ kaa láá gbìl̄ bi sòon̄,
àá ditafal gbìl̄,
àá dinimbil ká yii
sii boonee, unimbɔti ubɔ mun gíti ŋá
tin a ŋá nee ki tīī un máká u-pueea.
4 A túŋkí unil un tūǹ deedee tuuŋŋi nì mmɔnee,
nì binib bin téetí a-pu ki nóó a-saŋŋuee.
Ti-yìntitam puee, a gíí diŋuul.
Ama isan gbanti pu ní ti làá ká difiil.
5 Ti-kɔkɔ nìn sá kii unil un kɔ́ tijɔkɔndee,
ní ti-tummɔntiŋ kɔkɔ cáá titantan
kii ticaliŋkpun tin bi dūu pítì fatikuee.
Ti-kɔkɔ pée kūń kii tifaalee,
ní ti-kpitii yòontí-ti ki féeń kii kubuŋuee.
6 Báà ubɔ kaa ti pée yíì a-yindi,
ubɔ kaa fìntī kí dū u-ba kí nákáǹ-si.
Di sá yii a fātì a-boon ki tīī-ti,
ní ki dū-ti ki líiǹ ti-yìntitam.
7 Nì míǹ kɔkɔee, ti-Dindaan,
sii di sá ti-Baa.
Timbi sá kuyɔkɔu,
ní a sá uyɔɔmaati.
Sii di máń timbi kɔkɔ nì a-ŋaliib.
8 Ti-Dindaan, taa gíí diŋuul kí jītí mara pu.
Taa nín̄ téetí ti-kpitii pu kí nīn cá jaanjaan.
Ti gbàam̄-si, fàtīí kpèè-ti,
ti-kɔkɔ sá a-nibul ní.
9 Báà ubɔ kaa ti kóò a-circir timmun,
Siiyɔn jool kpántì kuteeu,
Jeerusaleem tiŋki kpántì adigbun ŋma.
10 Ti-circir Nimbɔtidiiku kun nìn ŋān̄,
ti-baabi nìn gà ilan ku-poon ki nyɔ́ŋkí-see,
bi sēē-ku ŋŋmi.
Tin kɔkɔ ti nìn néeńee
kpántì adigbun ŋma.
11 Ti-Dindaan, tin kɔkɔ pée jítì nee
kaa sòoǹ nì si tibaaa?
Mimmee a làá nīn kā ki ŋmí
kí sìntīǹ-ti taapu án gíti
lákatí mara puɔɔɔ?