Yeesaya 65

Ibɔsoon in bí ki dòońee

1 M yāntì bin kaa nìn bàlifī m-puee kíǹ ki bàlifī m-pu,

m yāntì bin kaa nìn nyàab̀-mee ká-mi.

Ditimbundi din kaa nìn yíì m-yindee,

m kíí-dì yii: «M sèé, m sèé!»

2 M tāntì m-ŋalii iwiin kɔkɔ ki túĺ

dinibul din sá pɔɔgaatee watil,

dinibul din nìn nóó nsan ŋun kaa ŋān̄,

ní ki ŋáań tin dì pée lèe.

3 An sá dinibul din di gbítí m-ŋuul kaa gbèentée ní.

Bi ŋáań saraabi akpaanni,

ki tùutī talaalub brikisib pu,

4 ki dɔ̀ akaakulin^a,

ki dɔ̀ titaŋkpanaakɔti poon,

ki ŋmóò tigbeetinan

ní tinan tin kɔ́ tijɔkɔndee

kā bi-kumbooŋi poon.

5 Bi lì yii:

«Nín̄ nyí nì a-ba, taa sútí kí pìl̄-mi,

an yaa sá fám a làá túń a-kpuulool,

di sá m dū m-ba ki sú Unimbɔti ní.»

M yaa kpēē ni-ŋáaǹtamee,

m-ŋuul fòol̄ ní lìblib

ní ki fòol̄ kaa gbèentí,

ní ki wù áli ŋwimmɔn.

6 Ama an ŋmàn̄ ki dɔ̄ m-nimbiin.

Maa làá nīn kā ki ŋmí,

see m téeǹ-bi bi-tuuŋŋi paati.

7 Man ni-Dindaan di lī yii:

m làá téeǹ nimbi ni-ba kpitii

nì ni-baabi yai dicilpu.

Bíǹ di nìn tùutī talaalub ajoon pu,

ní ki nìn sìí-mi ŋgbantamu pu.

M làá téeǹ-bi an nín máaǹ puee,

m làá ŋmàntī bi nín nìn ŋáaǹ puee

ní kí dāá téeǹ-bi míǹ deedee.

8 Ti-Dindaan di lī yii:

«Binib yaa ká fiinyi subiliŋ disakal bīń tiŋanee,

bi lì yii: <Taa bīil̀-dì, di làá tīī ndamɔntiim.>

Míǹ mbaantiim ní m làá ŋá m-tɔntɔnliibi pu.

Maa làá nàan̄ bi-kɔkɔ.

9 M làá yàntī nnibool ŋubɔ

ń nyā Jaakɔb maaliŋun.

M làá yàntī Juuda ń jī m-jooŋŋi pu difakal.

Bíǹ bin m lēēyee di làá nīn yì-ŋi,

m-tɔntɔnliibi di làá nīn kóò ŋi-pu.

10 M-nibul nì bin làá dāá fàtī bi-ba

kí túliń-mee ceeyee,

Saarɔn tantakal di làá dāá kpántí

kupikpaapɔɔu ki tīī bi-piii

ní Akɔɔr tantakal^b ń dāá kpántí

kunaabakau ki tīī bi-naai.

11 «Ama nimbi bin dū

man ni-Dindaan ki fée,

nimbi bin di súntì

m-circir jool puee,

ni tòotī diwaal Gaadi,

ki ŋmàlintí idafi

ki féeń diwaal Meenii.

12 Too, m làá dū-ni

kí líiǹ ni-nannanliibi.

Ni-kɔkɔ làá dāá gbàan̄

kitiŋ ní bí làntì-ni.

Di sá yii m yíiń ní naa kíí,

m sòon̄ ní naa pílifì.

Ni ŋá tin kaa ŋān̄ee m-cee,

ní ki lēē kí ŋá tin di kaa fáatiǹ-mee!

13 An puee man ni-Dindaan Unimbɔti

nín lī puee sɔ̀.

Ní kpèè, m-tɔntɔnliibi làá dāá ká kí jī

ama ní ŋkùm ń dāá cúú nimbi.

M-tɔntɔnliibi làá dāá ká kí nyɔ̀,

ama ní nnyinnyoo ń dāá kpɔ̀-ni.

M-tɔntɔnliibi làá dāá nīn fàal̀,

ama ní icoo ń dāá cúú-ni.

14 M-tɔntɔnliibi làá dāá nīn fàal̀

ní bi-pɔbiliŋ ń nīn pīiǹ,

ama nimbi làá dāá nīn sūǹ ki yáliŋkí

ní ni-pɔbiliŋ ń nīn bí kunimbaaun.

15 Bin m lēēyee,

bi làá dāá nīn cáá ni-yiŋŋi

ní ki tòó mbusu ki lì yii:

<Ti-Dindaan Unimbɔti ń yàntī á kpú

kii ŋmɔŋŋmɔkɔ àá waaniiyee>.

Ama an yaa sá m-tɔntɔnliibee,

diyindi diba ní bi làá nīn cáa yíì-bi.

16 Un kamaa yaa láa là kí mèè kí bìin̄

ubɔ pu kitiŋ gbanti puee,

udaan dāa dù ibaamɔn Nimbɔtiu

yindi ní kí mèè kí bìin̄.

Un kamaa yaa láa là kí pùtī kí pòon̄

kitiŋ gbanti puee,

udaan dāa dù ibaamɔn Nimbɔtiu

yindi ní kí pùtī kí pòon̄.»

Kutagbɔmpɔŋu nì kitimpɔŋ

Di sá yii binib làá dāá súntí

animbinaaman ŋin jítèe pu,

ŋi làá dāá wāŋkì m-nimbiin.

17 Di sá yii m làá fàtīí náań

kutagbɔmpɔŋu nì kitimpɔŋ^c.

Ubɔ kaa dāa gíti téetí tin jítèe pu,

unil kaa dāa gíti dàkafī tíǹ pu gba.

18 Ama án nīn mɔ̄ǹ-ni

ní nīn fàal̀ kaa gbèentí

tin m làá fàtīí náańee pu.

M làá náań Jeerusaleem tiŋki

kí nīn pée bí ifaal poon,

ní ki-nib ń nīn bí dipɔɔpindi poon.

19 Án làá mɔ̄ɔkiǹ-mi Jeerusaleem tiŋki pu

ní ḿ nīn bí dipɔɔpindin ki fàal̀ m-nibul pu.

Kí yòon̄ kí nīn cée,

baa làá ti gbìl̄ nsiim pu,

kaa làá ti gbìl̄ ibiil pu^d.

20 Baa làá ti ká mbipɔmu kaa yúntì ki kpíì,

kaa làá ti ká utikpil kaa púĺ ki bál̀ ki kpíì.

Un kaa pée yúntì pílpilee di sá un cáá abin dilaataal ki kpíìyee.

Unil yaa kaa láá bàn̄ abin dilaataal ní ki kpíìyee,

mimmee, bi tɔ́-u mbusu dee.

21 Bi làá dāá mā adiin

ní kí ká-ŋi kí kɔ́,

bi làá dāá cóoń fiinyi sufii

ní kí dāá ká i-biliŋ kí ŋmɔ́.

22 Baa làá ti mā adiin

kí yóoń biba ń dāá kɔ́,

kaa làá ti cóoń fiinyi sufii

biba ń dāá kìtī abil kí ŋmɔ́.

Di sá yii m-nibul làá dāá yúntí kii isufee.

Bin m lútèe làá dāá jī ditundi

din bi túńee pu^e.

23 Baa làá ti gīī digìńdi fám,

kaa làá ti màal̀ mbiyaamu kí tīī ŋkúm.

Di sá yii bíǹ di dāa sá

dinibul din boon ti-Dindaan bīiǹee,

bíǹ nì bi-biyaamu.

24 Baa láá yíiń-mi ní ḿ kíí-bi.

Bi dāa bíi sòoǹ kinyɔkɔ kaa láá ŋmíl̀

ní ḿ dāá gbìl̄ kí tīiǹ-bi.

25 Sinsiŋku nì kipibiki

di dāa kpáfí ki ŋmóò timool,

gbikinti dāa ŋmóò timool

kii unaa nín ŋmóò puee ní.

Ukoobu làá dāá nīn jīǹ ntam ní.

Tiweendi dāa gíti kpáaa,

dinàandi mun dāa gíti kpá

m-circir jool kɔkɔ pu.

Ti-Dindaan di lī míǹ.