Yeereemii 31

1 Ti-Dindaan bí yii: «Ŋyunti gbantee, man di làá dāá nīn sá Isirayeel dicaŋŋi kɔkɔ Nimbɔtiu, ní ŋí dāá nīn sá m-nibul.»

Isirayeel yab bin kíǹee gítintam

2 Ti-Dindaan nín sòon̄ puee sèé:

«Kuteeunee, m dàkā dinibul din

ŋmátì ki nyáń ŋkúm ŋaanee m-laŋŋaŋfitiiku.

M làá tīī Isirayeel diŋuŋfil dee.

3 Dinibulee nìn lì yii:

Ní m kíí-u yii: <Dooooyee ní m néeń-si

ní ki làá nīn pée néeń-si.

An pu ní m dū m-ba ki nákáǹ-si kiŋkiŋ.

4 Sii Isirayeel un m néeńee,

m làá fàtīí yòon̄-si kí yóoń,

ní bí fàtīí mā-si.

A làá fàtīí yòon̄ a-gaŋgammu nnyaammuee

kí cùú kūtì bin bí ki jīǹ jiŋaalee pu ní ŋɔ̄.

5 A làá dāá fàtīí cóoń fiinyi sufii

Samaarii jooŋŋi pu.

Bin cóoǹ-iee di làá dāá kìtī abil.

6 Di sá yii ŋwiin ŋubɔ bí ki dòoń

biciitiliibi làá dāá tɔ́kɔń

Eefiraayiim jooŋŋi pu kí téeń yii:

Yīkìmaan tí jɔ̄m̀ Siiyɔn <jool,

ti-Dindaan ti-Nimbɔtiu cee.>»

7 Ti-Dindaan nín sòon̄ puee sɔ̀.

Nín̄ tátímaan nì dipɔɔpindi kí tīī Isirayeel,

nín̄ fàal̀maan ditimbundi din tɔ́kɔ́ atimbun kɔkɔ puee.

Nín̄ gàmaan ilan mpɔn ki lì yii:

«Ti-Dindaan, fīī a-nibul,

fīī bin kíǹ Isirayeel tiŋkin ki bí dimaŋfalinee.»

8 Di sá yii m làá nyāntiń-bi ŋgan pú timmun kí gíiǹní,

ní kí kóoǹní-bi ntindandatimun kí kpāfì.

Bi-kansikinee, bijɔfub nì bideembi,

bipɔdambi nì bimatimpɔmbi làá nīn bí.

An dāa sá dinikitikpaandi di làá fàtīí gítiń.

9 Bi fàtīi gítiń ki sūǹ,

ní m cēentí-bi ki ŋmēentí-bi.

M làá dāá cáá-bi kí cùnnì ibun in pùub̀ee ni.

M làá dāá dū-bi kí dī nsan ŋun tèen̄ baa làá gbéetée pu.

Di sá yii m sá kii ubaatee ní ki tīī Isirayeel,

ní Eefiraayiim sá m-jipɔŋkpiliu.

10 Nimbi atimbun, pīlifìmaan ti-Dindaan nyɔɔbundi.

Ní cáá-dì kí nàatī ntimu mun dátì

nnyim māntìi tú-muee ni.

Ní lì yii:

«Ti-Dindaan nìn jìn̄ Isirayeel yab bi yàl̄ ki gbí an kɔkɔ.

Kɔŋkɔnnee u kóoǹ-bi ki kpáfì,

ki wúń bi-pu kii upikpaal nín wúǹ u-piii pu puee.»

11 Di sá yii ti-Dindaan fīī Isirayeel yab,

u nyántì-bi unannanli un pɔ̄ɔǹ-bee ŋaan.

12 Bi làá dāá bàń Siiyɔn gbantaŋki pu

ki kūuntí dipɔɔpindi kuŋkuuntii.

Bi fāā mɔ̀ɔɔ ki cá ti-Dindaan wammɔntiiti cee,

an dàkà yii bilee nì ndapɔm nì ŋkpam

nì ipii nì iŋoobu nì inaa.

Bi làá dāá nīn bí kii bukpaa

bun bi yāaǹ nnyim tiŋanee ní.

Bi-pɔŋŋu pée gíti kpá kí bàtī.

13 Niinee bisapɔmbi dāa ŋōō nì dipɔɔpindi

ní binaacimpɔmbi nì bijaŋkpilib fàal̀ dicilpu.

M làá dāá yàntī bi-nimbaaku ń kpántí-bi jiŋaal,

m làá ŋméeǹ-bi bi-nimbinaamandi poon,

ní kí yàntī bi-pɔbil ń sɔ̀ŋkì.

14 M làá dāá tīī bisaraaŋaliibi

tinan tin cáá ŋkpamee tikpil.

M làá dāá gbéeǹ m-nibul tiwammɔntiil,

ti-Dindaan di lī míǹ.

15 Ti-Dindaan nín sòon̄ puee sèé:

«Bi gbìl̀ Raama tiŋkin^a dituweel nì nsiim pu.

An sá Raaseel di bíi sūǹ u-biyaamu pu.

Waa kíí ubɔ ń ŋméeǹ-u,

di sá yii muaa ti bí.»

16 Ti-Dindaan nín sòon̄ puee sɔ̀.

Taa ti sɔ̄ kí yīkintì,

pítí a-nyinnyim!

Man ni-Dindaan di sòon̄ míǹ,

m làá pà a-gìńdi paati.

A-biyaamu làá nyānní

binannanliibi tiŋkin kí gítiń.

17 Ti-Dindaan bí yii:

«Dimákal bí ki tīī a-naantiibi,

a-biyaamu làá fàtīí gítiń bi-tiŋkin.»

18 M gbìl̄ Eefiraayiim yab yáliŋkí ki lì yii:

«Ti-Dindaan, a dáaĺ ti-tafal ŋkpitim pu

kii bi nín tìŋkī dinajapɔmbil din bɔti pɔ̄ɔ̄yee puee.

Ama á fàtīí gíiǹní-ti a-cee

tí bàà fàtīí gítiń a-cee tiŋman pu.

Di sá yii sii ti-Dindaan di sá ti-Nimbɔtiu.

19 Ti nìn fātì ti-boon ki tīī-si,

ama kɔŋkɔnnee, ti kpántì ti-ba.

Ti béè ti-yìntitam,

ní ki fátí ti-biŋŋi ki yáliŋkí.

Ti fá ti-jilmau ní icoo cúú-ti gbòooo.

Tiŋman ti ŋá tin kaa kítèe ti-naacimpɔntin,

ní ki bíi fòol̄ an paati.

20 Eefiraayiim di sá m-bineeŋkaaki,

m néeń-u ki jítiǹ bin kɔkɔ kíǹee.

An pu ní ŋyunti ŋun kamaa

m yaa bíi sòoǹ ki kù u-bɔtee,

m gbíntìi dàkafī u-pu.

M-pɔ̀ti kaa fù u-pu.

Maa pée ŋūǹ kí gbèen̄ kí taa sɔ̄ u-saai.»

Ti-Dindaan di sòon̄ míǹ^b.

21 Cóoń kikpaanyɔkɔ taŋkpeeŋi kí nóó nì a-daanti,

cóoń tidaandi nsan pu.

Nín̄ nyí nì a-ba nì didandi din a dēe,

nì nsan ŋun a cōom̀ee.

Isirayeel un bí kii usapɔɔnee, fàtīí gítiń,

fàtīí gítiń ntimu mun sá a-yaka nee poon!

Fàtīí gítiń a-timmun.

22 Usapɔɔn un gáatèe,

a làá nīn sáń ki lábití yéè kí tin sāā ŋyunti ŋulɔŋu ní?

Di sá yii ti-Dindaan náań tiwampɔn tiba kitiŋ pu:

Unimpu di làá nīn kíǹ ki mɔ̀nnì uninja.

Bi làá fàtīi mā Juuda nì Jeerusaleem timmu

23 Ti-Dindaan Mpɔŋkɔdaan Isirayeel Nimbɔtiu nín sòon̄ puee sèé: «M yaa láa fātìi gíiǹní bin bínní kuyuŋuee, bi làá dāá tí lì Juuda tiŋki nì ki-timmu pu yii:

«<Ti-Dindaan ń bìin̄ a-boon,

sii Siiyɔn gbantaŋki kin bí circiree,

laakin difiil bée.>

24 «Niinee Juuda yab bin kóò tisatinee nì bin kóò ntimunee, bikpaabi nì biwaŋkpaaliibi kɔkɔ làá dāá nīn kóò kitiŋ nee pu dicilpu. 25 M làá dāá tīī bin gīīyee nnyim bí nyɔ̀ ní kí tīī bin kaa ti cáá mpɔnee kunyannyaau. 26 Míǹ boonee ní m fīntì ní ki ká yii ŋgeem min m gèen̄ee mɔ̄.

27 «Ti-Dindaan nín sòon̄ puee sɔ̀. Iwiin iba bí ki dòoń, m làá dāá yàntī binib nì tiwaŋkuti ń kpátí kí gbí Isirayeel nì Juuda beeŋin kii iwamboolee. 28 Kii m nín tāā ki bíikì bi-pu, ki fùkū, ki gāatì ki lúkú, ki kpéelikì, ki nāaǹ ní ki ŋá tikpitil puee, míǹ mbaantiim ní m làá ŋá kí tīī-bi bí fàtīí mā kí cóoń, man bi-Dindaan di lī míǹ. 29 Ŋyunti gbantee, ubɔ kaa dāa gíti lì yii:

<Bibaatiibi ŋmɔ́ asubigaan,

ama mbiyaamu nyiŋŋi di nyāŋfì^c.>

30 Un di yaa ŋmɔ́ asubigaanee, udaan nyiŋŋi di làá nyàŋfì. Un di yaa ŋá ikpitee, udaan di kúù.»

31 «Ti-Dindaan di lī yii iwiin iba bí ki dòoń, m làá fàtīí pòon̄ Isirayeel nì Juuda yab dipoompɔndi^d. 32 Díǹ kaa dāa sá kii din m nìn pōoǹ bi-naanjab ŋwiin ŋun m nìn cúú bi-ŋal ki nyántì Eejipiti tiŋkin kuyuŋunee. Nì min kɔkɔ man di nìn sá bi-Dindaanee, bi nìn kpītì dipoondi gbanti, ti-Dindaan di lī míǹ.» 33 Ti-Dindaan bí yii: «Dipoompɔndi din m làá dāá líí Isirayeel yab ŋwiin gbantee sɔ̀. M làá dāá dū m-marab kí ŋmà kí ŋá bi-landɔkɔyin, kí ŋmà-bi kí ŋá bi-pɔbilin. Man làá dāá nīn sá bi-Nimbɔtiu ní bíǹ ń nīn sá m-nibul. 34 Ubɔ kaa dāa gíti dàkà u-juti àá u-nabiki ú nīn nyí ti-Dindaan. Di sá yii kí yòon̄ bi-kansikin mbiyaawaamu kí tin cáá sāā bikpaambee, báà ŋma làá dāá béé-mi, man ni-Dindaan di lī míǹ. Di sá yii m làá dāá dū bi-kpitii kí pɔ̄-bi ní kaa làá ti téetí bi-yìntitam pu^e.

35 Ŋma di dū ŋwìiń ki kāaǹ ŋú nīn ŋmíntí ŋwiimpu ní?

Ŋma di tīī uŋmal nì iŋmalbijaa mara í nīn ŋmíntí kunyeeu ní?

Ŋma di kùtī tiŋku ní ki yàntī

u-nyiŋgbanti yíkí ki gà kuwoou ní?

An sá ti-Dindaan Mpɔŋkɔdaan.

U-yindi dee.»

36 Ti-Dindaan bí yii:

«Daliŋkin ní m yaa kíí yii

marab bin kpòotī duulinya nee kaa ti bée,

mimmee m kíí yii

Isirayeel yab kɔkɔ mun

kaa ti kpáfì ki ŋá ditimbundi dee!»

37 Ti-Dindaan bí yii:

«Unil yaa ŋūǹ kí ŋmàntī kutagbɔŋu kun dàn̄ee,

ki yaa tí ŋūǹ kí béé kitiŋ nyóoŋŋuee,

mimmee ma mun làá dū Isirayeel yab kɔkɔ kí fá,

ikpiti in kɔkɔ bi ŋée pu,

ti-Dindaan di lī míǹ.»

38 Ti-Dindaan bí yii: «Iwiin bí ki dòoń m làá fàtīí mā Jeerusaleem kí tīī m-ba, kí yòon̄ Ananeeyeel difɔkɔku Dikpindi punyɔkɔki. 39 Bi làá dāá dū ŋŋmiiŋmantikaa kí tɔ̄ kí ŋmàntī kitiŋ kpaanyɔkɔ kí nīn cá Gareeb gbantaŋki, ní kí yòon̄ niin kí pɔ́ĺ kí nīn cá Goowa tiŋki watil pú. 40 Bi làá dāá dū anikpil nì ŋfantam tantakal nì mpaan ŋun kɔkɔ dɔ̄ kí tin sāā Seedrɔn buŋŋuee nì Dikpindi punyɔkɔki kin sá Itaamu punyɔkɔki ŋwìiń nyalaŋki púee kí sú-mi. Ubɔ kaa dāa gíti fùkù tiba ki dāa nín bíiĺ tiba mpaan gbanti pu.»