Yeereemii 32

Yeereemii dá bukpaa

1 Juuda bɔtiu Seedeesiyasi nín kāl̀ dibeel abin disaalaatiil poonee, Babiloon bɔtiu Neebukadineesaar úǹ nìn ŋá abin saalku nì ata dee dibeel pu. Ŋyunti gbanti ní ti-Dindaan sòon̄ nì Yeereemii. 2 Ŋyunti gbantee Babiloon janjaliibi nìn māntìi tú Jeerusaleem tiŋki kí já nì kì. Bi nìn cúú Unimbɔti bɔnaatiliu Yeereemii ki pīiǹ kudii bijanjaliibi dumpu, Juuda bɔtiu beecindin. 3 Juuda bɔtiu Seedeesiyasi di nìn yāntì bi pīiǹ-u niin. Di sá yii u nìn wòon̄ Yeereemii u nín nāatì ti-Dindaan bɔti yii: «M làá dū Jeerusaleem tiŋki kí ŋá Babiloon bɔtiu ŋaan ú fōō-kèe. 4 Juuda bɔtiu Seedeesiyasi kaa làá ŋmátí kí nyā Babiloon yab ŋaan, di sá yii m lēē kí dū-u kí ŋá Babiloon bɔtiu ŋaan. U làá cùú yūĺ Neebukadineesaar nimbiin ní bí nīn sòoǹ ki kpèé tɔb. 5 Bi làá cúú Seedeesiyasi kí cùnnì Babiloon tiŋkin, ní ú nīn bí niin kí tin sāā ŋyunti ŋun ní m làá dāá kpèè u-bɔtee, ti-Dindaan di lī míǹ. Ni yaa gbíntìi bíi jáà nì Babiloon yab, naa làá ŋmā-bi.»

6 Yeereemii bí yii: «Ti-Dindaan nín sòon̄ nì mi puee sèé: 7 <A-wee Anameeyeel, Saaluum jipɔɔn làá dāan̄ a-cee kí bí-si yii á dā u-kpaabu bun bí Anatootee. Di sá yii sii nì u di pēē. An puee, sii di cáá nsan kí dā bukpaa gbanti^a.>»

8 Kii ti-Dindaan nín sòon̄ nì mi puee, m-wee Anameeyeel nìn lafun dɔ́miń m-cee bijanjaliibi mɔŋkiŋu ki bí-mi yii: «Dā m-kpaabu bun bí Anatooti, Beenjameen tiŋkinee. Di sá yii man nì sii di pēē. Míǹ puee, mara poonee, sii di cáá nsan kí dā-bu.» Niin ní m béè yii ti-Dindaan di sòon̄ nì mi.

9 Niinee ní m dá m-wee Anameeyeel kpaabu bun bí Anatooti tiŋkinee, ki pàn̄-u bukpaayee daaku nín sá puee, animbil jitɔmbi saalku nì bili. 10 Ní m ŋá kugbɔŋu kun dàkà yii u nyáfiǹ-mi u-kpaabuee mili pu. M-seeradambi nimbiinee, ní m kpáb́ kugbɔŋu kun pu m nyīī m-jaliikee, ní ki ŋmāntì animbil saniya pu. 11 Boonee ní m fōō kugbɔŋu kun dàkà yii m dá bukpaayee ki kpáb́ kii mara nín bí yii ḿ ŋá puee nì kun baa kpáb́ee. 12 M nìn dū tigbɔnliitilee ki tīī Neeriya jipɔɔn Baruuki, Maaseeyawuu naantiiu^b. M-wee Anameeyeel nì biseeradambi bin nìn nyīī ŋŋal kugbɔŋuee puee, nì Juuda yab bin kɔkɔ nìn bí bijanjaliibi mɔŋkiŋuee nìn bí. 13 Ní m tùkū Baruuki tibɔti nee samaa kɔkɔ nimbiin yii: 14 «Ti-Dindaan Mpɔŋkɔdaan, Isirayeel Nimbɔtiu nín lī puee sèé: <Yòon̄ tigbɔnliitil tin dàkà yii m dá bukpaayee, kun pu m nyīī ŋŋal ki kpáb́ee nì kun maa kpáb́ee. Á dū-tì kí ŋá diboolin kí kpāafì an nīn bí kí yúntí.>»

15 «Ti-Dindaan Mpɔŋkɔdaan Isirayeel Nimbɔtiu nín lī puee sèé: <Ŋwiin bí ki dòoń, bi làá dāá fàtīí dā kitiŋ nee poon adiin nì akpaan nì fiinyi kpaaŋŋi.>»

Yeereemii wimmeem

16 M nín dū tigbɔn gbanti ki tīī Neeriya jipɔɔn Baruuki ki dóòyee ní m mēē ti-Dindaan yii: 17 «Too, ti-Dindaan, sii di dū a-pɔŋkpaaŋŋu nì a-kpabil ki náań kutagbɔŋu nì kitiŋ. Tiba kaa pɔ̄ɔ̄ a-cee. 18 Sii di dàkà binib kulaŋŋaŋfitiiu kí tin sāā anaantitɔntɔkɔ kutuku pu. Ama bibaatiibi yaa yīntèe, bi-biyaamu tafal ní a dátí kí tɔ̀ ipɔntoon^c. A sá Unimbɔtikpaan, ní ki cáá mpɔn. Sii yindi di sá ti-Dindaan Mpɔŋkɔdaan. 19 A nín lēē kí ŋá puee sá ŋkpaami ní a cáá mpɔn kí ŋá míǹ. A kpèé ki wāĺ tin kɔkɔ nnibiyaamu bí ki ŋáańee. A pà báà ŋma paati ki nóó nì u-bimbim nì u-tuuŋŋi nín sá puee ní.

20 «Sii di nìn túń atuŋkpaan nì maamaacib Eejipiti tiŋkin. Áli nì díǹ, a dàkà un ní a sée Isirayeel nibul nì inifunaan kɔkɔ kansikin, kii an nín bí pu díǹ nee ní. 21 A nìn túń atuŋkpaan nì maamaacib ki dàkā mpɔŋkpaan nì dikpabil ki nyántì a-nibul Isirayeel Eejipiti tiŋkin. 22 A nìn pūtì ki pōoǹ ti-naanjab yii a làá dū kitiŋ kin poon nnaabiim nì tisiil pùub̀ee kí tīī-bi ní a lafun ŋá míǹ. 23 Bi nìn lafun kɔ́ ki fōō kitiŋ gbanti ki kāl̀. Ama baa pílifiǹ-si, kaa nóó a-dàkatam, kaa tɔ́ a-marab. Niinee ní a yāntì inaabu in kɔkɔ bíi bàń-ti díǹ nee jéetì bi-pu.

24 «Kɔŋkɔnnee, Babiloon yab dɔ́miń ki gūū kitiŋee ki bíl̀ ataŋkpuku kí fōō-kì. Bi bíi jáà nì kì ní kì làá pée kɔ́ bi-ŋaan ní kujaau nì ŋkùm nì bìlbil kúm pu. Tin a nìn sòon̄ ki síiǹee bāań ní sii a-ba wāĺ míǹ. 25 Too, Jeerusaleem làá kɔ́ bi-ŋaan dee! Kin ba pu ní a tīī-mi mara yii ḿ dā bukpaa Anatooti kí pà biseeradambi nimbiin?»

Ti-Dindaan kíí Yeereemii tibɔti

26 Ní ti-Dindaan kíí Yeereemii yii: 27 «Man di sá tin kɔkɔ cáá kufoouee Nimbɔtiu. Tiba bí ki pɔ̄ɔ̄ ki jítiǹ-maaa? 28 An pu ní man ni-Dindaan bí yii m làá dū kitiŋ nee kí ŋá Babiloon bɔtiu Neebukadineesaar nì u-janjaliibi ŋaan. U làá fōō-kì^d. 29 Babiloon yab bin bíi jáà nì kitiŋ nee làá kɔ́ ki-ni, kí nàan̄-kì ní kí tūū-kì ŋŋmi. Adiin aba yilpu bi nín bɔ̀b̄ puee, binib tūutì talaalub ki tīī diwaal Baal ní ki fá awaa aba mun ndaam. Bi ŋá míǹ ki gbítì m-ŋuul. Too, Babiloon yab làá tūū adiin gbanti ŋŋmi.

30 «Di sá doooo kutaafaau ní Isirayeel yab nì Juuda yab bí ki ŋáań tin kaa ŋān̄ee m-nimbiin. Tiŋman, tin kɔkɔ Isirayeel yab ŋáańee gbítí m-ŋuul ní, ti-Dindaan di lī míǹ. 31 Di sá yii doooo bi nín máń kitiŋ nee ki dāa sāā díǹ nee, ki-nib pée gbítí m-ŋuul ní ki yàntī m fòol̄ mbum. An pu ní maa ti là kí wāl̀-bi m-nimbiin. 32 Isirayeel yab nì Juuda yab ŋá ikpiti tikpil ki gbítì m-ŋuul, bíǹ nì bi-bɔtiibi nì bi-kpilib nì bi-saraaŋaliibi nì bi-bɔnaatiliibi nì bin kóò Jeerusaleem tiŋkin nì Juuda timmu mun kíǹee poonee. 33 An bàà sá bí fàtī bi-nimbiin kí túĺ-mee, bi fātì bi-boon ki tīī-mi. Nì min kamaa m yōoǹ ŋyunti ki dàkā-bee, baa pílifì kaa dū m-saŋkii ki túń ditundi. 34 Bi cáá bi-waaŋi ŋin sá ntimbiil tuuŋŋee ki kɔ́ǹ Kudii kun bi dūu sú-mee poon ki kɔ́ǹ-ku tijɔkɔndi. 35 Inɔɔm tantakalinee, bi ŋātì mpaan kí nīn tòotī diwaal Baal. Niin ní bi dū bi-jipɔmbi nì bi-bisalib ki tūū ŋŋmi ki tīī diwaal Mooleeki. Maa pée tīī-bi dalba dalba mara bí ŋá míǹ, kaa kpáàa dākafì míǹ ŋwindal. Bi nín ŋá ntimbiil tuuŋŋi gbantee, bi téé Juuda yab ki yāntì bi ŋá ikpiti.

36 «Ni sòoǹ Jeerusaleem tiŋki pu yii: <Kujaau nì ŋkùm nì bìlbil kúm di dū-kì ki ŋá Babiloon bɔtiu ŋaan.> Kɔŋkɔnnee, man ni-Dindaan Mpɔŋkɔdaan, Isirayeel Nimbɔtiu nín sòon̄ kitiŋ nee pu puee sɔ̀. 37 M nìn gíí bi-pu diŋuul ki fōō bi-pu mbum ŋkpitim pu. M nìn jìn̄-bi bi yàl̄ ki kɔ́ ntimu kɔkɔn. Nì míǹ kɔkɔee, m làá kóoǹ-bi kí kpāfì doo bí nīn bí ŋgbansɔŋfin. 38 Niinee bi làá fàtīí nīn sá man nibul, ní man ń nīn sá bi-Nimbɔtiu. 39 M làá dāá tīī-bi dipɔbibaantiil nì nlandɔkɔbaanti bí ŋmā kí nīn tɔ́-mi ki cá jaanjaan. Niinee bi làá nīn bí mmɔnni, bi nì bi-biyaamu. 40 M làá ŋá mpèé nì bi kí nīn cá jaanjaan. M làá nīn pée nóó-bi kí ŋá-bi tiŋan kí taa gbèen̄. Mimmee, bi làá nīn tɔ́-mi ní kaa ti làá fàtī bi-boon kí tīī-mi. 41 Án làá dāá nīn mɔ̄ǹ-mi ḿ ŋá-bi tiŋan. M làá dāá kàan̄-bi kitiŋ nee poon katanjoolii nì m-pɔbil kɔkɔ nì m-naŋki kɔkɔ.»

42 Ti-Dindaan gíti sòon̄ yii: «Man di cáań nnaabukpaan nee ki tɔ́ Juuda nibul pu. Man ubaantee di làá tí cáań nnaam min m pōoǹ-bee kí tīī-bi. 43 Binib lì yii: <Bi dū kitiŋ nee ki ŋá Babiloon yab ŋaan. Kɔŋkɔnnee kì kpántì kuteeu ní binib nì tiwaŋkuti kaa ti bí ki-pu. Ama kitiŋ nee poonee, binib làá dāá fàtīí dā akpaan. 44 Tiŋman bi làá dāá fàtīí dā akpaan Beenjameen tiŋkin nì Jeerusaleem tiŋki kpaanceetii nì Juuda timmun nì ntimu mun bí ajoon puee nì mun bí Seefeelaayee nì mun bí Neegeebee. Binib làá dāá ŋmà tigbɔn tin dàkà yii bi nyáfì bi-kpaatantee ní kí dāá dū kijalii kí nyīī ti-pu ŋŋal ní kí kpáb́ biseeradambi nimbiin. Di sá yii m làá fàtīí gíiǹní bi-yab bin bi cúú ki cūnnì kuyuŋuee», ti-Dindaan di lī míǹ.