Yeereemii 33

Ti-Dindaan fātìi pōoǹ Jeerusaleem ipoon

1 Yeereemii nìn gbíntìi dáá pīī kudii bijanjaliibi bin cí ubɔtee dumpu. Ti-Dindaan nìn gíti sòon̄ nì u yii: 2 «Ti-Dindaan un di ŋá tin bí nee kɔkɔee, ti-Dindaan un di bɔ́ntì-tì ki yāntì tì bée nín sòon̄ puee sɔ̀. Úǹ ní bi yíì ti-Dindaan. 3 Kúuǹ ki yíiń-mi, m làá kíí-si. M làá lēē tiwaŋkpaandi tin bí dibalin aa nyée kí dàkà-si. 4 Ti-Dindaan Isirayeel Nimbɔtiu nín sòon̄ tin kitiŋ nee diiŋŋi nì Juuda bɔtiibi beeciŋŋi nì ataŋkpakpuku ŋin bi bíl̀ kitiŋ gundi boon nì kitàataajiki pu puee sɔ̀. 5 Bi yaa bíi jáà nì Babiloon yabee, bi bíi gbēentí adiin anikpil ŋin m làá kpɔ̀ m-ŋuul nì m-bum poonee dee. Di sá yii Jeerusaleem yab túń atuŋkpiti tikpil, an pu ní m fātì m-boon ki tīī kitiŋ nee.

6 «Ama nì míǹ kɔkɔ, m làá dāá cáaǹ-kì kí pɔ̄ɔkì. M làá cáaǹ-kì ní ki-nib ń ká dipɔɔsɔŋkil kí nīn bí ŋgbansɔŋfin. 7 M làá fàtīí gíiǹní Juuda nì Isirayeel yab bin bi nìn cúú ki cūnnì kuyuŋuee, m làá fàtīí gíiǹ-bi mpaan ŋun pu bi nìn bí dooooyee. 8 M làá dāá ŋá-bi circir kí nyāntí ikpiti in kɔkɔ bi ŋée. Bi nín jáń nì mi puee, m làá dūú pɔ̄-bi. 9 An làá dāá nīn mɔ̄ǹ-mi ḿ yíiń Jeerusaleem yindi. Kitiŋ gbanti làá dāá tīī-mi jilma ní ḿ dāá nīn fàal̀ ki-pu kitiŋ pu nibuliŋ kɔkɔ nimbiin. Anibul gbanti kɔkɔ làá dāá béé tiŋan tin kɔkɔ m làá dāá ŋá-kèe. Bi yaa láa ká nnaam nì ŋgbansɔŋfi ŋun kɔkɔ m làá tīī-kèe, bi làá dāá nīn jìkì nì kufaaŋŋu ní kí kɔ́ dinyoondin.»

10 Ti-Dindaan nín sòon̄ puee sèé: «Nimbi Juuda yab, ni lì yii: <Kitiŋ nee kpántì adigbun binib nì tiwaŋkuti kaa ti kóò ki-pu.> Tiŋman, Juuda timmu nì Jeerusaleem daŋŋi kíǹ ki dɔ̄ fám binib nì tiwaŋkuti kaa ti kóò ntimu gbantin. Too, kitiŋ nee poonee, bi làá fàtīí gbìl̄ 11 jiŋaal wooku nì dipɔɔpindi laŋyi nì animpucaŋgbiil pu. Bi làá dāá fàtīí tí gbìl̄ bin cāabìń inyɔŋki saraabi kunimbɔtidiinee laŋyi pu ki lì yii:

<Tí nyɔ̄ŋkìmaan ti-Dindaan Mpɔŋkɔdaan,

di sá yii u ŋān̄ ní u-neendi bí ki cá jaanjaan.>

Di sá yii m làá fàtīí ŋāŋkì kitiŋ nee ní kí fàtīí gítí kii kì nín nìn bí pu dooooyee, ti-Dindaan di lī míǹ.»

12 Ti-Dindaan Mpɔŋkɔdaan nín gíti sòon̄ puee sèé: «Kitiŋ kin kpántì adigbun binib nì tiwaŋkuti kaa ti kóò ki-pu nì ki-timmu kɔkɔ poonee, bi làá dāá gíti ká kunaakpaapɔɔu laakin bipikpaaliibi làá yàntī bi-piii nì bi-ŋoobui ń nīn dɔ̀ ki ŋùŋfēe. 13 Dijool pu timmun nì Seefeelaa nì Neegeeb nì Beenjameen timmu nì Jeerusaleem kpaanceetii nì Juuda timmunee, ipii nì iŋoobu làá dāá tí jītí un kàaǹ-iee nimbiin», ti-Dindaan di lī míǹ.

Tin Unimbɔti pōoǹee, u làá ŋá míǹ

14 «Ti-Dindaan nín sòon̄ puee sɔ̀. Iwiin iba bí ki dòoń, m nín pōoǹ Isirayeel nì Juuda yab nibul kí ŋá-bi tiŋan tiŋyee, m làá ŋá míǹ. 15 Ŋyunti gbanti yaa láa sāāyee, m làá yàntī bí màal̀ Daafiidi naantiiu tiŋman pu yɔu. Úǹ di làá dāá yàntī binib ń ŋá tin dɔ̄ nsanee nì tin bí deedeeyee kitiŋ nee pu. 16 Iwiin gbantinee Juuda beel làá dāá ká difiil ní Jeerusaleem beel ń dāá nīn bí dipɔɔsɔŋkilin. Bi làá nīn yíì Jeerusaleem yii: <Ti-Dindaan ti-baamɔŋŋu.>»

17 Ti-Dindaan nín sòon̄ puee sèé: «Daafiidi maaliŋu poon kpá kí lóó un làá kàl̄ Isirayeel tiŋki pu dibeelee. 18 Míǹ mbaantiim Leefii yab bin sá bisaraaŋaliibee kpá kí lóó binib bin làá nīn yú m-nimbiin ki ŋáań bisaraawɔkaabi, ki tùutī saraabi ki ŋáań baabadal saraabee.»

19 Ti-Dindaan sòon̄ nì Yeereemii yii: 20 «Man ni-Dindaan nín sòon̄ puee sèé: <Ni ŋūǹ kí kpìtī mpèé ŋun di bí man nì ŋwiimpu nì kunyeeu kansikineeee? Ni ŋūǹ kí pìin̄ nsan ŋwiimpu ń taa páań kunyeeu boon, àá kunyeeu ń taa páań ŋwiimpu boonaaa? 21 Míǹ mbaantiim ní mpèé ŋun bí man nì m-tɔntɔnliu Daafiidi kansikinee kaa làá kpìtī. An pu ní u-naantiibi kansikin ubɔ làá nīn pée sá ubɔti Jeerusaleem tiŋkin. Míǹ mbaantiim ní bisaraaŋaliibi làá nīn pée bí Leefii dicaŋkun ki tūǹ m-tundi. Ubɔ kaa làá pée ŋmā kí pìin̄ nsan míǹ ń taa ŋá. 22 Unil kaa ŋūǹ kí kàaǹ iŋmalbijaa in bí kutaa puee, kaa ŋūǹ kí kàaǹ tiŋku gbandi bul. Míǹ mbaantiim ní m làá bùtī Daafiidi maaliŋun yab nì Leefii maaliŋun bin sá m-tɔntɔnliibee.»

23 Ti-Dindaan sòon̄ nì Yeereemii yii: 24 «Aa gbìl̀ binib nín sòoǹ pueeee? Bi lì yii m dū Isirayeel nì Juuda, adican ali ŋin m lēēyee ki fá. Bi sòoǹ mimmee ní ki kpèé m-nibul fám. Bíǹ ceeyee, ŋaa ti kpáàa sá ditimbundi gba. 25 Tin man ni-Dindaan lēe sɔ̀. M ŋá mpèé nì ŋwiimpu nì kunyeeu. M síiǹ marab bin kpòotī kutagbɔŋu nì kitiŋee. 26 Mimmee m ŋūǹ kí dū Jaakɔb dicaŋkun yab nì m-tɔntɔnliu Daafiidi maaliŋun yab kí fáaa? M ŋūǹ kí yíí kí taa lēē bin làá nīn kpòotī Abraam nì Isaaki nì Jaakɔb nibuleeee?

«Aayee, kpataaa! M làá sɔ̄ bi-saai ní kí fàtīí yàntī án bútí-bi.»