Yeereemii 39

1 Ubɔti Seedeesiyasi nín kpántì Juuda bɔtiu abin awa ŋmasaalaatiu poon ní Babiloon bɔtiu Neebukadineesaar nì u-janjaliibi kɔkɔ dɔ́miń ki māntìi tú Jeerusaleem tiŋki kí já nì kì. 2 Abin ali boon uŋmananaati poon iwiin iwa dal ní Babiloon yab sāā ki cíl̀ digundi din bi máń ki tú Jeerusaleem tiŋkee. 3 Niinee ní Babiloon bɔtiu janjakpilib kɔkɔ kɔ́ Jeerusaleem tiŋkin ní ki cūtìi kāl̀ Kansikin punyɔkɔki poon. Ujanjakpil Neergaal-Sareeseer nì ubɔti tɔntɔŋkpilib Samgaar-Neeboo nì Sarseekiim nì Babiloon bɔtiu janjakpilib bin kíǹee kɔkɔ nìn bí poon.

4 Ŋyunti ŋun Juuda bɔtiu Seedeesiyasi nì u-janjaliibi ká-bee ní bi dū itaaci. Kunyeeu ní bi nìn sáǹ ki nyáń Jeerusaleem tiŋkin. Bi nìn dūu dī ubɔti kpaabun ki tin nyáń kipunyɔkɔ kin bí agun ali kansikinee ní ki fōō nsan ŋun cá Jɔɔdan tantakalinee. 5 Ama Babiloon janjaliibi nìn kùl̄ ki bīiǹ bi-boon, ní ki tin cúú Seedeesiyasi Jeeriikoo tantakalin. Bi nìn cáá-u ki cūnnì Babiloon bɔtiu Neebukadineesaar cee, Riibila, Amati tiŋkin. Niin ní Neebukadineesaar sòon̄ Seedeesiyasi bɔti. 6 Riibila niin ní Babiloon bɔtiu kūū Seedeesiyasi jipɔmbi bi-baa nimbilaaliyin ki kpáaǹ Juuda yab bɔtibiliŋ kɔkɔ. 7 Míǹ boonee ní bi sāā ki cɔ́tì Seedeesiyasi nimbiliŋ, ní ki dū tasa kúti kusakai ki bóob́-u ki cáá-u ki cūnnì Babiloon tiŋkin.

8 Ní Babiloon yab tūū dibeecindi nì binib diiŋŋi ŋŋmi. Bi nìn gbáń ki wīī Jeerusaleem gundi. 9 Bijanjaliibi bin cí ubɔtee kpiliu Neebusaradan nìn cúú binib bin nìn kíǹ ki kā Jeerusaleem tiŋkinee ki cūnnì Babiloon tiŋkin kuyuŋu. U nìn cáá bin nìn dū bi-ba ki tīī Babiloon bɔtiuee nì ŋŋal pu tɔntɔnliibi bin kíǹee ki cūnnì. 10 Ama u nìn yāntì bisoodambi nì bin kaa pée cáá tibee Juuda tiŋkin, ní ki nìn dū fiinyi kpaaŋŋi nì tisati ki yākatì-bi.

Bi nyántì Yeereemii sarkan

11 Ubɔti Neebukadineesaar nìn tīī bijanjaliibi bin cí ubɔtee kpiliu Neebusaradan mara Yeereemii pu yii: 12 «Á cùú nyàab̀-u kí wúń u-pu ubɔ ń taa ŋá-u tikpitil tiba. U yaa bālifì-si tiŋyee, á ŋá míǹ kí tīī-u.» 13 Niinee ní bijanjaliibi bin cí ubɔtee kpiliu Neebusaradan nì ubɔti tɔntɔnliibi kpiliu Neebusasban nì ujanjakpil Neergaal-Sareeseer nì Babiloon bɔtiu janjakpilib bin kíǹee kɔkɔ sòon̄ ki gbìlīǹ tɔb. 14 Bi nìn tú binib bí cùú nyàabìń Yeereemii bijanjaliibi bin cí ubɔtee dumpu. Bi nìn dū-u ki ŋúbiǹ Ayiikaam jipɔɔn Geedaliyasi, Safan naantiiu. Geedaliyasi nìn pú-u nsan ú kpì u-dumpu. Míǹ ní Yeereemii nìn gbíntì samaa kansikin ki kóò.

Ti-Dindaan nín sòon̄ tin Eebeedi-Meeleeki puee

15 Ŋyunti ŋun Yeereemii nìn dáá pīī bijanjaliibi bin cí ubɔti dumpuee, ti-Dindaan nìn sòon̄ nì u yii: 16 «Cùú tùkù ueetiiyoopiija Eebeedi-Meeleeki yii: <Ti-Dindaan Mpɔŋkɔdaan, Isirayeel Nimbɔtiu nín lī puee sèé: M nìn sòon̄ yii an kaa sá nnaam ní m làá cáań kí tɔ̄ Jeerusaleem yab pu ama nnaabu. Too, m nín nìn sòon̄ puee, m làá ŋá míǹ. An kaa làá sūŋkì, sii a-ba nimbil làá ká. 17 Ama ŋwiin gbantee, m làá fīī-si, man ni-Dindaan di lī míǹ. Maa làá dū-si kí ŋá bin a fàŋkée ŋaan. 18 Tiŋman, m làá fīī a-maŋfal. Aa làá kpú kujaaun. Kun a làá páatée dee, kun puee a dū a-mákal ki páaǹ m-pu. Ti-Dindaan di sòon̄ míǹ.>»