Yeereemii 40

Yeereemii cūtìi kāl̀ Miisipa

1 Yeereemii nìn bí binib bin bi nìn cúú Jeerusaleem nì Juuda timmun kí cùnnì Babiloon tiŋkin kuyuŋuee poon. Bi nìn bóob́ u mun ikusaka. Ama bijanjaliibi bin cí ubɔtee kpiliu Neebusaradan nìn nyántì-u bisarkadambee kansikin ní ki yāntì u búntì Raama tiŋkin. 2 Ujanjakpilee nìn yíiń Yeereemii ní ki bí-u yii: «Ti-Dindaan a-Nimbɔtiu nìn sòon̄ ki síiǹ yii nnaabu nee làá bàń Jeerusaleem tiŋki pu. 3 U lafun cáań nnaabuee ki tɔ́ ki-pu. U nín nìn sòon̄ kí ŋá puee, míǹ ní u ŋá nee. Di sá yii ni yīntiǹ ti-Dindaan kaa pílifì u-nyɔkɔ, an pu ní tin bí nee kɔkɔ bāań-ni. 4 Too, m làá bútí-si ikusaka in kā a-ŋaan nee díǹ. A yaa tí là kí nóó-mi tí cù Babiloon tiŋkinaaa, a ŋūǹ kí dāan̄, m làá wúń a-pu. Ama a yaa kaa tí là kí dāan̄aaa, á taa dāan̄. Kpèè, kitiŋ kɔkɔ di dɔ̄ a-nimbiinee, a ŋūǹ kí cù laakin a yaa lèe.»

5 Kii Yeereemii nín kaa nìn kíí tiba puee ní Neebusaradan kútì ki lī yii: «A ŋūǹ kí gítí Ayiikaam jipɔɔn Geedaliyasi, Safan naantiiu cee. Babiloon bɔtiu dū úǹ ní ki kāaǹ gɔmina ú nīn kpèé Juuda timmu. Nín̄ cá kí kàl̄ u-cee samaa kansikin àá á nīn cá laakin a yaa lèe.»

Míǹ boonee ní bijanjaliibi bin cí ubɔtee kpiliu tīī Yeereemii tijin tin u làá nīn jīǹ nsanee ní ki pú-u tiwan tiba mun, ní ki yāntì u búntì. 6 Niinee Yeereemii nín cá Ayiikaam jipɔɔn Geedaliyasi cee Miisipa tiŋkin. U nìn kɔ́ binib bin nìn kíǹ ki kóò kitiŋee poonee kansikin.

Juuda yab kóoǹ ki kpáfì Geedaliyasi cee

(Kpèè 2 Bib 25.23-24)

7 Tisatinee, ajanjakiti nì ŋi-janjakpilib nìn dáá bí. Bi nìn gbìl̄ yii Babiloon bɔtiu nìn dū Ayiikaam jipɔɔn Geedaliyasi ki kāaǹ gɔmina ú nīn kpèé Juuda tiŋki. U nìn dū bisoodambi nì bininjab nì binimpoobi nì mbiyaamu, an dàkà yii bin kɔkɔ baa nìn cúú ki cūnnì Babiloon kuyuŋuee ki ŋúbiǹ-u. 8 Niinee ní akitee dɔ́miń Miisipa ki kútì Geedaliyasi pu. Ŋi-janjakpilib di nìn sá Neetaniyawuu jipɔɔn Isimaayeel nì Kareeya jipɔmbi liitil Yoowanan nì Joonatan, nì Taneewumeeti jipɔɔn Seeraya nì Maaka jipɔmbi Eefayii un sá Neetoofa tiŋkinee nì Yasaniyawuu un sá Meeka tiŋkinee. 9 Ní Ayiikaam jipɔɔn Geedaliyasi, Safan naantiiu bí bijanjakpilib nì bi-bijanjaliibi yii: «Taa fàŋkìmaan kí nīn bí Babiloon yab taapu. Kàl̄maan kitiŋ nee ni kí nīn tūǹ ditundi ki tìì Babiloon yab. Ni yaa ŋá míǹ, an làá nīn sɔ̀m̀ nì ni, man di tùkū-ni míǹ. 10 Man kā Miisipa tiŋkin doo nimbi yil pu Babiloon yab bin dòoń ti-ceeyee cee. Ama nimbee, ní kìtīmaan fiinyi biliŋ nì isufi in kíǹee biliŋ nì ŋkpam subiliŋ. Ní kpāafì ni-kpaajinti kí nīn kā ntimu mun poon ni kóòyee.»

11 Míǹ mbaantiim ní Juuda yab bin nìn bíń Moowaab yab nì Amɔn yab nì Eedoom yab timmun nì ntimu mun kíǹee poonee nìn gbìl̄ yii Babiloon bɔtiu nìn yāntì binib biba kíǹ Juuda timmun, ní ki lēē Ayiikaam jipɔɔn Geedaliyasi, Safan naantiiu ú nīn kpèé-bi. 12 Niinee ní Juuda yab kɔkɔ nyánní laakin bi nìn sáǹ ki cūtìi kɔ́ee ki gítìń. Bi nìn dūu bāań Juuda tiŋkin Miisipa, Geedaliyasi cee. Bi nìn kītì niin fiinyi biliŋ nì asubil aba mun tikpil.

Bi kūū Geedaliyasi

(Kpèè 2 Bib 25.25-26)

13 Dalbee ní Kareeya jipɔɔn Yoowanan nì ajanjakiti kpilib bin nìn bí tisatinee dɔ́miń ki ká Geedaliyasi Miisipa tiŋkin. 14 U nìn bí-u yii: «Mimmee aa nyí yii Amɔn yab bɔtiu Baliisi lēē Neetaniya jipɔɔn Isimaayeel ú kpɔ̀-saaa?»

Ama Ayiikaam jipɔɔn Geedaliyasi kaa nìn fōō ki kíí. 15 Nì míǹ kɔkɔee, Kareeya jipɔɔn Yoowanan nìn dɔ́miń Miisipa ki ká-u dibalin ní ki nìn bí-u yii: «Yàntī ḿ cù kí kpɔ̀ Neetaniya jipɔɔn Isimaayeel dibalin. Ubɔ kaa làá béé. Àá a là yii úǹ nín kpɔ̀-si ní? U yaa kūū-see, Juuda yab bin kɔkɔ bàà kóoǹ ki kpáfì a-ceeyee làá fàtīí tí yàl̄, ní tin bàà kíǹ Juuda beelinee ń wāŋkì.»

16 Ama ní Ayiikaam jipɔɔn Geedaliyasi kíí Kareeya jipɔɔn Yoowanan yii: «Taa ŋá míǹ, kun puee tin a sòoǹ Isimaayeel pu nee kaa sá ibaamɔn.»