Yeereemii 41

1 Ama dibindi poon ŋmaluluútiuee ní Neetaniya jipɔɔn Isimaayeel, Eeliisama naantiiu dɔ́miń Miisipa Geedaliyasi cee. Isimaayeel nìn sá ubɔti dicaŋkun niliu ní ki nìn sá ubɔti kàliŋkpilib ubɔ. U nì bininjab saalaa di nìn táá ki dɔ́miń. Ŋyunti ŋun bi kā u-cee ki jīǹee, 2 ní Neetaniya jipɔɔn Isimaayeel nì bininjab saalaa bin nóoń-uee yíkì dicilpu, ní ki dū bi-tàataajimmu ki gāatì ki kūū Ayiikaam jipɔɔn Geedaliyasi, Safan naantiiu. Unil un Babiloon bɔtiu nìn kāaǹ Juuda tiŋki pu gɔminee, bi nín kūū-u puee dee. 3 Míǹ boonee ní Isimaayeel kūū Juuda yab bin kɔkɔ nìn bí Geedaliyasi cee Miisipa tiŋkinee. U nìn kūū ki kpáaǹ Babiloon janjaliibi bin nìn bí niinee.

Isimaayeel kūū bisaŋkinliibi imuŋku inaa

4 Bi kūū Geedaliyasi iwiin ili jítì báà ubɔ kaa gbìl̄ u-kúm pu. 5 Bininjab imuŋku inaa nìn nyánní Siikeem nì Siiloo nì Samaarii timmun ki bāań. Bi nìn kōol̀ bi-nyimpuliŋ, ki pēē ikpalcati ki cáfì cáfì bi-wunti. Bi nìn tú tijimpin saraabi nì bitalaalutuukaabi kí cùú ŋá ti-Dindaan saraabi kunimbɔtidiin. 6 Neetaniya jipɔɔn Isimaayeel nìn nyáń Miisipa tiŋkin ki túŋkì-bi nsanni ki sūǹ. U bàn̄ bi-ceeyee, ní ki bí-bi yii: «Dāam̄maan Ayiikaam jipɔɔn Geedaliyasi cee.»

7 Ama ŋyunti ŋun bi kɔ́ kitiŋinee ní Isimaayeel nì u-yab kūū-bi ní ki dū-bi ki tɔ́ dinyimbɔbil diban. 8 Bi-kansikinee binib saalaa nìn bí Isimaayeel yii: «Taa kpɔ̀-ti, di sá yii ti cáá bilee nì ɔɔji nì ŋkpam nì tisiil ki bál̀ tisatin.»

Niinee ní Isimaayeel yāntì-bi kaa kūū-bi kii u nín kūū bi-jutiibi puee. 9 Dinyimbɔbil din poon Isimaayeel nìn dū binib bin u kūūyee nìn sá dinyimbɔbil din ubɔti Asaa nìn yāntì bi gbìn̄ ŋyunti ŋun u nì Isirayeel bɔtiu Basaa nìn bí kujaaunee ní. Dinyimbɔbilee nìn sá dikpaandi. Dinyimbɔbil gbantin ní Neetaniya jipɔɔn nìn dū binib bin u kūūyee ki gbéeǹ.

10 Míǹ boonee ní Isimaayeel cúú bin kɔkɔ nìn bí Miisipa tiŋkinee nì ubɔti sapɔmbi ki pīiǹ kudii. U nìn cúú bin kɔkɔ bijanjaliibi bin cí ubɔtee kpiliu Neebusaradan nìn dūu ŋúbiǹ Geedaliyasee. Míǹ boonee ní u kpáaǹ bisarkadambee ki búntì Amɔn yab cee.

Bi fīī bin Isimaayeel cúú kuyuŋuee

11 Kareeya jipɔɔn Yoowanan nì ajanjakiti kpilib bin nìn bí u-ceeyee gbìl̄ nnikpaakoon ŋun Neetaya jipɔɔn Isimaayeel ŋée. 12 Niinee ní bi kóoǹ bijanjaliibi kɔkɔ ki kpáfì kí cùú jáǹ-u. Bi nìn jìn̄ ki tin cúú-u Gabawɔn puuku caŋin. 13 Binib bin Isimaayeel nìn cúúyee nín ká Yoowanan nì bijanjakpilib bin nìn nóó-uee, ní an mɔ́ɔkiǹ-bi. 14 Niinee ní bin kɔkɔ Isimaayeel nìn cúú Miisipa tiŋkinee fātì ki nín cá Kareeya jipɔɔn Yoowanan cee. 15 Ama Neetaniya jipɔɔn Isimaayeel nín ká Yoowanan tóobiń-bee ní u sáǹ ki nín cá Amɔn yab cee.

16 Isimaayeel nín kūū Geedaliyasee, u nìn cúú binib biba Miisipa tiŋkin. Bi-kansikin bin nìn dáá bí dimaŋfalinee, Kareeya jipɔɔn Yoowanan nì bijanjakpilib bin nìn céeǹ-uee nìn kóoǹ-bi ki kpáfì. Bíǹ di sá bininjab - an dàkà yii bijanjaliibi -, nì binimpoobi nì mbiyaamu nì bifaabi, an dàkà yii bin kɔkɔ Yoowanan nì bijanjakpilib nìn yōoǹní Gabawɔn tiŋkin ki gíiǹnée. 17 Bi nìn yíkìi kāl̀ nsan pu ki nín cá, ki bàn̄ ki yúl̀ anicandiin ŋin bí Kimeeyam, Beetileem tiŋki caŋinee. Bi nìn là kí nìkī kí nīn cá Eejipiti tiŋkin. 18 Di sá yii Isimaayeel nín kūū Geedaliyasi un Babiloon bɔtiu nìn kāaǹ gɔmina ú nīn kpèé Juuda tiŋkee, bi nìn kíǹ ki fàŋkí Babiloon yab ní.