Yeereemii 42

Yeereemii sáŋkì bijanjakpilib bí taa cù Eejipiti tiŋkin

1 Niinee bijanjakpilib kɔkɔ, cilinjee Kareeya jipɔɔn Yoowanan nì Oosaya jipɔɔn Asariya nì samaa kɔkɔ, bikpaambi nì ŋwaamu kɔkɔ cūtìi ká 2 Unimbɔti bɔnaatiliu Yeereemii. Bi nìn bí-u yii:

«Ti gbàam̄-si, fōō tin ti là kí mèè-si nee: Gbàam̀ ti-Dindaan a-Nimbɔtiu timbi bin ŋmátì ki kíǹ nee pu. Di sá yii taa ti náaǹ kii sii a-ba nín wāĺ pu nee. 3 Míǹ puee bàlifì ti-Dindaan a-Nimbɔtiu ú dàkà-ti nsan ŋun sá tí dēe, nì kun ti máaǹ kí ŋée.»

4 Ní Unimbɔti bɔnaatiliu Yeereemii kíí-bi yii: «M gbìl̄, m làá mèè ti-Dindaan ni-Nimbɔtiu kii ni nín bālifì-mi puee. Míǹ boonee, m làá tùkù-ni ti-Dindaan nín kíí puee, maa làá báĺ-ni báà tiba.»

5 Ní bi kíí Yeereemii yii: «Ti pōoǹ kí ŋá tin ti-Dindaan làá tùkù-si á dūú nàatī-tee deedeedee. Ti-Dindaan ń nīn sá ibaamɔn seeradaaŋwu ki tīī-ti. 6 Timbi di tú-si á bàlifì ti-Dindaan ti-Nimbɔtiu. Tin u yaa lēe yaa ŋān̄aaa, an yaa kaa ŋān̄aaa, ti làá ŋá míǹ. Niinee, án làá nīn ŋān̄ ki tīī-ti, di sá yii ti làá pīlifì ti-Dindaan ti-Nimbɔtiu nyɔkɔ.»

7 Iwiin saalaa boonee, ní ti-Dindaan sòon̄ nì Yeereemii. 8 Niinee ní u yíiń Kareeya jipɔɔn Yoowanan nì bijanjakpilib bin nìn bí u-ceeyee, nì samaa kɔkɔ, bikpaambi nì ŋwaamu. 9 U nìn bí-bi yii: «Ni lēē-mi yii ḿ mèè ti-Dindaan, Isirayeel Nimbɔtiu ni-pu. U nín lī puee sèé:

10 «<Ni yaa kíí kí nīn kā kitiŋ nee poonee,

maa ti làá nàan̄-kì,

ama m làá mā m-nibul.

M làá cóoń-ni kii bi nín cōontí busubu puee,

maa ti làá cóotí-ni dalba dalba.

M làá ŋāŋkì tikpitil tin kɔkɔ m ŋá-nee.

11 Kɔŋkɔnnee, ní taa ti fàŋkì Babiloon bɔtiu un ni fàŋkí yɔ́kɔ́ yɔkɔ nee.

Man ni-Dindaan di bí-ni yii

ní taa ti fàŋkì-u.

Di sá yii m bí ni-cee,

kí fīī-ni kí nyāntí u-ŋaan kí líí.

12 M làá yàntī ní ká diyimɔɔl u-cee,

ní ú sɔ̄ ni-saai,

kí yàntī ní gítiń ni-tiŋki pu.>»

13 Ama ni yaa bí yii: «Taa làá kàl̄ kitiŋ nee poon! ní ki yíì kaa pílifì ti-Dindaan ni-Nimbɔtiu nyɔkɔ», 14 ní ki yaa lī yii: «Aayee! Ti làá cù Eejipiti tiŋkin ní. Niinee, taa làá ti ká kujaau, kaa làá ti gbìl̄ iyin in bi búǹ kí cù kujaauee pu, ní ŋkùm kaa làá ti nyā ti-pu. Niin ní ti là kí tin nín̄ bí.» 15 Míǹ puee nimbi Juuda yab bin kíǹee, ní pīlifì ti-Dindaan nín sòon̄ puee. Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀.

Ni yaa gbíntìi cɔ́ yii ni làá cù Eejipiti,

ni yaa lafun sáǹ ki cūtìi kɔ́ niinee,

16 kujaau kun ni fàŋkée

làá bàń-ni Eejipiti tiŋkin niin,

ní ŋkùm min bɔti páb́-ni nee

ń páań ni-boon niin,

ní ní kpúń niin.

17 Bin kɔkɔ làá lēē

kí cùú nīn kóò Eejipiti tiŋkinee,

kujaau nì ŋkùm nì bìlbil kúm di làá kpɔ̀-bi.

Báà ubɔ kaa làá dāá ŋmátí

kí nyā nnaabu ŋun m làá dāá dūú tɔ̄ bi-puee ni.

18 Ní Yeereemii gíti bí yii: «Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <M kpáatì m-ŋuul nì mbum ki pɔ̀l̄ Jeerusaleem yab pu. Míǹ mbaantiim ní m làá dāá kpáatí m-ŋuul nì mbum kí pɔ̀l̄ nimbi bin làá cùú kɔ́ Eejipiti tiŋkinee pu. Niinee bi yaa làá dāá tɔ̄ ubɔ mbusu àá kí sòoǹ kubɔbiiu kubɔ pu àá tibɔti tin cáá tifaandee pu àá kí kɔ́ǹ ubɔ icooyee, bíǹ ní bi làá dāá yòon̄ ŋabika. Ni pée gíti kpá kí ká kitiŋ nee.>»

19 Ní Yeereemii kútì ki lī yii: «Nimbi Juuda nibul din kíǹee, m bíi kpáafí-ni díǹ. Ti-Dindaan di bíi tìì-ni mara yii ní taa cù Eejipiti, ní béé míǹ. 20 Ni tīī-mi ditundi yii ḿ bàlifì ti-Dindaan ni-Nimbɔtiu dibalifil. Ni bí-mi yii: <Mèè ti-Dindaan ti-Nimbɔtiu kí tīī-ti. Tùkù-ti tin kɔkɔ u làá tùkù-see, ti làá ŋá míǹ.> Ŋwiin gbantee, an nìn sá nì bugbambu ní ni sòon̄ míǹ. 21 Di sá yii díǹ nee, m bíi tùkù-ni tin ti-Dindaan ni-Nimbɔtiu kíí-nee. Ama naa bíi pílifí tin ti-Dindaan dī m-pu ki sòon̄ee. 22 Too, ní béé tiŋan yii kujaau nì ŋkùm nì bìlbil kúm di làá kpɔ̀-ni kitiŋ kin poon ni là kí sāǹ kí tin kɔ́ nee!»