Yeereemii 43

Bi cáá Yeereemii ki cūnnì Eejipiti mpɔn

1 Yeereemii nìn dū tibɔti nee kɔkɔ ki nāatì binib bin kɔkɔ nìn bí niinee. An nìn sá tibɔti tin ti-Dindaan bi-Nimbɔtiu nìn dī u-pu ki sòon̄ee ní. 2 Niinee ní Oosaya jipɔɔn Asariya nì Kareeya jipɔɔn Yoowanan nì bilambidambi gbanti kɔkɔ bí Yeereemii yii: «A mɔ́ntí ní! Ti-Dindaan ti-Nimbɔtiu kaa pée tùkū-si á nàatī-ti yii: <Ní taa cù Eejipiti tiŋkin kí kàl̄.> 3 An sá Neeriya jipɔɔn Baruuki di bíi sàal̄-si á sòoǹ ti-pu míǹ. Di sá yii u là kí dū-ti kí ŋá Babiloon yab ŋaan bíǹ ń kpɔ̀-ti, àá kí cúú-ti kí cùnnì Babiloon tiŋkin kuyuŋu ní.»

4 An puee Kareeya jipɔɔn Yoowanan nì bijanjakpilib nì samaa un nìn dī-bee nìn yíì kaa pílifì ti-Dindaan kí kàl̄ Juuda tiŋkin. 5 Niinee Kareeya jipɔɔn Yoowanan nì bijanjakpilib yōoǹ Juuda yab bin kɔkɔ kíǹee. Bíǹ di nìn sá bin nìn yàl̄ ki bíń ntimu kɔkɔn ki fātìi gítìń Juuda tiŋkinee. 6 Bininjab nì binimpoobi nì mbiyaamu nì ubɔti bisalib nì binib bin kɔkɔ bijanjaliibi bin cí ubɔtee kpiliu Neebusaradan nìn dūu kāaǹ Juuda tiŋkin Ayiikaam jipɔɔn Geedaliyasi, Safan naantiiu ń nīn kpèéyee. Bi nìn kpáaǹ Unimbɔti bɔnaatiliu Yeereemii nì Neeriya jipɔɔn Baruuki. 7 Bi nìn yíì kaa tɔ́ ti-Dindaan nín lī puee. Bi nìn yíkì ki búntì Eejipiti tiŋkin, ki dūu bàn̄ Tapaneesi.

Yeereemii nāatì yii Neebukadineesaar làá fōō Eejipiti

8 Tapaneesi tiŋkin niinee ní ti-Dindaan sòon̄ nì Yeereemii yii: 9 «Yòon̄ ataŋkpakpaan kí gbà kí síb́ kasarka un bí Eejipiti bɔtiu beecindi nyɔkɔpu Tapaneesee. Á ŋá míǹ Juuda yab nimbilaaliyin.» 10 Míǹ boonee ní u bí-bi yii: <Ti-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. M làá tɔ̄ bí cùú nyàabìń m-tɔntɔnliu Neebukadineesaar, Babiloon bɔtiu. M làá dū u-beejal kí tɔ́kɔń ataŋkpee ŋin a síb́ nee pu ní. Niin ní u làá cóoń u-beecindi tantiu. 11 U yaa láa bāańee, u làá dāá nà Eejipiti tiŋki ní dúsi dusi. U làá dāá kpɔ̀ bin máaǹ ŋkúmee, ní kí cúú bin máaǹ kí cù kuyuŋuee kí cùnnì kuyuŋu, ní kí dū kitàataajiki kí kpɔ̀ bin máaǹ bí dū kitàataajiki kí kpɔ̀ee. 12 U làá tūū Eejipiti yab waadiiŋŋi ŋŋmi. U làá wà awaa ŋŋmi, àá u làá cáá-ŋi kí cùnnì Babiloon tiŋkin. U làá gbākal̀ Eejipiti gaajawanti kii upikpaal nín fíkití u-wampeeŋkaati kí lēē ikpɔkpɔb puee ní. Míǹ boonee ní ú yīkì kitiŋee nì ŋgbansɔŋfi. 13 Eeliyoopooliisi tiŋkinee, u làá gbá kí wīī ataŋkpee kumpooŋi ní kí tūū Eejipiti yab waadiiŋŋi ŋŋmi.>