Yeereemii 44

Ti-Dindaan sòon̄ nì Juuda yab bin cūtìi kɔ́ Eejipitee

1 Ti-Dindaan sòon̄ nì Yeereemii tibɔti ú dūú nàatī Juuda yab bin kɔkɔ nìn cūtìi kɔ́ Eejipiti tiŋkin, ki bí Miigidool nì Tapaneesi nì Meemifiisi nì bin kóò Patroosi tinjaaŋŋinee. 2 Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: «Ni ká inaabu in kɔkɔ m cáań ki tɔ́ Jeerusaleem nì Juuda timmu mun kíǹee puee. Díǹ pu nee, ntimu gbanti kpántì adigbun, ní báà uniseen kaa ti kóò mu-poon. 3 Tin bí nee kɔkɔ yaa bāań-bee, an sá ikpiti in ntimu gbanti yab ŋá ki kɔ́ǹ-mi diŋuulee pu. Di sá yii bi cūtìi ŋá saraabi ki tīī awaa, ki jáaḿ-ŋi. Ama ní baa nyí awaa gbanti. Nimbi ni-ba nì ni-naanjab mun kaa nyí-ŋi. 4 M túnní m-tɔntɔnliibi bibɔnaatiliibi kɔkɔ ni-cee kaa gbēeǹ. Bi nìn bí-ni yii: <Ní taa tɔ̄ ntimbiil tuuŋŋi ŋin m ná nee.> 5 Ama naa nìn pílifì ní kaa nìn fātìi tɔ́. Naa nìn fātì ni-boon ki tīī ikpiti in ni nìn ŋáańee, ní ki gbíntìi nìkì ki ŋáań saraabi ki tìì awaa. 6 Niinee ní m kpáatì m-bum nì m-ŋuul ki sītì ni-pu, ní an wùn̄ Juuda timmu nì Jeerusaleem daŋŋi kii ŋŋmee. Ntimu gbanti kpántì adigbun ŋma nì kuteeu kii ni nín wāĺ an bí pu díǹ nee ní.>»

7 Ní Yeereemii nìkī ki lī yii: «Kɔŋkɔnnee ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <Ba pu ní ni bíi kɔ̄ntí ni-ba agìŋ́kpaan poon míǹ? Ni là kí kúntí Juuda nibulin, bininjab nì binimpoobi nì binipɔmbi nì mbipɔmu níii? Naa pée là ni-kansikin biba ń kíń níii? 8 Di sá yii ni-tuuŋŋi gbítí m-ŋuul. Ni tùutī talaalub ki ŋáań saraabi ki tìì Eejipiti tiŋki kin ni cūtìi kɔ́ee waaŋi. Ni baasii là kí kúntí ni-ba, kí kpántí mbusu nì icoo ŋabikau kí tīī duulinya timbuŋŋi kɔkɔ níii? 9 Ni súntì ikpiti in bi ŋá Juuda tiŋkin nì Jeerusaleem daŋŋi pueeee? Ni-naanjab nì Juuda bɔtiibi nì bi-nimpoobi nì nimbi ni-ba nì ni-nimpoobi di ŋá ikpiti gbanti. 10 Áli nì díǹ, an kaa ŋá ubɔ nyàaa yii u ŋá tiba. Naa fāŋkì-mi, kaa tɔ́ m-marab nì m-bɔkpaaŋi ŋin m tīī ni nì ni-naanjabee.>»

11 Ní Yeereemii gíti kútì ki lī yii: «An pu ní ti-Dindaan Mpɔŋkɔdaan, Isirayeel Nimbɔtiu bí yii: <M làá fàtī kí já nì bi, kí cáań nnaabu kí tɔ̄ bi-pu, ní kí kúntí Juuda nibul kɔkɔ. 12 M làá kpèè Juuda yab bin kíǹ ki cūtìi kóò Eejipiti tiŋkinee bɔti. Bi-kɔkɔ làá kpú ní. Kitiŋ gbantin ní kujaau àá ŋkùm làá kpɔ̀ bi-kɔkɔ, ŋwaamu nì bikpaambi. Míǹ ní bi làá kpú ní bi yaa làá dāá tɔ̄ ubɔ mbusu àá kí sòoǹ kubɔbiiu kubɔ pu àá tibɔti tin cáá tifaandee pu àá kí kɔ́ǹ ubɔ icooyee, bíǹ ní bi làá dāá yòon̄ ŋabika. 13 M làá jáǹ bin cūtìi kóò Eejipiti tiŋkinee, kii m nín jáń nì Jeerusaleem yab puee. M làá dū kujaau nì ŋkùm nì bìlbil kúm kí tɔ̄ bi-pu. 14 Juuda yab bin kíǹ ki bí dimaŋfalin, ní ki dɔ́miń ki kɔ́ Eejipiti tiŋkinee, ubɔ kaa làá dāá ŋmā kí sāǹ kí ŋmátí kí nyā ŋkúm ŋaan. Ubɔ kaa làá dāá ŋmā kí gítiń Juuda tiŋki kin bi bàà cáá nlandɔkɔ kí gítiń kí kàl̄ee poon. Baa làá dāá ŋmā kí gítiń, asee bikaaŋkaabi bin làá dāá ŋmátí kí nyā ŋkúm ŋaanee.>»

Juuda yab ŋá saraabi ki tīī yilpu Nimpubɔtiu

15 Bininjab bin kɔkɔ nìn nyí yii bi-nimpoobi ŋáań saraabi ki tìì awaayee nì binimpoobi bin kɔkɔ nìn kóoǹ ki kpáfì ki dūu ŋá dikitikpaandee, an dàkà yii bin kɔkɔ nìn cūtìi kɔ́ Eejipiti tiŋkin Patroosee nìn kíí Yeereemii yii: 16 «Nì min kɔkɔ an sá ti-Dindaan yindi pu ní a sòoǹ nì tee, taa làá pīlifiǹ-si. 17 Ti làá nīn nìkì ki ŋáań ti nín lēē yii ti làá ŋá puee. Ti làá nīn tùutī talaalutuukaabi ki tìì diwaal Asitaartee, yilpu Nimpubɔtiu ní kí fá-u ndaam. Timbi nìn pée ŋáań míǹ ní, ki kpáaǹ ti-naanjab nì ti-bɔtiibi nì ti-kàliŋkpilib Juuda timmun nì Jeerusaleem daŋŋi pu. Ti nín nìn ŋáań mimmee, ti nìn kāntí ki jīǹ ní, ní an nìn bútì-ti ní taa nìn nyí kun bi yíì nnaabuee. 18 Ama kí yòon̄ ŋwiin ŋun ti gbēeǹ kaa ti tùutī talaalub ki tìì diwaal yilpu Nimpubɔtiu, kaa ti féeń-dì ndaamee, ti lóò tikɔkɔ, ní kujaau nì ŋkùm bíi kù-ti»

19 Ní binimpoobi gíti lī yii: «Ti nín nìn tùutī talaalub ki tìì diwaal yilpu Nimpubɔtiu ki féeń-dì nnyimee, ti-calib kaa nìn nyáaa? Ti yaa nìn ŋáań kalaabi bin náań nì dèe ki féeń-dì ndaamee, bi nìn nyáaa!»

20 Ama ní Yeereemii bí bi-kɔkɔ, bininjab nì binimpoobi bin nìn kíí-u mimmee yii: 21 «An sá tiŋman, ni nì ni-baabi nì ni-bɔtiibi nì ni-kàliŋkpilib nì Juuda yab bin kɔkɔ kíǹee nìn tùutī talaalub Juuda timmun nì Jeerusaleem daŋŋi pu. Ti-Dindaan dáá gbíntìi téetí an pu, waa súntì. 22 Ama ní ti-Dindaan gīī nì ni-tuŋkpitiŋ nì ntimbiil tuuŋŋi ŋin ni ŋáańee. An pu ní ni-tiŋki kpántì adigbun, mpaan ŋun kíǹ ki fàantée, ní binib kaa ti kóò niin. Ni-tiŋki gbanti di kpántì ŋabika bi cáa tòó mbusu, kii an nín bí pu díǹ nee ní. 23 Kun pu nnaabu gbanti jéetì ni-puee di sá yii ni tūutì talaalub ki tīī awaa ki yīntiǹ ti-Dindaan. Naa pílifiǹ-u ní kaa nóó u-dàkatam nì u-marab nì u-saŋkii, kii an nín bí pu díǹ nan ní.»

24 Boonee ní Yeereemii bí samaa kɔkɔ, bininjab nì binimpoobi yii: «Nimbi Juuda yab bin kɔkɔ bí Eejipiti tiŋkinee, pīlifìmaan ti-Dindaan nyɔɔbundi. 25 Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. Ni nì ni-nimpoobi, ni lī yii: <Ti pōoǹ yii ti làá nīn tùutī talaalub ki tìì diwaal yilpu Nimpubɔtiu ki féeń-dì ndaam. Ti nín pōoǹ puee, míǹ ní ti làá ŋá!> Too, nín̄ ŋúb́ ni-pooŋyi, ŋámaan ni nín pōoǹ puee. 26 Nimbi Juuda yab bin kɔkɔ cūtìi kɔ́ Eejipiti tiŋkinee, ní pīlifì tin man ni-Dindaan bíi sòoǹ nì ni nee tiŋan: Man ni-Dindaan, m pūtì m-yiŋkpaandi yii ujuudanil ubɔ pée gíti kpá kí pùtī kí yíiń m-yindi Eejipiti tiŋki kɔkɔn. Ubɔ gíti kpá kí lì yii: <Nì ti-Dindaan un bí dimaŋfalin nee.> 27 Kun m làá nyàab̀ kí cáań kí tɔ̄ ni-puee, an kaa làá nīn sá nnaam, ama nnaabu ní. Kujaau nì ŋkùm di làá kpɔ̀ Juuda yab bin cūtìi kɔ́ Eejipiti tiŋkinee. Báà uniseen kaa làá kíń. 28 Bi-kansikin binikaaŋkaabi di làá dāá ŋmátí kí nyā kujaaun. Bi làá dāá nyānní Eejipiti kí gítiń Juuda tiŋkin. Niinee Juuda yab bin kíǹ ki sáǹ ki cūtìi kɔ́ Eejipiti tiŋkinee làá béé man nì bíǹ un di cáá mbaamɔnee. 29 Man ni-Dindaan nín sòon̄ puee sɔ̀. M làá já nì ni Eejipiti tiŋkin doo. M làá tīī-ni kudaaŋŋu kubɔ. Niinee ni làá dāá ká yii tin m sòon̄ee, m bíi ŋáań míǹ kí cáań nnaabu kí tɔ̄ ni-pu. Kudaaŋŋu gbanti sɔ̀. 30 M dū Juuda bɔtiu Seedeesiyasi ki ŋá Babiloon bɔtiu Neebukadineesaar un nìn nyàab̀ kí kpɔ̀-uee ŋaan. Too, míǹ mbaantiim ní m làá dū Eejipiti bɔtiu Faaroo Oofiraa kí ŋá u-nannanliibi bin nyàab̀ kí kpɔ̀-uee ŋáań. Man ni-Dindaan nín sòon̄ puee dee.>»