Yeereemii 45

Tibɔti tin ti-Dindaan sòon̄ Baruuki puee

1 Joosiyaasi jipɔɔn Yoowakiim nín kāl̀ Juuda beel pu tibɔtiil dibinnanaatiilee ní Neeriya jipɔɔn Baruuki ŋmàn̄ tibɔti tin Unimbɔti bɔnaatiliu kàan̄-uee ki ŋá kugbɔŋun. Dibindi gbantee, Yeereemii nín nìn tùkū Baruuki tibɔti tiŋyee sèé: 2 «Ti-Dindaan Isirayeel Nimbɔtiu nín sòon̄ tin sii Baruuki puee sɔ̀. 3 A lì yii: <Man bɔlii na! M nìn pée bí falaa poon ní ti-Dindaan gíti dū kunimbaau ki kútì-mi. M yáliŋkì ki tin gīī, kaa kpáà ká diŋuŋfil.> 4 Too, ti-Dindaan nín tùkū-mi tin ḿ dūú nàatī-see sèé:

<M làá gbá kí kpìtī tin m nìn máńee,

m làá fùkù tin m nìn cóoǹee.

M làá ŋá míǹ ntimu kɔkɔn.

5 Ní siiyee, a nyàab̀ kí tɔ̄ atuŋkpaan.

Taa ti pée bàlifì tiba!

Di sá yii man ni-Dindaan,

m nín sòon̄ puee sèé:

M làá cáań nnaabu kí tɔ̄ tin kɔkɔ cáá kufoouee pu.

Ama siiyee, dimaŋfal ní m làá tīī-si

án nīn sá a-paati,

laakin kamaa a làá cùee.>»