Yeereemii 46

1 Ti-Dindaan nín sòon̄ nì Yeereemii atimbun pu puee sɔ̀.

Bi jáń ki pɔ́ɔkiǹ Eejipiti yab Kaarkeemiisi

2 U sòon̄ Eejipiti tiŋki nì Eejipiti bɔtiu Faaroo Neekoo janjakitil pu. Joosiyaasi jipɔɔn Yooyakiim nín kpántì Juuda bɔtiu dibinnanaatiilee, Eejipiti bɔtiu nìn bí Kaarkeemiisi, Eefiraati mɔɔgbandi. Ŋyunti gbantee, Babiloon bɔtiu Neebukadineesaar nìn jáń ki pɔ́ɔkiǹ-u.

3 Bijanjakpilib nìn kūuntí yii:

«Bɔ́ntímaan agbampɔɔ

akpaan nì ŋwaamu.

Ní cùú jámaan kujaau.

4 Ní kpàl̄maan itaamu!

Bitanjakaliibi, máĺmaan ni-taamui!

Dūmaan ni-janjafuulimmu kí cíkiń!

Ní páaḿmaan ipɔ̀n pu!

Bɔ́ntímaan ni-kpammu!

Dūmaan ni-gbampɔɔŋi kí pèen̄!»

5 Ti-Dindaan bí yii:

«Ama ba bíi jītí ní? Ba ní m wāĺ nan ní?

Tifaandi kɔ́-bi, bi bíi nɔ̀tī ki gítí boon!

Bi jáń ki pɔ́ɔkiǹ bijanjaliibi bimɔntiibi sɔ́kɔ sɔkɔ.

Dinyoondi kɔ́-bi bi sáń kaa fàtī,

tifaandi bí an kɔkɔ pu.

6 Un ŋūǹ ki yáb̀ee kaa ŋúń ki sáǹ ki ŋmátì,

ubaatandaan kaa ŋūǹ kí fīī u-ba.

Ŋgan pú Eefiraati mɔɔgbaŋŋee,

bi gbéetì ki lítì.

7 «Ŋma náań nì Niil mɔɔl din gbée,

a lì kii dimɔɔl din nyim gbí ki páaǹee?

8 An sá Eejipiti di jɔ́ḿ kii Niil mɔɔlee.

Kì nìn lì yii:

<Kii Niil mɔɔl nín gbí puee,

a lì kii di-nyim nín gbí ki páaǹ puee,

míǹ ní m làá gbí kí léeń kitiŋ pu

ní kí nàan̄ kitiŋ

kí kpáaǹ mu-timmu.

9 Itaamu, kpàtīí líímaan!

Janjatɔrɔkub, dūmaan ni-yil kí bɔ̄!

Bijanjaliibi ń dū bi-ba kí bíĺ,

an dàkà yii Eetiiyoopii yab nì Puuti yab,

bin tūntí agbampɔɔyee

nì Luudi yab bin bàl̀ abaatanee!

10 Ama ti-Dindaan un sá Unimbɔti Mpɔŋkɔdaan ceeyee,

an sá ipɔntoon wiiŋŋu ní.

U làá tɔ̀ u-nannanliibi ipɔntoon.

Kitàataajiki làá ŋmɔ́ bi-nanti kí díkí,

ní kí nyɔ̀ bi-fatikuu kí gbí.

Di sá yii an dāa sá saraa ní ki tīī ti-Dindaan Mpɔŋkɔdaan

ŋgan pú tiŋkin, Eefiraati mɔɔgbaŋŋi.

11 Eejipiti tiŋki kinyannyaaŋŋi,

jɔ̄m̀ Galaadi tiŋkin kí nyàab̀ a-buuŋyi kpam.

Ama a bíi kpántí inyɔkɔfi fám ní,

tiweendi tin a fōōyee kaa làá kpú.

12 Atimbun gbìl̄ a-cooi pu,

bi gbìl̀ a-yaliŋkii pu an kɔkɔ pu.

Di sá yii ubaatandaan kpéetì ubaatandaan,

ní bi-liitil gbéetì ki lítì dicilpu.>»

Neebukadineesaar lúuń Eejipiti tiŋki

13 Ŋyunti ŋun Babiloon bɔtiu Neebukadineesaar dɔ́miń kí já nì Eejipiti tiŋkee ní ti-Dindaan sòon̄ nì u-bɔnaatiliu Yeereemii yii:

14 «Ní bāakì tibɔtee Eejipiti tiŋkin,

ní yàntī bí gbìl̄-tì Miigidool tiŋkin,

bí gbìl̄-tì Meemifiisi nì Tapaneesi timmun.

Lìmaan yii:

Yīkìí yūĺmaan kí bɔ́ntí ni-ba,

di sá yii kujaau bíi nà ni-kɔŋkɔnnaatɔb.

15 Ba pu ní a-waal din sá unajee

lítì kaa ŋúń ki yúl̀ ní?

Ti-Dindaan nín kpìb̄-dèe,

16 dì kpīntì ní ŋkpitim pu.

Bijanjaliibi lítì ki dɔ̄ tɔb pu.

Bi lì tɔb cee yii:

<Tí yīkì kí kpì ti-tiŋkin

kí sāǹ kí wàatī kujaau kun nàantí nee.

17 Diyindi din bi làá pɔ̄ Eejipiti bɔtiu Faarooyee sɔ̀.

Kufuu, kufuu, ama kufuu fám!

18 «Ubɔti un bi yíì ti-Dindaan

Mpɔŋkɔdaanee nín sòon̄ puee sèé:

Kii Tabɔɔr nín sá dijool

ní Kaarmeel jool bí tiŋku caŋinee,

míǹ ní u làá dāan̄.

19 «Eejipiti yab,

bɔ́ntímaan ni-wanti kí nīn cá kuyuŋu.

Meemifiisi tiŋki làá kpántí kuteeu.

Bi làá nàan̄-kì

ní báà uniseen kaa ti làá nīn kóò ki-ni.

20 «Eejipiti nìn sá unasal un ŋān̄ee ní!

Ama dinaagandi diba nyánní ŋgan pú

ki dɔ́miń ki báaǹ u-pu.

21 Bijanjaliibi bin kì nìn dée

nìn bí ní màlmal kii dinajapɔmbilee.

Ama bi mun fātì bi-boon ki tīī-kì,

bi-kɔkɔ sáǹ dicilpu,

baa ŋúń ki yúl̀.

Di sá yii nnaabu wiiŋŋu dòoń bi-pu,

ŋwiin ŋun m làá dáaĺ bi-tafalee.

22 Binannanliibi fāā mɔ̀ɔɔ ki dòoń

kí léeń Eejipiti tiŋki pu

kii bidɔgaaliibi di ŋúb́ ncɔkɔmu

kí dāá gāā isufee.

Niinee Eejipiti yab janjaliibi sáń kii

ukoobu nín sáń pu kaa ŋáań kuwoouee ní.

23 Ti-Dindaan bí yii:

<Bi bíi gà ki-bambaŋku,

kubambaŋŋu kun poon ubɔ kaa nìn ŋūǹ kí kɔ́ee.

Di sá yii bi nìn wīikí ki jítiǹ inaakitoon,

ubɔ kaa ŋūǹ kí kàaǹ-bi.

24 Icoo kɔ́ Eejipiti kitinnyanyaaŋŋi,

bi dū-kì ki ŋá ŋgan pú nibuliŋ ŋaan.>»

25 Ti-Dindaan Mpɔŋkɔdaan, Isirayeel yab Nimbɔtiu bí yii: «M làá dáaĺ Tabeesi yab waal Amɔn nì Eejipiti yab nì bi-waaŋi nì bi-bɔtiibi ní Faaroo nì bin kɔkɔ máká u-puee tafal. 26 M làá dū-bi kí ŋá bin nyàab̀ kí kpɔ̀-bee ŋaan, an dàkà yii Babiloon bɔtiu Neebukadineesaar nì u-janjaliibi ŋaan.

«Ama boonee, binib làá dāá fàtīí kɔ́ Eejipiti tiŋki kii dooooyee.» Ti-Dindaan di sòon̄ míǹ.

Ti-Dindaan làá fīī Isirayeel yab

(Kpèè Yeer 30.10-11)

27 «Sii m-tɔntɔnliu Jaakɔb, taa fàŋkì,

Isirayeel, taa yàntī a-pɔbil ń bīil̀.

M làá fīī-si kí nyāntí ntindandatimun,

ní kí gíiǹní a-biyaamu mun bí kuyuŋunee.

Jaakɔb, a làá fàtīí gítiń nì dimákal

kí nīn bí ŋgbansɔŋfin.

Ubɔ kaa dāa gíti páb̀-si.

28 Sii Jaakɔb m-tɔntɔnliu, taa fàŋkì.

Man a-Dindaan di lī yii m bí a-cee.

M làá kúntí atimbun ŋin poon

m nìn jìn̄-si a yàl̄ ki kɔ́ee.

Ama siiyee, maa làá kúntí-si.

An sá tiŋman yii m dáaĺ a-tafal,

ama an sá kí sāŋkì-si ní.

Di sá yii maa ŋūǹ kí yàntī-si

kii a sá maanyiibee.»