Yeereemii 48

Tin ti-Dindaan sòon̄ Moowaab yab puee

1 Ti-Dindaan Mpɔŋkɔdaan, Isirayeel Nimbɔtiu nín sòon̄ Moowaab pu puee sèé:

«Ba naabuŋu di jéetì Neeboo tiŋki pu míǹ?

Bi nāaǹ-kì múb!

Icoo cúú Kiiriyatayiim tiŋki,

bi jáń ki fōō-kì!

Kitiŋ kin bi máń digundi ki túee,

ba cooi íǹ bulifi dee,

kì lítì.

2 Kun nìn sá Moowaab nyootee kúntì.

Binib bɔ́ntì kí cáań nnaabu kí tɔ̄ Eesbɔn tiŋki pu ki lì yii:

<Tí cùmaan kí kúntí kitiŋ nee

atimbun kansikin!>

Si mun Madimeeni, bi làá pée nàan̄-si ní,

kujaau jìn̄ ki cúú-si dee.

3 Bi gbìl̀ ibiil pu doooo Ooroonayiim tiŋkin yii:

<Bi nāaǹ tikɔkɔ.

Ba naabukpaaŋŋu ŋúǹ dee!>

4 Bi wīī Moowaab tiŋki.

Bi gbìl̀ ki-biyaamu biilii pu.

5 Binib dàb̀ Luwiiti gbantaŋki ki sūǹ.

A yaa sìntī Ooroonayiimee,

a gbìl̀ kunimbaau biilii pu.

6 Sām̀maan kí fīī ni-ba!

Ní gbíntí kuteeun

kii kumooun maŋkee.

7 Moowaab, a nìn máká a-tuuŋŋi nì a-gaajati pu ní.

Ama bi làá já kí fōō si mun.

Bi làá cúú a-waal Keemoosi nì a-tandambi

nì a-kpilib kí cùnnì kuyuŋu dicilpu.

8 Un nàantí tikɔkɔee làá yìiǹ ntimu kɔkɔn,

waa làá súntí báà kibaba pu.

Bi làá nàan̄ ditantakal,

ní kí bīil̀ laakin tɔ́kɔ́ee,»

kii ti-Dindaan nín sòon̄ pu ki síiǹee.

9 Tīīmaan Moowaab tiŋki ifeen,

kí ŋmā kí yīkì kí ŋàaǹ!

Ki-timmu làá kpántí kuteeu

ubɔ kaa ti làá nīn kóò mu-ni.

10 An sá mbusu ní ki tīī un tūǹ

ti-Dindaan tundi nì bugbambuee.

Mbusu sá ki tīī un kaa là

fatiku ń táká u-tàataajikee.

11 Doooo Moowaab biyatin ní u bí ŋgbansɔŋfin.

Baa cúú-u ki cūnnì kuyuŋu ki ká.

U nìn pée dɔ̄ soooo

kii ndaam min baa tóoń ki lēē tidacaal,

kaa kpáatì-mì ki ŋá dibool diban ki kpáal̀ee ní.

An puee ní u-mɔŋŋu nì u-sɔnsɔfiŋu kaa kpántì.

12 An pu ní ti-Dindaan bí yii: «Ŋyunti bí ki dòoń, m làá tɔ̄ń binib bí dāá kpáatí-mì kí ŋá aboon aban. Bi làá kpáatí ndaam min kā tidabuti poonee kí fá ní kí wīī-tì. 13 Bi làá dāá nīn cáá diwaal Keemoosi pu icoo. Kii Isirayeel yab nín nìn cáá diwaal Beeteel din pu bi nìn mákée pu puee.

14 «Moowaab yab,

mana ní ni ŋūǹ kí lì yii:

<Ti sá bibaatandambi,

bijanjaliibi bimɔmmɔntiibi.>

15 Bi nāaǹ Moowaab tiŋki,

bi dàb̄ kí jáǹ ki-timmu.

Bi cúú ki-nipɔmbi bin cáá laafiyee

ki cáǹ kí kpɔ̀.»

Ubɔti un bi yíì ti-Dindaan Mpɔŋkɔdaanee di sòon̄ míǹ.

16 An kaa làá sūŋkì, bi làá nàan̄ Moowaab tiŋki,

nnaabu làá jēetí ki-pu kpalaa.

17 Nimbi ki-kɔŋkɔnnaatɔb bin nyí-kì tiŋanee,

ní cùú ŋámaan-kì fɔ̀ɔ́.

Baa! Mpɔn ŋun kaa cáá juti nee,

mbɔtikpandɔ ŋun cáá tinyool nee

cúu kɔ́fàa!

18 Diibɔn nibul,

kpákatí a-nyooti beejal pu,

kí dāá kàl̄ titampummool pu.

Un nāaǹ Moowaab tiŋkee

dòoń kí já nì si,

u bíi wìil̄ digundi din māntìi tú-see.

19 Arooweer nibul,

cùú yūĺ didandi pu

kí nīn cɔ́ŋkí ki kpèé.

Ní bàlifì bin sáń kí ŋmátée yii:

«Ba di ŋá ní?»

20 Bi làá kíí yii:

Bi nàn̄ Moowaab tiŋki dúsi dusi!

An puee icoo kɔ́-kì.

Ní fáámaan ibiil bí jòò-ni.

Ní bāakìmaan Arinɔn buŋgbandi pu yii

bi nāaǹ Moowaab tiŋki.

21 Ditafadaaldi lítì ditantakal timmu pu nì Oolɔn nì Yaasa nì Meefaati 22 nì Diibɔn nì Neeboo nì Beeti-Dibilatayiim timmu pu, 23 nì Kiiriyatayiim nì Beeti-Gamuul nì Beeti-Meeyɔn timmu pu 24 nì Keeriyooti nì Boosiraa nì Moowaab timmu mun pìl̄ee nì mun bí ndandatee pu.

25 «Moowaab pɔŋŋu wáŋkì,

u-kpabil kɔ́fì»,

ti-Dindaan di lī míǹ.

26 Moowaab dākafì yii u sá ukpaan ki jítiǹ ti-Dindaan ní! Bí nyùntī-u ndaam ú gbí áli kí wùliŋkì. Ŋyunti bāań bí bèel̀ u mun dee! 27 Moowaab, kéè a nìn bèel̄ Isirayeel naa! Isirayeel mun kaa nìn sá unaayuuyaa! Kin ba pu ní a nìn gbákafí diyil ki bèel̄-u ŋyunti ŋun kamaa a yaa nìn sòoǹ u-puee ní.

28 Moowaab yab, yīkìí fámaan ni-timmu.

Ní cùú nīn kóòmaan itaŋkpalɔkɔn!

Nín̄ bímaan kii dibeenanjilee.

Di pāantí di-diiku nsitim watil pú

laakin unil kaa ŋūǹ kí bèe ní.

29 Ti gbìl̄ bi sòoǹ Moowaab yab lambil pu.

Bi yòontí bi-ba yilpu an kaa cáá bí lì!

Ba lambil díǹ dee!

Ba badàkatam dee!

Ba bayoondi dee!

Ba mɔnti dee!

30 «M nyí u-lambil pu, ti-Dindaan nín sòon̄ míǹ.

U càfī tibɔti ní an kaa cáá taapu,

ní tin u ŋáańee kaa túĺ nsan.»

31 An pu ní m bíi yáliŋkí Moowaab pu.

M gbáà ibiil bí jòò Moowaab tiŋki kɔkɔ.

M bíi tíminsí Kiiri-Eereesi yab pu.

32 M sūǹ sii Sibima nibul pu

ki jítiǹ Yaseer yab nín sūǹ a-pu puee.

A nìn sá kii fiinyi subuee ní.

A nìn tɔ́ apan an lákatì Ŋyaam mɔɔl pu,

ŋi nìn lālim̀ ki tin bàn̄ Yaseer tiŋki.

Ama unàanli páatìi jéetì

a-fiinyi biliŋ nì a-kpaajinti pu.

33 Ifaal nì dipɔɔpindi kúntì

asubiŋmɔkaa kpaaŋŋi nì Moowaab tiŋkin.

Ndaam dóò tilɔn poon,

bininjab bin tà ki fɔ́bití fiinyi biliŋ

ki nyāntí ndaamee kaa ti bí.

Dipɔɔpindi kuŋkuuntii kúntì.

34 Eesbɔn yab bíi gbáà ibiil bí jòò-bi. Bi gbìl̀ bi-pu Eeleeyalee nì Yaasa, ní kí yòon̄ Soowaar kí tin sāā Ooroonayiim nì Eegilati-Seelisiya. Áli gba Niimriim buŋŋu fóotì.

35 Ti-Dindaan bí yii: «M làá kúntí Moowaab tiŋkin bin di cá ŋgbantamu pu ki ŋáań bisaraawɔkaabi ki tùutī talaalub ki tìì awaayee.»

36 M bí ki sūǹ Moowaab yab nì Kiiri-Eeseesi yab pu. M-yaliŋkii bí kii kiwulii nín sūǹ puee ní, kun puee tigaajawan tin kɔkɔ bi nìn kóoǹ ki kpúkuǹee wáŋkì. 37 Bininjab kɔkɔ kōol̀ abaakpan, ki cáń bi-nyimpuliŋ. Bi gífì gífì bi-ŋalii njimu ki dū kutukub ki gbìn̄ bi-cammu. 38 Moowaab diiŋŋi yilpu bi nín bɔ̀b̄ puee nì kpacantib kɔkɔ puee, bi gbìl̀ ikpiisilan pu ní. «M wīī Moowaab kii bi nín wìil̄ dibool din kaa ti bí tibanee puee ní.» Ti-Dindaan di lī míǹ. 39 Baa! Bi nùkū Moowaab tiŋki púb! Nín̄ yáliŋkímaan! Moowaab sáǹ ki kátì, ba cooi dee! Ki-kɔŋkɔnnaatɔb kɔkɔ bèel̄-kì ní kì kɔ́ dinyoondin.

40 Ti-Dindaan nín sòon̄ puee sèé: «Binannanliibi kpántì kii kaajiikuee ki ŋàaǹ ki kpátí u-feeŋyi Moowaab tiŋki pu.»

41 Bi jáń ki fōō ntimu,

ki gbáń ki wīī sintil difɔkɔŋi.

Yaadalee, Moowaab baatandambi fāŋkì kii unimpu un kā imatiŋween puee ní.

42 Bi nāaǹ Moowaab tiŋki,

an kaa ti sá dinibul.

U nìn dākafì yii u sá ukpaan

ki jítiǹ ti-Dindaan ní.

43 Dinyoondi nì mbòó nì kulaaŋŋu

dɔ̄ ki cí nimbi Moowaab yab.

Ti-Dindaan di lī míǹ.

44 Un yaa láa bíi sáń dinyoondee

làá dāá jēetí mboon.

Un yaa láa nyáń mboonee

làá cùú kɔ́ kulaaŋŋun.

Tiŋman, dibindi din m làá dāá dáaĺ bi-tafalee,

m làá dāá yàntī tíǹ gbanti ń jēetí Moowaab yab pu.

Man ni-Dindaan di lī míǹ.

45 Bin bíi sáńee kaa ti cáá mpɔn.

Bi sáǹ ki kɔ́ Eesbɔn tiŋkin.

Ama ŋŋmi ŋubɔ nyánní Eesbɔn tiŋkin,

Siiwɔn bɔtiu beecindin.

Ŋu dɔ́miń ki wùn̄ dinibul din cáá kufuu nee tiŋki

kí yòon̄ ki-kpaanyɔkɔ

kí cáá sāā ki-kansikin.

46 Moowaab, an sá nnaabu ní ki tīī-si!

Keemoosi nibul, an dóò a-pu dee!

Bi cúú a-jipɔmbi nì a-bisalib

ki cūnnì kuyuŋu.

47 Ama iwiin bí ki dòoń,

m làá gíiǹní Moowaab yab bin bi cúú ki cūnnì kuyuŋuee.

Ti-Dindaan di lī míǹ.

Ti-Dindaan nín sòon̄ Moowaab bɔti pu puee nín gbèentí laakiŋyee dee.