<<    <     Amoosi     8     >    >> 
Dileedakal dinanaatiil: asubil kukabiku
8
1 Ti-Dindaan Unimbɔti nìn lēē asubil ŋin mántèe kukabiku ki dàkā-mi. 2 U nìn bālifì-mi yii: «Amoosi, ba ní a wāĺ?» Ní m kíí-u yii: «Kukabiku nì asubil ŋin mántèe.» Niinee ní ti-Dindaan bí-mi yii:
«M-nibul Isirayeel mántì ki bàn̄ dikúntil.
Maa ti làá dūú pɔ̄-bi.»
3 Ti-Dindaan Unimbɔti di lī yii:
«Yaadalee ilan in bi gà dibeecindee
làá dāá kpántí ikpiisilan.
Anikpil làá dāá nīn wīikí tikpilku.
Bi làá dāá dū anikpil kí fá an kɔkɔ pu.
Án làá dāá ŋmīĺ an kɔkɔ pu fɔ́ŋfɔŋ!»
Binyampoobi nimbineeliŋu
4 Nimbi bin tà biwɔfib pu ki còom̄ee,
nimbi bin là kí kúntí binandambi kitiŋ nee puee,
ní pīlifìmaan tibɔti tin m làá sòoǹ nee.
5 Ni kā ki lì yii: «Ba dal ní uŋmapɔɔn jiŋaaliu
làá nín jītí tí ŋmā kí nyāfì ti-kpaajinti dee?
Ba dal ní ŋwiŋŋuŋfikaa làá nín jītí
tí ŋmā kí nyāfiǹ binib bilee dee?»
Ti làá bàtī tiwaŋŋmantikaal wíiŋŋu pu,
kí gbéeǹ animbil ŋmàntikaati nyiŋfiŋu pu,
kí tútí ti-saniyab bí taa tí nín̄ ŋmàntī tiwan deedee.
6 Ti làá dū animbil kí dā unandaan
ní kí dū kalaa nimbiliŋ kí dā usoodaan.
Ti làá nyāfì kí kpáaǹ tijaliŋgbiti.
 
7 Ti-Dindaan pūtì ní ki lī yii:
«Kitiŋ kin pu Jaakɔb naantiibi gúntí bi-bee puee,
m kpá kí súntí tin kɔkɔ bi ŋáańee pu.»
8 An puee kitiŋ nee làá cìŋkì,
ní ki-nib kɔkɔ ń kàl̄ dikpool.
Kii Eejipiti mɔɔl Niil nín yaa gbí an yíkí puee,
míǹ ní kitiŋ nee làá yīkì yilpu,
ní kí fàtīí lítí bɔ̀b.
 
9 Ti-Dindaan Unimbɔti lī yii: «Ŋwiin gbantee,
m làá dāá yàntī ŋwìiń ń jēetí kuwiŋkaŋu pu,
ní kí yàntī kitiŋ kɔkɔ ń kɔ́ dibɔmbɔndin ŋwiimpu.
10 M làá yàntī ni-jiŋaalib ń kpántí akpoo
ní kí yàntī ni-laŋyi kɔkɔ ń kpántí ikpiisilan.
Báà ŋma làá dāá nīn pēē kpɔsatab ní.
Báà ŋma làá dāá pée kòol̀ diyibaakpandi
kii unil jipɔmbaabil nín yaa kpíì u kòol̄ puee.
Ŋwiin gbanti làá dāá kúntí nì ntuntun ní.»
11 Ti-Dindaan Unimbɔti di lī yii:
«Ŋwiin bí ki dòoń, m làá dāá dū ŋkùm kí tɔ̄ kitiŋ nee pu.
Ŋkùm làá dāá cúú binib,
ama kaa dāa sá tijikaal kùm.
Nnyinnyoo làá dāá cúú binib,
ama kaa dāa sá nnyim nyinnyooŋu.
Ama man ni-Dindaan nyɔɔbundi
kùm nì di-nyinnyooŋu di làá dāá cúú-bi.
12 Binib làá dāá nīn tú ki yìiǹ an kɔkɔ pu,
kí yīkì tiŋku ubɔ kí cáá sāā un kíǹee,
kí yòon̄ ŋgan pú kí cù ŋwìiń nyalaŋki pú,
ki bàà pée nyàab̀ kí gbìl̄ man ni-Dindaan nyɔɔbundi
ama kaa làá dāá ká.
 
13 «Ŋwiin gbantee, bisapɔnnyaambi
nì binaacimpɔmbi làá dāá kpú nnyinnyoo.
14 Bin kɔkɔ pùtī Samaarii waal yindi,
bin lì yii: <Nì Daani waal yindi pu!>
àá <nì Beerseeba waasaŋŋu yindi puee>,
bi-kɔkɔ làá dāá lítí kaa làá ti yīkì.»