Amoosi 9

Dileedakal diŋmooŋmootiil

1 M ká ti-Dindaan yú nsaraafan pu ki lì yii: «Gbá kí wìil̀ jaantalkub yilpu ní taapu ń cìŋkì!

Gbá kí wìil̀-bi bí lítí kí tàbitì bi-yiliŋ.

Bi-kansikin bin kíǹ kaa kpíìyee,

m làá dū ntàataajimu kí kpɔ̀-bi.

Báà unil kaa làá dāá ŋmā kí sāǹ,

ní uniseen kaa làá dāá ŋmátí.

2 Báà bi yaa pɔ́ɔǹ kí kɔ́ ditaŋkpiilinaaa,

m làá dāá cù niin kí fàtīí gíiǹní-bi.

Bi yaa láa tí jɔ́m̀ yilpuɔɔɔ,

m làá dāá cù niin kí sìntīń-bi.

3 Bi yaa láa bál̀ Kaarmeel jool yilpu kúntí kuntaaa,

m làá dāá cù niin kí cúuń-bi.

Bi yaa láa sáǹ ki bál̀ tiŋku taapu ḿ taa ká-baaa,

m làá dāá tɔ̄ tiŋkun koobuu ú jūntì-bi.

4 Bi-nannanliibi yaa láa jáń ki pɔ́ɔkiǹ-bi

ní ki cúú-bi kuyuŋu ki cūnnì bi-tiŋkinee,

m làá dāá tīī-bi mara bí pɔ̀fì-bi.

M-nimbil làá dāá nīn cɔ́ bi-pu,

kí ŋá-bi tikpitil, kaa sá tiŋan.»

5 Ti-Dindaan Unimbɔti Mpɔŋkɔdaan

yaa gbēē kitiŋee, kì cìŋkī ní,

ní ki-nib kɔkɔ ń kàl̄ dikpool.

Kii Eejipiti mɔɔl Niil nín yaa gbí an yíkí puee,

míǹ ní kitiŋ nee làá yīkì yilpu,

ní kí fàtīí lítí bɔ̀b.

6 U máń u-kɔŋkooŋŋu yilpu fɔ́ŋŋŋ

ki dū kutagbɔŋu ki dāntì kitiŋ pu.

Úǹ di yíì tiŋku nyim

ní ki cáá-mì ki yàantí kitiŋ pu.

Úǹ ní bi yíì yii <Ti-Dindaan>.

Dibɔkpil dambi bɔsooŋyi

7 Ti-Dindaan lī yii: «Isirayeel yab,

ni pɔ̄ɔ̄ m-cee kudaau ki jítiǹ Kuusi yabaaa?

M nyántì-ni Eejipiti tiŋkin,

ama ki nyántì Fiiliistii yab Kafitoor tiŋkin,

ní ki nyántì Aram yab Kiiri tiŋkin.»

8 Ti-Dindaan Unimbɔti nimbil cɔ́

Isirayeel beel din fōō dibɔkpil nee pu.

U lī yii: «M làá kúntí-dì kitiŋ pu.

Ama maa làá nàan̄ Jaakɔb naantiibi kɔkɔ.

9 Di sá yii m làá tīī mara

ní bí jáká Isirayeel timbundi

atimbun ŋin kíǹee kɔkɔ poon,

kii bi nín dù kidicaai kí jáká tiwan pu,

báà kitaŋkpalii kaa lùntī kí lítée.

10 M-nibul kansikin bikpitiŋaliibi

làá kpú kujaaun,

bíǹ bin lì yii:

<Nnaabu ŋubɔ kpá kí làá dāan̄,

u làá sútiń kí pìlīń-ti!>»

Nnaabu yaa láa jítèe bɔti

11 «Ŋwiin gbantee m làá dāá yòon̄

Daafiidi bìŋ́ku kun bíi lítée kí yóoń,

ní kí ŋéeb́ ku-digbuŋweeŋyi kɔkɔ,

kí mā ku-guŋŋi ŋin lítì ki dɔ̄ee,

dí fàtīí gítí di nín nìn bí puee.

12 Án nín làá ŋá pu Isirayeel yab

ń dāá fàtīí fōō Eedoom yab cee

nì atimbun ŋin kíǹee kɔkɔ yab cee

ntimu mun di nìn sá man yɔmuee.

Man ni-Dindaan di sòon̄,

ní ki làá yàntī án ŋá míǹ^a!»

13 Ti-Dindaan gíti lī yii:

«Ŋwiin dòoń

bi làá dāá cā tikpaajin tikpil

án nīn dɔ̄ kí tin sāā

ŋyunti ŋun bi làá kpɔ̀ tipɔnee.

Míǹ mbaantiim, bi làá dāá kìtī fiinyi biliŋ

án nīn dɔ̄ kí tin sāā

ŋyunti ŋun ní bi làá bɔ̄l̀ bileeyee.

Niinee ndapɔm dāa pùub̀ ajoon pu

ní ki còol̀ ŋgbantamu kɔkɔ pu.

14 M làá fàtīí gíiǹní m-nibul Isirayeel yab bi-tiŋkin

bí fàtīí mā bi-timmu mun wīil̀ee kí kàl̄.

Bi làá dāá cóoń fiinyi sufii kí nyɔ̀ i-daam.

Bi làá kpɔ̀ tikuŋfaal kpaaŋŋi kí dāá ká kí jī.

15 M làá dāá fàtīí gíiǹ m-nibul

kí kàan̄ bi-tiŋki pu.

Baa làá ti jà-bi kitiŋ kin

m tīī-bee pu jaanjaan.

Man ni-Dindaan ni-Nimbɔtiu di lī míǹ!»