Oobadiya 1

Kugbɔŋu kun sòoǹ

Oobadiya

puee

1 Tibɔti tin ti-Dindaan Unimbɔti lēē ki dàkā Oobadiyee. U nín sòon̄ Eedoom tiŋki pu puee sɔ̀.

Ti-Dindaan yāntì ti gbìl̄ tibɔti nee,

bi tú ntuun ŋubɔ atimbun kɔkɔn ŋu lì yii:

«Yīkìmaan! Tí cùú já nì Eedoom tiŋki!»

2 Ti-Dindaan lī yii:

«Eedoom, atimbun kɔkɔnee,

m làá yàntī á kpántí kiwaŋwaai.

Báà ŋma làá nīn kpèé ki sìŋkīǹ-si.

3 A-lambikpaandi di kíiĺ-si!

A kóò itaŋkpalɔkɔn,

ní ki máń a-diiŋŋi ki tɔ́kɔǹ ajoon yilpu,

ní ki lì yii:

<Ŋma di ŋūǹ kí kpákatí-mi taapu?>

4 Báà a yaa là kí ŋàaǹ kí kɔ́ kutaa kii ukaalunee,

kí mā a-diiku iŋmalbijaa kansikin,

see m kpákatìń-si taapu!

5 Binaayub àá kunyeeu fukuliliibi

yaa kɔ́ a-puee,

bi yòontí tin kɔkɔ bi ŋūǹee ní,

baa kīntí-si báà tiba.

Bitɔntɔnliibi bin kìtī fiinyi subiliŋee

yaa kɔ́ a-saakunee,

tin làá pée kíńee di sá tilulifikaal.

6 Bi fúkúl̀ nimbi Eesayuu naantiibi pílpil,

bi bīitì ni-gaajawanti tin bí dibalinee pu!

7 Bi jìn̄-si ki nyántì a-tiŋkin,

si nì bin pēē kinyɔkɔee nyáń a-boon.

A-bɔɔmɔntiibi jáń ki pɔ́ɔkiǹ-si.

Si nì bin nìn jīǹ disambibaantiilinee

bíi pīil̀-si titalindi taapu taapu.

Bi sòoǹ ni-pu yii: <Waa ti cáá diyil!>

8 Tiŋman, man ni-Dindaan nín lī puee sɔ̀.

M-ŋuul wiiŋŋu dalee,

m làá kpɔ̀ kí céetí biciŋfitiibi Eedoom tiŋkin,

maa làá kíń Eesayuu jool pu

unyil ubambaanti.

9 Teeman^a tiŋki, dinyoondi làá dāá kɔ́ a-janjaliibi,

án nín làá ŋá pu bí kpɔ̀ kí kúntí

unil sá kamaa Eesayuu jool puee.

Eedoom yìntitam

10 A fúkúl̀ ki kūū a-nabiki,

Jaakɔb naantiibi.

An pu ní icoo làá cúú-si tikpil

ní bí kúntí-si kí nīn pée cá jaanjaan.

11 Ŋwiin ŋun a nìn yú ki kpèé

binannanliibi jáń ki pɔ́ɔkiǹ u-janjaliibi

ki kɔ́ u-tiŋkin,

ki tɔ́ Jeerusaleem pu kasee,

a mun nìn bí kii bi-kansikin ubɔee dee.

12 Eedoom, aa bàà nìn máaǹ

kí nīn fàal̀ ŋyunti ŋun

a-nabiki kɔ́ dinimbinaamandinee.

Aa bàà nìn máaǹ kí nīn fàal̀

ŋyunti ŋun bi bíi nàantí Juuda yabee.

Aa bàà nìn máaǹ kí nīn bíi lāā-bi

ŋyunti ŋun bi kɔ́ dinimbinaamandi poonee.

13 Aa bàà nìn máaǹ kí kɔ́ m-nibul tiŋkin,

ŋyunti ŋun bi nìn bíi nàantí-kèe.

Aa bàà nìn máaǹ kí nīn fàal̀

u-nimbinaamandi wiiŋŋu dal.

Aa bàà nìn máaǹ kí yòon̄ u-gaajawanti

ŋwiin ŋun bi nìn bíi fúkuĺ-uee.

14 Aa bàà nìn máaǹ kí nīn yú isampuyakati pu

ki kù bin nìn sáń kí ŋmátée,

kaa bàà nìn tí máaǹ kí dū bin baa kūūyee

kí ŋá binannanliibi ŋaan

nnaabu wiiŋŋu gbanti dal.

15 Di sá yii ti-Dindaan wiiŋŋu ŋun

u làá sòoǹ atimbun kɔkɔ bɔtee tóobiń.

A nín ŋá bin beeyee puee,

míǹ ní bi làá téeǹ-si.

A-tuŋkpitiŋ làá dāá fàtīí gítí a-pu ní.»

Isirayeel làá tɔ̀ Eedoom ipɔntoon

16 «Nimbi Isirayeel yab, kii ni nín nìn nyùn̄

m-ŋuul kii ndaamee

m-circir jool puee,

míǹ mbaantiim ní atimbun kɔkɔ

làá dāá nyɔ̀-dì kí taa gbèen̄.

Ŋi làá dāá nyɔ̀-dì kí gbí,

ní boonee kí wāŋkì.

17 Ama bin yaa láa bí kaa kpíìyee

làá dāá sāǹ kí kɔ́ Siiyɔn jool.

Dì làá fàtīí kpántí circir jool.

Jaakɔb naantiibi làá dāá

fàtīí fōō bi-tiŋki

bin nìn fōō-kèe ŋaan.

18 Jaakɔb naantiibi làá dāá nīn sá kii ŋŋmee ní,

Jooseefi naantiibi làá dāá nīn sá kii diŋmilimbilee.

Ama Eesayuu naantiibi làá dāá nīn sá kii timoolee ní.

Bi làá dāá wà Eesayuu naantiibi ní kɔkɔ múb.»

19 Bin kóò ŋgiil pú tiŋkee di làá dāá nīn yì Eesayuu jool nì Seefeelaa tiŋki kin pu Fiiliistii yab kóòyee. Bi làá dāá nīn yì Eefiraayiim tiŋki nì Samaarii tiŋki mun, ní Beenjameen ń dāá nīn yì Galaadi tiŋki.

20 Isirayeel beel ŋgan pú yab bin bi nìn cúú ki cūnnì kuyuŋuee làá dāá kpántí dijanjakitikpaandi. Bi làá dāá já kí fōō Kanaan yab tiŋki kí tin sāā Sareepita tiŋki. Jeerusaleem yab bin bi nìn cúú ki cūnnì kuyuŋu bi bí Seefaradee làá dāá já kí fōō ntimu mun bí ŋgiil púee. 21 Bi nín jáń ki jíń mimmee ní bí jɔ̄m̀ Siiyɔn jool pu. Niin ní bi làá dāá nīn bí ní kí jī Eedoom jool pu dibeel.

Ti-Dindaan di dāa sá ubɔti!