An bālifì yii binib ń kpántí bi-bimbim
2
1 Nimbi atimbun ŋin kaa cáá icooyee,kóom̀maan tɔb kí kpāfì kí nīn nyìkī tɔb pu,
2 kí wàatī ní ní nín kpántí kii
timool tin kubuŋu yòontí ki féeń ŋwimbaantee.
Ti-Dindaan bum làá dāá jēetí ni-pu.
Ti-Dindaan ŋuukpaandi wiiŋŋu làá dāá jēetí ni-pu.
3 Nimbi bin kɔkɔ bí kitiŋ nee pu ki sīntiǹ ni-ba taapu,
ki tɔ́ ti-Dindaan marabee,
nyàab̀maan ti-Dindaan.
Nín̄ ŋáaḿmaan tin bí deedeeyee,
kí sìntīmaan ni-ba taapu Unimbɔti nimbiin.
An yaa yíì u-ŋuul wiiŋŋu dalee,
u làá dāá fīī-ni.
Ti-Dindaan sòon̄ ki bíikì ŋwìiń jeetilaŋki pú nibuliŋ pu
4 Binib làá dāá yīkì kí fá Gaasaa tiŋki,
ní bí nàan̄ Asikeelɔn tiŋki.
Bi làá dāá jà Asidoodi yab kuwiŋkaŋu pu,
ní kí kpìtī Eekrɔn tiŋki.
5 Mbusu dɔ̄ ki cí nimbi Kafitoor yab
bin kóò ditiŋkugbandee.
Kaana, Fiiliistii yab tiŋki,
ti-Dindaan bɔsooŋyi dàn̄ a-pu.
M làá kúntí-si,
di sá yii binib kaa ti kóò a-pu.
6 Tiŋku kpaanceetii dāa kpántí kunaakpaapɔɔu,
laakin bipikpaaliibi kpàá tiwaŋkutee,
nì laakin bi làá mā ipii naabakatee.
7 Juuda yab bin kíǹ ki bí dimaŋfalinee
làá dāá jī ditinjandi gbanti.
Niin ní bi làá dāá nīn kpàá bi-waŋkuti,
ní kujoouee, bí cùú kɔ́ Asikeelɔn yab timmun
kí dòon̄.
Di sá yii ti-Dindaan bi-Nimbɔtiu
làá dāá sɔ̄ bi-saai,
ní kí cúú tin poon bi bée kí kpántí.
Ti-Dindaan sòon̄ ki bíikì ŋwìiń nyalaŋki pú nibuliŋ pu
8 «M gbìl̄ Moowaab yab siibiliŋ
nì Amɔn yab beelii pu.
Bi sīī m-nibul
ní ki fōō di-timmu ki kútì bi-yɔmu pu.
9 An pu ní man ni-Dindaan Mpɔŋkɔdaan,
Isirayeel Nimbɔtiu pūtì ki lī yii:
<Moowaab tiŋki làá dāá kpántí kii Soodoom tiŋkee,
ní Amɔn yab tiŋki mun ń kpántí kii Goomoora tiŋkeea.
Bi-tiŋki làá dāá kpántí ikuŋkum
nì diyataŋkpal kí nīn cá jaanjaan.
M-nibul yab bin làá dāá kíńee làá dāá fūkul̀-kì,
m-timbundi yab bin kíǹee làá dāá fōō-kì.>»
10 Bi-bayoondi puee, tipaal tin bi làá dāá fōōyee sèé.
Di sá yii bi sīī ti-Dindaan Mpɔŋkɔdaan nibul
ní ki fōō di-timmu ki kútì bi-yɔmu pu.
11 Ti-Dindaan kaa làá dāá tàan̄-bi,
u làá dāá kúntí awaa kɔkɔ kitiŋ pu.
Atimbun ŋin bíń ndandatee
làá dāá gbàan̄ u-nimbiin laakin ŋi bée.
Ti-Dindaan sòon̄ ki bíikì ŋgan pú nì ŋgiil pú nibuliŋ pu
12 «Nimbi Eetiiyoopii yab mun,
m làá dāá yàntī ní kpúń kujaaun ní.»
13 Ti-Dindaan làá dāá já nì ŋgan pú tiŋki
ní kí dāá nàan̄ Asuur tiŋki.
Niiniifi tiŋki làá dāá kpántí ataŋkpakpukub,
kitiŋkuliŋŋi kii kuteeuee.
14 Kitiŋ kansikin nì kansikin
ní tiwaŋkuti dāa dɔ̀.
Tiwaŋkuti kɔkɔ nì ti-buluku,
atulinjoo nì nlabinsamu dāa dɔ̀
jaantalkub yilpu ní.
Bi dāa gbìl̀ adiin tɔkɔlab pu
nnɔmbiyaamu siim pu.
A tin pée lì yii a kóò kitiŋinee,
tin a làá dāá kée di sá adigbun nì idɔ.
15 Kpèèmaan kitiŋ kin nìn bí dipɔɔsɔŋkilin
ki máká ki-ba pu ki lì yii:
«Man di bí, m-boonee ubɔ gíti kpée.»
Too, Niiniifi kpántì ataŋkpakpuku ŋma ní,
tiwaŋkuti kɔŋkooŋŋu.
Bin kɔkɔ jītí ki-caŋinee búǹ ifoon
ki dɔ̀tī-kì dinyuncul.