Kugbɔŋu kun sòoǹ
Sakari
puee
TIN TI-DINDAAN LĒĒ KI DÀKĀ SAKAREE
Ti-Dindaan yíì Isirayeel yab bí kpántí bi-ba
1
1 Daariyusi nín jíń dibeel dibinliliitiil ŋmaniniitiu poonee, ní ti-Dindaan sòon̄ nì u-bɔnaatiliu Sakari, Baraaki jipɔɔn, Didoo naantiiu.2 U bí-u yii: «Ti-Dindaan fōō ni-baabi pu diŋuul ŋkpitim pu.» 3 Á tùkù Isirayeel yab yii ti-Dindaan Mpɔŋkɔdaan nín lī puee sèé yii: «Fàtīí gítiḿmaan man cee, ní ma mun ń fàtīí gítiń ni-cee. Man ni-Dindaan Mpɔŋkɔdaan di lī míǹ. 4 Ní taa fōōmaan ni-baabi bimbim. Ŋyunti ŋun nìn jítèe, m-bɔnaatiliibi nìn dū m-nyɔɔbundi ki sòon̄ nì bi yii: <Fámaan ni-saŋkpitii nì ni-bimbikpitim>, ama baa nìn pílifiǹ-mi kaa fātìi tɔ́ mun. Ti-Dindaan Mpɔŋkɔdaan di lī míǹ. 5 Ni-baabi gbanti bí la? M-bɔnaatiliibi gbíntìi báaa? 6 Nì míǹ kɔkɔee, m-nyɔɔbuŋŋi nì m-bɔkpaaŋi ŋin m nìn dūu tùkū m-tɔntɔnliibi bibɔnaatiliibee nìn gbēē ni-baabi pɔbiliŋ. An di nìn yāntì bi kpántì bi-bimbim ki lī yii: <Ti-Dindaan Mpɔŋkɔdaan nín nìn lī yii ti-saŋkpitii nì ti-tuŋkpitiŋ pu u làá ŋá-ti miŋyee, míǹ ní u ŋá nee.>»
Dileedakal dipeekaal: itaamu
7 Daariyusi nín jíń dibeel dibinliliitiil iŋmal saalaa nì ubɔ, uŋmal un bi yíì Seebatee poon iwiin mmuŋku nì inaa dal ní ti-Dindaan sòon̄ nì u-bɔnaatiliu Sakari, Baraaki jipɔɔn, Didoo naantiiu.
Sakari nín sòon̄ tiŋyee sɔ̀. 8 An lēē ki dàkā-mi kunyeeu gbanti. M ká utanjakal ubɔ kā utaamu un máǹ wèeeeyee pu. U nìn yú nsutantamu mun bi yíì miirtee taapu ditantakal diban. Itaamu in máń wèeeeyee nì in máǹ gàaayee nì itampiin iba mun yú u-boon. 9 Ní m bālifì-u yii: «M-Dindaan, itaamu nee taapu là kí lì yii ba dee?» Ní ntuun ŋun bíi sòoǹ nì mee bí-mi yii: «M làá tùkù-si i-taapu nín sá puee.» 10 Ní uninja un yú nsutantamu mun bi yíì miirtee kansikinee kíí yii: «An sá bin ti-Dindaan tú bí yìiǹ kí màntì kitiŋee.» 11 Niinee ní binibee bí ti-Dindaan tuuŋŋu ŋun yú nsutantamuee kansikinee yii: «Ti yìin̄ ki māntì kitiŋ ki kpēē, ti ká yii kitiŋ kɔkɔ bí ŋgbansɔŋfin, tiba kaa páb́ ki-nib.» 12 Ní ti-Dindaan tuuŋŋu bí yii: «Ti-Dindaan Mpɔŋkɔdaan, a nín fōō Jeerusaleem tiŋki nì Juuda timmu mun kíǹee pu diŋuulee, abin imuŋku ita nì saalaa sèéa. Mimmee kí tin sāā ŋyunti ŋulɔŋu ní a làá sɔ̄ bi-saai?» 13 Ní ti-Dindaan kíí ntuun ŋun bíi sòoǹ nì mee kunyannyaau nì dipɔɔsɔŋkil nyɔɔbundi.
Unimbɔti làá sɔ̄ Siiyɔn saai
14 Ní ntuun ŋun bíi sòoǹ nì mee bí-mi yii ḿ bāakì ti-Dindaan Mpɔŋkɔdaan bɔti nee yii:
«M cáá dineeŋkpaandi Jeerusaleem tiŋki
nì Siiyɔn gbantaŋki pu tikpil.
15 Ama m fōō atimbun
ŋin máká ŋi-ba puee pu mbiim tikpil,
di sá yii ŋyunti ŋun m nìn fōō
m-nibul pu diŋuul fiiiyee,
bíǹ dɔ́miń ki púntì ki nāaǹ-dì.
16 An pu ní man ni-Dindaan Mpɔŋkɔdaan, m lī yii
m làá fàtīí gítiń Jeerusaleem
kí dàkà m-laŋŋaŋfitiiku.
Bi làá fàtīí mā m-diiku niin
nì Jeerusaleem tiŋki.»
17 Míǹ boonee ní ntuunee bí-mi yii ḿ dū ti-Dindaan Mpɔŋkɔdaan nyɔɔbundi nee kí nàatī:
«M-timmu làá fàtīí tí kɔ́ digbíl poon.
M làá fàtīí sɔ̀ŋkì Siiyɔn gbantaŋki pɔbil,
ní kí fàtīí tí lēē Jeerusaleem tiŋki.»