Sakari 2

Dileedakal dililiitiil: iyin nì bicaabi bɔti

1 M wáaǹ ki kpēē kutaayee ní ki ká iyin inaa^a. 2 Ní m bālifì ntuun ŋun bíi sòoǹ nì mee yii: «Iyin nee taapu là kí lì yii ba ní?» Ní ŋu kíí-mi yii: «Iyin nee sá atimbun ŋin jìn̄ Juuda nì Isirayeel nì Jeerusaleem yab ki yàl̄ee ní.»

3 Míǹ boonee, ti-Dindaan lēē bicaabi binaa ki dàkā-mi. 4 Ní m bālifì yii: «Bi dɔ́miń kí ŋá ba ní?» Ní ŋu kíí-mi yii: «Bi dɔ́miń kí kɔ́ǹ atimbun ŋin jìn̄ Juuda yab ki yàl̄ee dinyoondi kí nàan̄-ŋi ní. Bi jìn̄ Juuda yab bi yàl̄ an kɔkɔ pu ní ubɔ kaa ŋúń ki yúl̀ bi-nimbiin.»

Dileedakal ditataatiil: ŋŋmii ŋun bi cáa ŋmàntēe

5 M wáaǹ kutaayee ní an lēē ki dàkā-mi. M ká uninja ubɔ u ŋúb́ ŋŋmii ŋun bi cáa ŋmàntēe u-ŋaan^b. 6 Ní m bālifì-u yii: «A cá la?» Ní u kíí-mi yii: «M cá kí ŋmàntī Jeerusaleem tiŋki kí béé ki-púuŋŋu nì ki-waaŋŋu nín sá puee.»

7 Niinee ní ntuun ŋun bíi sòoǹ nì mee cōom̀ ki nín cá ní ŋubɔ mun cōom̀ ki túŋkiǹ-ŋu. 8 Ní ŋu bí ŋun túŋkí-ŋuee yii: «Sāǹ kí cùú tùkù unaacimpɔɔn un ŋúb́ ŋŋmii nee yii: <Jeerusaleem tiŋki kaa làá dāá nīn cáá digundi, binib nì tiwaŋkuti wíiŋŋu pu. 9 Ti-Dindaan Mpɔŋkɔdaan nín sòon̄ puee sɔ̀. Man m-ba làá nīn bí bi-cee kí nīn sá kii ŋŋmi gundee kí màntīí tù kitiŋ, ní kí lēē m-nyooti kí dàkà ki-kansikin.>»

Bi yíiń bin bíń kunicaŋuee ń fàtīí gítiń

10 Ti-Dindaan lī yii:

Ēeyi! Nimbi bin m nìn jìn̄ ni yàl̄ an kɔkɔ pu,

ki bíń ŋgan nì ŋgiil púee,

ŋwìiń nyalaŋki nì ŋu-jeetilaŋki púee,

sām̀maan kɔŋkɔnnee,

nyānnímaan ŋgan pú tiŋkin.

11 Ēeyi! Nimbi Jeerusaleem yab

bin bíń Babiloon tiŋkin kuyuŋuee,

sām̀maan malaa kí ŋmátí.

12 Ti-Dindaan Mpɔŋkɔdaan un túnní-mi ki tīī-mi mpɔnee nín sòon̄ atimbun ŋin fúkúl̀-nee puee sèé:

«Un kamaa yaa gbēē-nee

gbēē man nimbibul dee.

13 Tiŋman, m làá já nì atimbun gbanti yab.

M làá yàntī bin bi nìn cúú kuyuŋuee

ń fūkul̀-bi.

Niinee, ni làá dāá béé yii

ti-Dindaan Mpɔŋkɔdaan di túnní-mi.

14 Jeerusaleem tiŋki, kúuǹ nì dipɔɔpindi,

nín̄ fàal̀.

Di sá yii m dòoń

kí dāá nīn kóò a-cee.

Ti-Dindaan di lī míǹ.

15 Ŋwiin gbantee, atimbun tikpil

làá dāá dū ŋi-ba kí nákáǹ man ni-Dindaan.

Ŋi làá dāá kpántí m-nibul.

M làá dāá nīn kóò ni-kansikin.»

Niinee, ni làá dāá béé yii ti-Dindaan Mpɔŋkɔdaan di túnní-mi ni-cee.

16 Juuda tiŋki làá dāá fàtīí kpántí

ti-Dindaan gaajawanti circir tiŋki.

U làá dāá fàtīí tí lēē Jeerusaleem

kí nīn sá u-tiŋki.

17 Tiwan tin kɔkɔ cáá kufoouee

ń ŋmīĺ fɔ́ŋfɔŋ díkí diki

ti-Dindaan nimbiin.

Di sá yii u làá yīkìí nyānní

u-circir kɔŋkooŋŋun.