Sakari 8

Ŋgbansɔŋfi nì digbíl pooŋyi

1 Ti-Dindaan Mpɔŋkɔdaan sòon̄ nì mi tibɔti nee yii:

2 «Man ni-Dindaan Mpɔŋkɔdaan nín lī puee sɔ̀.

M cáá Jeerusaleem pu dineeŋkpaandi,

dì jákatí-mi.

3 An pu ní m lī yii,

m làá fàtīí gítiń Siiyɔn jool pu,

kí nīn kóò Jeerusaleem tiŋkin.

Bi làá dāá nīn yíì Jeerusaleem yii <Deedee tiŋki>,

ní kí nīn yíì man ni-Dindaan

Mpɔŋkɔdaan jool yii <circir Jool>.

4 Tiŋman man di lī yii,

bijaŋkpilib nì binimpunaatiibi

làá dāá fàtīí nyā kí kàl̄

Jeerusaleem tiŋkin imɔŋkijaa pu.

Báà ŋma dāa ŋúb́ u-kpandɔŋu,

di sá yii bi làá dāá yúntí kí púĺ.

5 Nnaacimpɔmbiyaamu nì

nsapɔmbiyaamu dāa gbéè

kitiŋin kpacantib pu ní ki gbíiĺ.»

6 Ti-Dindaan Mpɔŋkɔdaan lī yii:

«Isirayeel yab bin kíǹ kaa kpíìyee yaa ká yii

an kaa pée ŋūǹ kí bàń mimmee,

ma mun máaǹ kí lì yii an pɔ̄ɔ̄ kí ŋá mimmaaa,

man un sá ni-Dindaan Mpɔŋkɔdaaneeee?»

7 Man ni-Dindaan Mpɔŋkɔdaan di bíi lì yii:

«M làá fīī m-nibul kí nyāntí

ntimu mun bí ŋwìiń nyalaŋki púee

nì mun bí ŋwìiń jeetilaŋki púee.

8 M làá gíiǹní-bi

bí nīn kóò Jeerusaleem tiŋkin.

Bi làá dāá nīn sá man nibul,

ní man ḿ dāá nīn sá bi-Nimbɔtiu

ki ŋúb́-bi ibaamɔn nì deedee poon.»

9 Ti-Dindaan Mpɔŋkɔdaan nín lī puee sèé:

«Ŋyunti ŋun ni nìn bíl̀ m-diiku nyeelee,

m-bɔnaatiliibi nìn pōoǹ-ni ipoon.

Too, kámaan kunyannyaau,

kun puee ŋyunti nee poonee,

ni bíi gbìl̀ ipoon gbanti ibaanti.

10 Dooooyee,

binib yaa nìn tūǹ ditundee,

baa nìn cáá tipaal,

ní tiwaŋkuti nìn tūǹ ditundi faalaa.

Binannanliibi puee,

binib kaa nìn tɔ́ bi-ba kí nyā kí cù laaba.

Di sá yii m nìn yāntì

binib nyáń tɔb pu.

11 Ama kɔŋkɔnnee

man ni-Dindaan Mpɔŋkɔdaan di lī yii,

maa làá ti ŋá m-nibul din kíǹ kaa kpíìyee

kii m nín nìn ŋá dooooyee yab puee.

12 Di sá yii bi làá dāá kpɔ̀ kí bɔ̄l̀ ŋgbansɔŋfin.

Fiinyib làá dāá lòoǹ fiinyi biliŋ,

ní kitiŋ ń dāá lòoǹ tikpaajin,

ní kutagbɔŋu ń dāá tīī ntaanyim.

M làá dāá dū tin bí nee kɔkɔ

kí tīī m-nibul din kíǹ nee.

13 Nimbi Juuda nì Isirayeel naakɔtin yab,

atimbun ŋin kíǹee ceeyee,

ni nìn sá kii dinibul din bi tɔ́ mbusuee ní.

Ama kɔŋkɔnnee, m làá fīī-ni,

ní ní kpántí kii dinibul din boon bi bīiǹee.

An puee taa fàŋkìmaan!

Kámaan kunyannyaau!»

14 Ti-Dindaan Mpɔŋkɔdaan nín lī puee sèé:

«Ŋyunti ŋun ni-baabi nìn kɔ́ǹ-mi diŋuulee,

m nìn lēē yii m làá sàaǹ-ni,

ní maa nìn kpántì m-landɔkɔŋu.

15 Ama kɔŋkɔnnee, m kpántì m-landɔkɔŋu.

M lēē kí ŋá Jeerusaleem

nì Juuda timmu tiŋan.

Ní taa fàŋkì.

16 Kpèèmaan tin ni máaǹ kí ŋée.

Báà ŋma ń sòoǹ u-juti ibaamɔn.

Ni-bɔsoondiiŋŋinee, ní dū ibaamɔn

in làá cáań ŋgbansɔŋfee kí sòoǹ binib bɔti.

17 Ní taa nín̄ dàkafī tɔb pu tilandɔkɔkpiil,

kí taa nín̄ pùtī fám.

Di sá yii m ná atuun gbanti kɔkɔ,

man ni-Dindaan di lī míǹ.»

Dinyɔɔboobil wiiŋyi làá kpántí jiŋaal wiiŋyi

18 Tibɔti tin ti-Dindaan Mpɔŋkɔdaan sòon̄ nì mee sèé: 19 «Man ni-Dindaan Mpɔŋkɔdaan di bí yii, ni nín bōob̀ kinyɔkɔ uŋmananaati nì uŋmaŋmooŋmooti nì uŋmaluluúti nì uŋmasaalaati poonee làá dāá kpántí nimbi Juuda yab cee dipɔɔpindi nì ifaal nì jiŋaal wiiŋyi ní.

«Ama ní nīn néeń ibaamɔn nì ŋgbansɔŋfi.»

20 Ti-Dindaan Mpɔŋkɔdaan nín lī puee sèé:

«Anibul tikpil

nì ntiŋkpaamu yab

làá fàtīí tí dāan̄ Jeerusaleem.

21 Kitiŋ kiba yab làá dāá tùkù

kin kíǹee yab yii:

<Tí cùmaan kí gbàam̀

ti-Dindaan Mpɔŋkɔdaan,

kí nyàab̀-u.>

Bíǹ làá dāá kíí-bi yii:

22 Anibul tikpil nì atimbun ŋin cáá mpɔnee

làá dāá dāan̄ Jeerusaleem

kí nyàab̀ ti-Dindaan Mpɔŋkɔdaan,

kí gbàam̀-u.

23 Ti-Dindaan Mpɔŋkɔdaan di lī puee sɔ̀.

Ŋwiin gbantee binib saalaa

bin sòoǹ isoon i-ba i-bee

làá dāá nīn ŋúb́ ujuudaja

bɔkutijuti kí bí-u yii:

<Ti làá nóó-si kí cù,

kun puee ti gbìl̄ yii

Unimbɔti bí ni-cee.>»