Sakari 9

ISIRAYEEL YAB NÌ ATIMBUN ŊIN KÍǸEE YAB

Anibul ŋin māntìi tú Isirayeelee bɔsooŋyi nì ŋi-fiil

1 Ti-Dindaan nyɔɔbundi.

Ti-Dindaan bɔti bàn̄ Adiraaki tiŋki,

ní ki gbēeǹ Damaasi tiŋkin.

Di sá yii ti-Dindaan nimbil

kaa cɔ́ Isirayeel tiŋki ŋmaniŋma pu,

ama ki kpáaǹ binib kɔkɔ pu ní.

2 Dinyɔɔbundee sòoǹ nì Amati yab bin pìlīǹ Damaasee,

nì Tiir nì Siidɔn timmu yab bin cáá iciinee.

3 Tiir yab máń digundi ki māntìi tú bi-tiŋki.

Bi kóoǹ animbil

an dɔ̄ ki kpúkú kii dibulee,

ní ki kóoǹ sindaariya

an dɔ̄ ki kpúkú kii didandi pu kpatee.

4 Ama ti-Dindaan làá dāá já kí fōō-kì,

ní kí téé ki-gundi ki lúkú tiŋkun,

ní ŋŋmi ń dāá wà-kì.

5 Asikeelɔn yab yaa láa ká mimmee,

tifaandi làá dāá cúú-bi,

ní Gaasaa yab ń dāá nīn jìkì tifaandi,

ki kpáaǹ Eekrɔn yab,

di sá yii baa ti làá ká un làá jòoń-bee.

Gaasaa tiŋki kaa dāa gíti cáá ubɔti,

ubɔ kaa dāa gíti kóò Asikeelɔn tiŋkin.

6 Nyaaŋmaliŋku^a nib

di làá dāá nìn kóò Asidoodi.

Man ni-Dindaan di lī yii:

«M làá dāá kúntí Fiiliistii yab lambil.

7 M làá dāá nyāntí tinan tin cáá fatikuee bi-nyɔmmun,

kí lēē tiwaatootinan bi-nyiŋŋin.

Bi-kansikin bin làá dāá kíń kí nīn bí dimaŋfalinee

làá dāá yíiń-mi bi-Nimbɔtiu

kii Juuda maaliŋun yabee.

Eekrɔn yab làá dāá kɔ́ m-nibul kansikin

kii Jeebusi yab nín nìn ŋá puee.

8 M làá dāá màntīí tū m-tiŋki kí nīn cí-kì,

kí mɔ̄tì ki-pu binannanliibi bin cá

ki gítiń ki là kí jáǹ-kèe cee.

Upɔndaan ubɔ kaa làá ti dāan̄ kí wɔ́b́ m-nibul,

kun puee man m-ba di cí-bi.»

Ŋgbansɔŋfi bɔtiu

9 Siiyɔn tiŋki, nín̄ fàal̀!

Jeerusaleem, nín̄ kūuntí nì dipɔɔpindi!

Kpèè, a-bɔtiu dòoń a-cee.

U sá deedeedaan ní ki sá ujajil.

U sīntì u-ba taapu, ní ki kā kimaŋ pu,

u kāń dimampɔmbil, kimansalii biki pu^b.

10 U làá dāá kúntí janjatɔrɔkub Eefiraayiim^c tiŋkin

ní kí dāá kúntí kujaau taamui Jeerusaleem tiŋkin.

U làá dāá kɔ̄fì kujaau tɔfii.

U làá dāá cáań ŋgbansɔŋfi atimbun kansikin.

U-beel làá dāá kíĺ Ŋyaam mɔɔl

kí tin cáá sāā Meediiteeranee tiŋkuu,

ní kí yòon̄ Eefiraati mɔɔl

kí tin cáá sāā kitiŋ gbeennyɔkɔ.

Ti-Dindaan làá líí bisarkadambi

11 Dipoondi din bí man nì ni kansikin

ti dū saraabi fatikuu ki bóob́ee puee,

m làá nyāntí ni-sarkadambi bin kā

dilɔkɔgindi din kaa cáá nnyimee poon kí líí.

12 Bisarkadambi bin cáá dimákalee,

fàtīí gítímaan ni-tiŋki kin

bi máń digundi ki māntìi túee.

Díǹ gba, m tùkù-ni yii:

M làá ŋá-ni tiŋan mili pu

kí téeǹ falaa un ní ni jíńee pu.

13 Juuda tiŋki ní m làá dūú píĺ kii butɔbuee

ní Eefiraayiim tiŋki ń nīn sá ipiin.

Siiyɔn, m làá tɔ̄ a-jipɔmbi

bí cùú já nì Greesi yab.

M làá dū-bi kí kpántí ubaatandaan tàataajiki.

14 Ti-Dindaan làá nyā kí páanní u-nibul yilpu,

ní kí tɔ̄ u-piiŋŋu kii utaa nín ŋmóò puee.

Ti-Dindaan Unimbɔti làá búń ŋyin,

u làá nīn kāń kubuŋu kun nyánní

ŋgiil púee kí dāan̄.

15 Ti-Dindaan Mpɔŋkɔdaan làá dāá wúń u-nib pu.

Bi làá dāá wīī kí nà kujaataafuŋ taŋkpeeŋi.

Bi làá dāá yàntī bi-nannanliibi fatikuu

ń còol̀ kii ndamamee,

kii saraabi fatikuu nín còol̀ kisambikin puee,

àá kii fatiku un bi cáa yàantí nsaraafan yiŋyi puee^d.

16 Ti-Dindaan bi-Nimbɔtiu làá dāá

fīī-bi ŋwiin gbanti dal

kii upikpaal nín fìil̄ u-picaŋkpuŋku puee.

Bi làá dāá nīn jìl̀ pàlpal bi-tiŋkin

kii ataŋkpamɔnti ŋin jìl̀ ki náká kibeefuulii puee.

17 Bi làá dāá nīn bí mmɔnneeee!

Bi làá dāá nīn cáá kunyaaŋŋu!

Bilee làá dāá yàntī binaacimpɔmbi ń yábití,

ní ndapɔm ń dāá yàntī bisapɔmbi mun ń yábití.