Sakari 12

Bi làá jáǹ Jeerusaleem, ama kì làá ká difiil

1 Tibɔti tin ti-Dindaan sòon̄ Isirayeel yab puee.

Ti-Dindaan un kpátì kutagbɔŋu,

ki báaǹ kitiŋ nyeel,

ki náań kufoou ki ŋá unilinee nín lī puee sèé:

2 «M làá dū Jeerusaleem tiŋki kí ŋá kii ndaam min gbéèyee ní kí tīī anibul ŋin kɔkɔ māntìi tú-kèe. Míǹ ní bi yaa láa māntìi tú Jeerusaleem kí já nì kèe, Juuda yab mun kɔkɔ làá dāá gbí. 3 Ŋwiin gbantee, m làá dū Jeerusaleem tiŋki kí ŋá kii ditaŋkpakpaandi din nyìm̀ ubɔ kaa ŋūǹ kí dúkutée. Un kamaa làá dāá màkan̄ kí dúkutí-dèe làá dāá fōō tiweendi. An pu ní kitiŋ pu timbuŋŋi kɔkɔ làá dāá kpāfì kí já nì kì. 4 Man ni-Dindaan di lī yii, ŋwiin gbantee, m làá dāá kɔ́ǹ itaamu kɔkɔ dinyoondi, ní kí dāá tɔ̄ bitanjakaliibi kuwaatiiu, ní kí dāa tɔ̄ atimbun ŋin kíǹee taamui ijɔfi. Ama m-nimbiliŋ làá nīn cɔ́ Juuda naakooku pu. 5 Ŋwiin gbantee, Juuda yab kpilib dāa lì bi-pɔbiliŋin yii: <Isirayeel yab pɔŋŋu nyēeń ti-Dindaan Mpɔŋkɔdaan bi-Nimbɔtiu cee ní.> 6 Ŋyunti gbantee, m làá dū Juuda yab kpilib kí ŋá kii ŋŋmi ŋun fōō didɔkpukul taapuee, àá timool tin fōō ŋŋmi difeencundi taapuee. Bi làá wà anibul ŋin bí bi-ŋaŋgiil nì bi-ŋaŋgan pú ki māntìi tú-bee. Ama Jeerusaleem yab làá dāá nīn gbíntìi kā bi-tiŋkin.»

7 Ti-Dindaan làá dāá péé péé kí fīī Juuda yab dicaŋŋi ní, án nín làá ŋá pu Daafiidi naakookun yab nì Jeerusaleem yab ń taa dàkafì yii bíǹ jítiǹ Juuda yab bin kíǹee. 8 Ŋyunti gbantee, ti-Dindaan làá dāá mɔ̄tì Jeerusaleem yab pu. Bi-kansikin bin sá biwɔfibee dāa kíǹ ki pɔ̄ɔ̄ kii Daafiidee, ní Daafiidi dicaŋkun yab dāa bí bi-cee kii Unimbɔtee, kii ti-Dindaan tuuŋŋuee.

Kunimbaau jéetì kitiŋee kɔkɔ pu

9 Ŋyunti gbanti ní m làá bɔ́ntí kí kúntí anibul ŋin kɔkɔ dāa bíi jáà nì Jeerusaleemee. 10 M làá dāá dū disaasɔl nì ŋwimmeem fam kí sìtīń Daafiidi dicaŋkun yab nì Jeerusaleem yab pu. Niinee ní bí dāá fàtī bi-nimbikpeeŋu kí túĺ-mi, un tikindi bi sāā ki cíl̀ee pu^a. Bi làá dāá sɔ̄ u-kpool, kii bi nín sūǹ dibibaabil kpool puee. Bi làá dāá sɔ̄ u-pu kii bi nín sūǹ ujipɔŋkpil kúm pu puee. 11 Ŋwiin gbantee, bi làá dāá nīn sūǹ ki yáliŋkí nì kunimbaau Jeerusaleem tiŋkin kii bi nín sūǹ diwaal Adaadi-Riimɔn kpool Meegiidoo tantakalin puee. 12 Kitiŋ nee kɔkɔnee, kudicaŋu kamaa làá dāá gàntì ku-ba kí sɔ̄ dikpool. Daafiidi dicaŋkun yab bininjab làá dāá gàntì bi-ba ní binimpoobi ń dāá gàntì bi-ba, ní Naatan dicaŋkun yab bininjab ń dāá gàntì bi-ba ní binimpoobi ń dāá gàntì bi-ba, 13 ní Leefii dicaŋkun yab bininjab ń dāá gàntì bi-ba ní binimpoobi ń dāá gàntì bi-ba, ní Simeeyii dicaŋkun yab bininjab ń dāá gàntì bi-ba ní binimpoobi ń dāá gàntì bi-ba. 14 Míǹ mbaantiim ní adican ŋin kíǹee kɔkɔ yab bininjab làá dāá gàntì bi-ba ní binimpoobi ń dāá gàntì bi-ba.