Sakari 11

Ti-Dindaan nāaǹ ntimu mun cáá mpɔnee

1 Leebanɔn tiŋki, pìitī a-punyɔmmu

ŋŋmi ń wà a-seediri sufii^a.

2 Siipreesi subu, nín̄ yáliŋkí,

di sá yii seedir sufii lítì,

bi nāaǹ isumɔnti gbanti.

Baasan seeni sufii, nín̄ yáliŋkímaan,

di sá yii bi gāā a-bambaŋku

kun nìn múkú ubɔ kaa ŋūǹ kí kɔ́ee.

3 Bi gbìl̀ bipikpaaliibi nín yáliŋkée,

di sá yii bi-nyooti kúntì.

Bi gbìl̀ gbikinti siim pu,

di sá yii bi kpéelikì Jɔɔdan

buŋgbandi mɔsɔŋku kɔkɔ.

Bipikpaaliibi bili bɔti

4 M-Dindaan m-Nimbɔtiu tīī-mi mara nee yii: «Kpàà ipii in bi péetí ki cáǹ kí kpɔ̀ nee. 5 Bin dāā ipii gbantee kù-i an kaa ŋáań-bi nyàaa. Bin nyáfí-iee lì yii: <Ti jáam̀ ti-Dindaan, ti kpántì bigaajab!> I-bɔti kaa kpáàa cáá i-kpaaliibi falaa. 6 Man ni-Dindaan di lī yii maa làá sɔ̄ kitiŋ nee pu nib saai. M làá gíiǹ unil kamaa kí ŋá u-juti nì u-bɔtiu ŋaan. Bibɔtiibi làá nùkù kitiŋ púb, ní maa làá fōō báà ubɔ bi-ŋaan.»

7 Niinee ní m fōō ipii in binyampoobi bàà cáǹ kí kpɔ̀ee ki bíi kpàá. M yōoǹ atambɔn ali ki ŋúb́. M yíiń diba yii: <Disaasɔl>, ní ki yíiń din kíǹee yii <Mpèé>, ní m kíĺ ki bíi kpàá-i. 8 Ní m jìn̄ bipikpaaliibi bitee uŋmabaanti poon. Míǹ boonee ní maa ti cáá kimɔtii ipii pu, ní í mun núutiǹ-mi. 9 Niinee ní m bí-i yii: «Maa làá ti kpàà-ni! In làá kpúee ń kpú, in làá wāŋkèe ń wāŋkì, ní in làá kíńee ń nīn tɔ̀ntī tɔb!»

10 Ní m cúú m-tambɔndi din m yíì <Disaasɔlee> ki kóol̀ ki kpītì dipoondi din ti-Dindaan nìn pōoǹ anibul kɔkɔee^b. 11 Yaadal ní dipoondi gbanti kpītì. Bibantiliibi bin dāā ipiiyee nín ká tin m ŋée, ní bi béè yii ti-Dindaan là kí dī tin m ŋée pu kí sòoǹ tiba ní. 12 Ní m bí-bi yii: «An yaa ŋān̄ ni-cee, ní pà-mi m-paati, an yaa kaa tí sá mimmee, ní yàntī.» Ní bi pàn̄-mi m-paati jitɔmbi mmuŋku nì saalaa. 13 Ní ti-Dindaan bí-mi yii: «Bi nín ká m-daaku nimbiŋmiiku sá puee dee! Yòon̄ animbikpaan gbanti kí cáá lúkú ukúduntil!» Ní m yōoǹ animbil jitɔmbi mmuŋku nì saalaayee ki cáa lúkú ukúduntil kunimbɔtidiin. 14 Míǹ boonee ní m cúú m-tambɔndi dililiitiil din m yíì <Mpèéyee> ki kóol̀ kí yàkatī kunabitiiu kun bí Juuda yab nì Isirayeel yab kansikinee.

15 Ní ti-Dindaan gíti bí-mi yii: «Á gíiǹ a-ba upikpaagbaan yam. 16 Di sá yii man làá yàntī upikpaal ubɔ mun ń dāan̄ kitiŋ nee ni. Waa dāa fātìi tɔ́ ipii in wáŋkèe bɔtaaa, kaa dāa nyàab̀ in wáŋkèeyaaa, kaa dāa cāantí in būǹeeyaaa, kaa làá dāá kpíiǹ in pɔ̄ɔ̄yee mun. Ama u dāa kù in gbìfì ki cáá ŋkpamee ki ŋmóò, ki dátí ki fúkutí i-tafuŋfukuti.»

17 An sá mbusu ní ki tīī upikpaagbaan

un féeń u-picaŋkpuŋkuee!

Bí gāā kí tùkutī u-ŋal kí lēē u-nimbil kujaaun!

U-ŋal ń fáká

ní u-ŋaŋgiinimbil ń kpú.