Maatiiu 8

Yeesu cáaǹ unyaŋgbanti

(Kpèè Maar 1.40-45, Luuki 5.12-16)

1 Yeesu kpákatìń dijool puee, ní kunipaau nóó-u. 2 Ní unyaŋgbanti ubɔ sútìń ki pìl̄-u, ki gbāaǹ u-nimbiin ki bí-u yii: «Ukpil, cáaǹ-mi kun puee m nyí yii a yaa là, a ŋūǹ kí cáaǹ-mi m-wunti ń ŋāŋkì.» 3 Niinee ní Yeesu tāntì u-ŋal ki gbēē-u, ní ki bí yii: «M là. Pɔ̄ɔkìm̄!» Niin niin ní uninjee pɔ́ɔkì ní u-wunti ŋáŋkì. 4 Ní Yeesu bí-u yii: «Pīlifì tiŋan, á taa tùkù báà ubɔ tibɔti nee, ama á cáá a-ba kí dàkà usaraaŋal ú bée yii a-wunti ŋáŋkì, ní kí ŋá saraa kii Mooyiisi marab nín lī puee ní usaraaŋal ń tùkù báà ŋma ń gbìl̄ yii a pɔ́ɔkì^a.»

Yeesu cáaǹ Room soojakpiliu tɔntɔnliu

(Kpèè Luuki 7.1-10 nì Yoow 4.43-54)

5 Yeesu kɔ́ Kapeernayum tiŋkinee, ní Room soojakpiliu ubɔ sútìń ki pìl̄-u ki gbāam̀-u yii: 6 «Ukpil, m-tɔntɔnliu dɔ̄ kudiin ki būǹ, ki fàl̄ ki yáliŋkí tikpil.» 7 Ní Yeesu bí-u yii: «M làá cù kí cáaǹ-u.» 8 Ní usoojakpilee bí-u yii: «Ukpil, maa máaǹ á kɔ́ m-dumpu. Pée lì dinyɔɔbundi dibaba m-tɔntɔnliu làá pɔ̄ɔkì. 9 Di sá yii man m-ba, m cáá bikpilib bin taapu m bée, ní ki mun cáá soojab bin mun bí man taapuee. M ŋūǹ kí tùkù ubɔ yii: <Cù doo!> ní ú cù, ní kí bí ubɔ mun yii: <Dāan̄ doo!> ní ú dāan̄, ní kí bí m-tɔntɔnliu una yii: <Ŋá yéè!> ní ú ŋá.» 10 Yeesu nín gbìl̄ an nyɔɔbuŋŋee, ní u bākatì ki bí bin nóó-uee yii: «Ibaamɔn ní m sòoǹ nì ni, maa láá pée ká Isirayeel yab kansikin ubɔ cáá fookii kii Uroomja nee. 11 Míǹ ní m tùkù-ni yii binib tikpil làá dāá nyānní ŋwìiń nyalaŋki pú nì ŋu-jeetilaŋki pú kí kɔ́ Unimbɔti Beelin, bi nì Abraam nì Isaaki nì Jaakɔb ń kpāfì kí jī nnaam! 12 Ama ní Isirayeel yab bin bàà máaǹ kí nīn sá Unimbɔti Beelin yabee, bí dāá nyāntiń-bi mmɔŋki kí tɔ̄ dibɔmbɔndin, laakin ní bi làá nīn sūǹ bi-nyiŋŋi gà tɔb kàkakee.» 13 Ní Yeesu tùkū usoojakpilee yii: «Nín̄ kùǹ a-dumpu, a nín fōō ki kíí puee, án ŋá míǹ kí tīī-si.» Kukúluu gbanti poon ní utɔntɔnlee kpáàa pɔ́ɔkì.

Yeesu cáaǹ bibunliibi tikpil

(Kpèè Maar 1.29-34, Luuki 4.38-41)

14 Yeesu kɔ́ Peetroo dumpuee ní ki ká Peetroo nimpuu na būǹ ki dɔ̄ u-wunti píĺ kpaŋkpam. 15 Niinee ní Yeesu gbēē u-ŋal, ní u pɔ́ɔkì tiwun sɔ̄ŋkì ní u yíkì ki ŋá-u tijin u jíń.

16 Kujoou jóotèe ní bi cáań-u binib bin pu arasiniibi kēe tikpil, ní u sòon̄ ki jìn̄ arasiniibee. U nìn cáaǹ bibunliibi kɔkɔ. 17 U ŋá míǹ ki nóó nì Unimbɔti bɔnaatiliu Yeesaya nín nìn lī puee, yii: «U fōō ti-wɔfii nì ti-weeŋyi^b.»

Bin là kí nóó Yeesuee bɔti

(Kpèè Luuki 9.57-62)

18 Yeesu nín ká yii kunipaau māntì ki tú-uee, ní u pú u-boonnooliibi kinyɔkɔ yii bí kɔ́ buŋalimbu kí dùtī kí cù lapu pu mɔɔgbandi. 19 Niinee ní umaradakal ubɔ sútìń ki pìl̄-u ní ki bí yii: «Ukpil, m làá nīn nóó-si báà laakin ní a yaa cée.» 20 Ní Yeesu kíí-u yii: «Jiiŋkpaaibi cáá bi-kɔŋkooŋyi ki dɔ̀, ní nnɔmbiyaamu mun cáá mu-diiŋŋi, ama man Kinibiki kaa cáá laakin m làá bíĺ m-yil kí ŋùŋfèe.» 21 Ní bin nìn nóó-uee kansikin ubɔ bí-u yii: «Ukpil, pɔ̄-mi nsan ḿ síb́ m-baa.» 22 Ní Yeesu bí-u yii: «Sii dee, nóó man, kí yàntī bitaŋkpiibi ń nīn síb̀ bi-taŋkpiibi.»

Yeesu yāntì kubuŋu ŋmíl̀

(Kpèè Maar 4.35-41, Luuki 8.22-25)

23 Niinee ní Yeesu kɔ́ buŋalimbun ní u-boonnooliibi mun nóó-u ki búntì. 24 Kpalaayee kubuŋkpaaŋŋu kubɔ kíĺ ki bíi jītí dimɔɔl pu ní buŋalimbuee bíi gbéè nnyim, ama ní Yeesu dɔ̄ ki gèeǹ. 25 Ní u-boonnooliibi sútì ki pìl̄-u ní ki fīntì-u ki bí-u yii: «Ti-Dindaan, fīī-ti, ti kpíì ní!» 26 Ní Yeesu bí-bi yii: «Ba ŋá ní ni fàŋkí míǹ? Ni-fookiiu kaa náaǹ báà fiii!» U lī míǹ ki dóòyee, ní ki yíkì ki yúl̀ ki kpātì kubuŋu nì nnyim pu, ní an ŋmíl̀ fɔ́ŋfɔŋ díkí diki. 27 Ní binibee bākatì sèeee, ní ki bíi lì yii: «Kin, u nín sá ŋma dee ní ki kpáaǹ kubuŋu nì dimɔɔl tɔ́-u nan^c?»

Yeesu cáaǹ biwaatiibi bili

(Kpèè Maar 5.1-20, Luuki 8.26-39)

28 Yeesu nín dūtì lapu mɔɔgbandi Gadaraa^d yab tiŋkinee, ní binib bili bin pu arasiniibi kā bi wáatèe nyánní kuceeun ki túŋkiń-u. Biwaatiibee nìn cáá ntoom tikpil, an puee ubɔ kaa nìn màkantí kí dī niin. 29 Bi nìn bíi kūuntí yii: «Unimbɔti Jipɔɔn, a nyàab̀-ti nì tilati poon ní? Ibɔsoon yuntiŋu kaa láá bāań ní a dɔ́miń doo kí sàaǹ-taaa?» 30 Digbeetikitikpaandi^e diba nìn bí ŋkpaanceeti niin ki jīǹ. 31 Ní arasiniibee gbāam̀-u yii: «A yaa làá jà-tee, á jà-ti kí kɔ́ǹ digbeetikitil nee ni» 32 Ní u bí yii: «Nín̄ cámaan!» Ní bi nyáń biwaatiibin ki kɔ́ digbeetikitilee ni, ní igbeetee sáǹ ki wúntì nsitimin ki jéetì dimɔɔlin ki gbíntì nnyimin ki kpíì.

33 Ní bin kpàá igbeetee sáǹ ki cūtì ki tùkū kitiŋin tin kɔkɔ jítèe ki kpáaǹ bin pu arasiniibi nìn kēe mun yati. 34 Ní kitiŋin nib kɔkɔ nyáń ki nín túŋkí Yeesu. Bi nín ká-uee, ní bi gbāam̀-u yii ú yīkì bi-tiŋki pu.