Maatiiu 9

Yeesu cáaǹ ufaliŋfaan ubɔ

(Kpèè Maar 2.1-12, Luuki 5.17-26)

1 Niinee ní Yeesu kɔ́ buŋalimbun ki fātìi dūtì dimɔɔl ki nín gítiń u-tiŋkin^a. 2 Binib biba nìn túǹní ufaliŋfaan ubɔ nlún pu ki cáań ki bíl̀-u. Yeesu nín ká binib gbanti fōō ki kíí yii u ŋūǹ kí cáaǹ ubunlee ní u bí ufaliŋfaanee yii: «M-biki, pɔ́ɔǹ a-ba, m dū a-kpitii ki pú-si!» 3 Niinee ní bimaradakaliibi biba bíi dàkafī bi-pɔbiliŋin yii: «Kijapaai nee ŋèeǹ nì Unimbɔti ní^b.» 4 Yeesu béè tin bi bíi dàkafēe, ní ki bālifì-bi yii: «Ba pu ní ni cáá ilandɔkɔkpiti míǹ? 5 Ba di pɔ̄ɔ̄ dilil ní: <A ká a-kpitii pɔ̄tam> di pɔ̄ɔ̄ dilil naaa, <Yīkì kí yūĺ kí nīn còom̄> di pɔ̄ɔ̄ ní? 6 Ama ní béé yii, man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u bí ufaliŋfaanee yii: «Yīkìm̄ kí yòon̄ a-lúŋŋu kí nīn kùǹ a-dumpu.»

7 Ní kijapaayee nyīī ki yíkì ki nín kùǹ. 8 Kunipaauee nín ká mimmee, ní tifaandi kɔ́-bi, ní bi bíi pàkà Unimbɔti u nín pú binib mpɔn ŋuŋyee pu.

Yeesu yíiń Maatiiu

(Kpèè Maar 2.13-17, Luuki 5.27-32)

9 Yeesu nyáń niin ki cée, ní ki ká uninja ubɔ bi yíì-u Maatiiu u kā fɔtiku diikun. Yeesu nìn bí-u yii: «Dāan̄ kí nīn nóó-mi!» Niinee ní u yíkì ki táá-u.

10 Yeesu kɔ́ ki kāl̀ Maatiiu dumpu ki bíi jīǹ tijinee^c ní bifɔtiliibi tikpil nì binikpitib bin kɔ kíǹee dɔ́miń ki kútì u nì u-boonnooliibi pu ki mun bíi jīǹ. 11 Fariisab ká mimmee, ní ki bí u-boonnooliibi yii: «Ba pu ní ni-kpiliu nì bifɔtiliibi nì binikpitib bin kɔ kíǹee kpáfì ki kā ki jīǹ tijin míǹ^d?» 12 Yeesu gbìl̄ an bɔtee, ní ki bí-bi yii: «Bin pɔ̄ɔ̄yee kaa nyàab̀ unyɔɔdaan, see bin būǹee. 13 Cùú bīfìmaan Unimbɔti nyɔɔbundi nee taapu, yii: <Maa là saraabi^e, m là ní nīn sūǹ tɔb saai ní.> Maa dɔ́miń kí yíiń deedeedambi, m dɔ́miń kí yíiń binikpitib ní.»

Bi bālifì Yeesu dinyɔɔboobil bɔti

(Kpèè Maar 2.18-22, Luuki 5.33-39)

14 Niinee ní Yoowaneesi boonnooliibi sútìń ki pìl̄ Yeesu, ní ki bālifì-u yii: «Ba pu ní timbi nì Fariisab bōob̀ kinyɔkɔ múlmul, ní sii boonnooliibi kaa bōob̀ ní?» 15 Ní Yeesu kíí-bi yii: «Unimpucaan cal bɔɔbi ŋūǹ kí nīn bí kunimbaaun ŋyunti ŋun unimpucaan cal u-ba dáá béeee? Aayee, baa ŋūǹ! Ama ŋyunti ŋubɔ bí ki dòoń, bi làá dāá yòon̄-u bi-kansikin, an yuntiŋu ní bi dāa bōob̀ kinyɔkɔ.

16 «Baa gífí ŋŋaapɔɔn kí dūú lìb̄ dibɔkutikpikil. Bi yaa ŋá mimmee, ŋŋaapɔɔn kpāantí dibɔkutikpikil ní kí cátí ní dibùndee ń mɔ̀tīí wàan̄. 17 Míǹ ní baa tí dù ndapɔm kí fúuń tilɔkpikilin. Bi yaa ŋá mimmee, tilɔti pòol̄ ní ndaam ń kpáatíí fá ní tilɔti mun ń bīil̀. Míǹ puee, bi dù ndapɔm ní kí sìtī tilɔpɔnni, ní an kɔkɔ ń nīn bí.»

Yeesu fīkitì kisapɔmbiki ki cáaǹ unimpu ubɔ

(Kpèè Maar 5.21-43, Luuki 8.40-56)

18 Yeesu nìn bí ki sòoǹ nì bi an bɔtee, ní Juuda yab yidaaŋwu ubɔ bāań ki gbāaǹ u-nimbiin, ní ki bí yii: «M-sapɔmbiki dáá pée kúù dee, dāan̄ kí dū a-ŋal kí páań ki-pu, kì làá fìkitī!» 19 Ní Yeesu yíkì ní u-boonnooliibi nóó-u.

20 Ní unimpu ubɔ nìn bí ki fùul̀ ŋkpin doooo abin saalaa nì ali an kaa gúǹ. Yeesu còom̄ ki cée, ní u dīń Yeesu boon pú ki dɔ́miń ki gbēē u-bɔkutijúti. 21 Kun puee u nìn dākafì u-pɔbilin yii: «M yaa pée ŋúń ki gbēē u-bɔkutil kpaŋkpamee, m bàà pɔ́ɔkí.» 22 Yeesu fātì ki ká-u ní ki bí yii: «M-bisal, pɔ́ɔǹ a-ba, a nín fōō ki kíí puee fīī-si.» Niin niin ní unimpuee pɔ́ɔkì.

23 Yeesu dūu bàn̄ uyidaanee dumpuee ki ká bin búǹ awul ki gà ikpiisilanee nì kunipaau kun bíi gà dituweelee gbí niin kìlammm. 24 Niinee ní u bí-bi yii: «Nyāmaan doo! Kisapɔmbiki kaa kpíì, kì gèeǹ ní.» Ní bi bíi bèel̄-u. 25 Bi nìn nyántì binib kɔkɔ, ní Yeesu nín kóò kudii poon ní ki cúú kisapɔmbikee ŋal ní kì yíkì. 26 An bɔtee nìn dūu gbītì kitiŋ gbanti jaŋŋi kɔkɔn.

Yeesu cáaǹ bijɔfub bili

27 Yeesu nyáń niin ki búntèe, ní bijɔfub bili páaǹ u-boon ki tátí yii: «Daafiidi naantiiu, sɔ̄ ti-saai!» 28 Yeesu bàn̄ kudiinee, ní bijɔfubee sútì ki pìl̄-u, ní u bālifì-bi yii: «Ni fōō ki kíí yii m lafun ŋūǹ kí cáaǹ-naaa?» Ní bi kíí-u yii: «Iiin, Ukpil, a ŋūǹ kí cáaǹ-ti.» 29 Ní Yeesu gbēē bi-nimbiliŋ ki bí-bi yii: «Ni nín fōō ki kíí yii m ŋūǹ kí cáaǹ-nee, án ŋá míǹ kí tīī-ni.» 30 Niinee ní bi-nimbiliŋ cúu ŋúbitì. Ní Yeesu kpáafì-bi yii: «Ní pīlifì tiŋan, ní taa pée yàntī ubɔ ń béé tibɔti nee!» 31 Ama bi nyánnée ní ki kíĺ ki bíi sòoǹ Yeesu pu kitiŋ gbanti kɔkɔn.

Yeesu cáaǹ umɔɔmiin ubɔ

32 Bi nyáń niin ki cée ní bi cáań uninja ubɔ Yeesu cee, arasinii kā u-pu ní u sá umɔɔmiin. 33 Ŋyunti ŋun Yeesu jìn̄ arasiniiyee, ní umɔɔmiinee kíĺ ki bíi sòoǹ, ní kunipaau kun nìn bí niinee bākatì sèeee ní ki lī yii: «Doooo nee, taa láá pée ká yéè Isirayeel tiŋkin ki ká!» 34 Ama ní Fariisab bíǹ bí yii: «An sá arasiniibi bɔtiu di tīī-u an pɔŋŋu ní u cáa jì arasiniibi^f.»

Yeesu súń kunipaau saai

35 Yeesu nìn yìiǹ ntiŋkpaamu nì ntiŋwaamu poon ki dàkà binib akpafidiinni, ki sòoǹ tibɔmɔntiil tin sá Unimbɔti Beel bɔtee, ki cāantí iween kɔkɔ nì bin kɔkɔ wɔ̀b̄ee. 36 U nín nìn ká kunipaau gbantee ní an kɔ́-u inimɔɔn kun puee binibee nìn gīī bi-wunti yɔ̄tì a lì kii ipii in kaa cáá ukpaalee^g. 37 Niinee ní u bí u-boonnooliibi yii: «Kudiceeu wīikí tikpil, ama ní bicaliibi kaa náaǹ. 38 An puee, ní mèèmaan kusaaudaan ú tɔ̄ń bitɔntɔnliibi ń dāá cā!»