Eefeesi 1

Kugbɔŋu kun Pɔɔl ŋmàn̄ ki tīī

Eefeesi

yabee

Ijaam

1 Man Pɔɔl un Unimbɔti lēē ḿ nīn sá Yeesu Kriisitoo kpambalee di ŋmàn̄ kugbɔŋu nee.

M ŋmàn̄-ku kí tīī nimbi Unimbɔti yab bin kóò Eefeesi tiŋkin^a ki yú deedee, ni nì Yeesu Kriisitoo ŋá ubaantee ní. 2 Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Unimbɔti ŋá-ti tiŋan Kriisitoo pu

3 Ti jáaḿ Unimbɔti un sá ti-Dindaan Yeesu Kriisitoo Baayee u nín ŋá-ti tiŋan tin, ki dī u-Fam pu ki tīī-ti yilpu wammɔntiiti kɔkɔ ti nì Yeesu Kriisitoo nín ŋá ubaantee puee. 4 Di sá yii, kí wàatī Unimbɔti ń náań duulinyee, u pée lútì-ti ki yóoǹ tí nīn sá u-yab, ti nì Kriisitoo ń ŋá ubaanti, tí nīn bí circir, ú taa ká ti-pu ikpiti iba. Unimbɔti neendi puee, 5 ní u nìn pée lēē ki yóoǹ dooooyee yii, Yeesu Kriisitoo puee, u làá dāá dū-ti kí kpántí u-biyaamu. Di sá yii an nìn ŋān̄ u-cee ú ŋá míǹ, 6 án nīn sá-u tinyool, tiŋaŋkpaandi tin u dī u-Jipɔnneeŋkaau pu ki ŋá ki tīī-tee pu.

7 Kun puee, Kriisitoo kúm pu ní u fīī-ti ki nyántì tikpitilin, ní ki dū ti-kpitii ki pú-ti^b. U ŋá míǹ kí dàkà-ti u-neendi nín wīikí min bulifee ní. 8 U-neendi gbanti nín wīikí tikpil puee, ní u tīī-ti iciin nì dinyil. 9 Di sá yii u yāntì ti béè u nín là kí dī Kriisitoo pu kí ŋá tin nìn bí dibalin dooooyee. 10 Tin u lēē kí ŋée di sá, ŋyunti yaa láa sāāyee, ú dāá kóoǹ tin bí yilpuee nì tin bí taapuee kɔkɔ kí kpāfì, Kriisitoo baba ń nīn sá ubɔti.

11 Unimbɔti ŋáań tikɔkɔ kii u nín lēē ki là kí ŋá miŋyee ní, di sá yii u lútì-ti ki yóoǹ dooooyee tí nīn sá u-yab, ti nì Kriisitoo nín ŋá ubaantee pu. 12 Mimmee, timbi bin sá bipeepeekaabi ki máká Kriisitoo puee, tí nīn pàkà-u u-nyooti pu.

13 Nimbee, ni gbìl̄ ibaamɔn bɔti tin sá Kriisitoo Bɔmɔntiiti ki cáań-ni difiilee. Ni nín fōō ki kííyee pu, ní Unimbɔti dū u-daaŋku ki dáań-ni. Kudaaŋŋuee di sá Circir Fam min u nìn pōoǹee. 14 U-Fam min u tīī-tee di dàkà yii difakal^c din u pōoǹ kí tīī-tee dáá bíń boon ki dòoń ti làá fōō-dì. Mì tīī-ti dimákal yii ti làá dāá fōō difakalee ŋyunti ŋun Unimbɔti yaa láa nyántì u-yab kɔkɔ doo ki cáa cūnnì u-ceeyee. U ŋá míǹ tí nīn pàkà-u u-nyooti pu ní.

Pɔɔl wimmeem

15 An puee, m nín gbìl̄ bi sòoǹ ni-fookiiu un ni cáá ti-Dindaan Yeesu puee, nì dineendi din ni cáá Unimbɔti yab kɔkɔ puee, 16 m yaa bíi mèéyee m jáaḿ Unimbɔti ni-pu múlmul. 17 M mèé ti-Baa tinyooldaan un sá ti-Dindaan Yeesu Kriisitoo Nimbɔtiuee ú tīī-ni iciin ní ŋmā kí béé-u, kí nīn nyí un Unimbɔti sée. 18 M gíti mèé-u yii ú ŋmíntí-ni ní wāl̀ tiwammɔntiil tin pu u yíiń-nee, ní béé tigaajati tin u kpáafì ki yóoǹ nimbi bin sá u-yabee nín wīikí ki cáá tinyool puee, 19 ní béé u-pɔŋkpaaŋŋu ŋun jítiǹ tikɔkɔ u cáa tūǹ timbi bin fōō-u ki kííyee pu atuunee. U-pɔŋkpaaŋŋu gbanti mbaantee ní u dàkā, 20 ŋyunti ŋun u nìn fīkitì Kriisitoo ditaŋkpiilin ki yāntì u cūtìi kāl̀ u-ŋaŋgiil pú yilpuee^d. 21 Niin ní Kriisitoo tɔ́kɔ́ tikɔkɔ pu ki jīǹ dibeel biyidambi nì bibɔtiibi nì bipɔndambi kɔkɔ pu^e. Báà an yaa yāntì ki sá uŋyee, úǹ di jítiǹ báà ŋma duulinya un poon ti bí nee, nì un dáá bíń ki dòońee mun poon. 22 Unimbɔti dū tikɔkɔ ní ki ŋá Kriisitoo taapu^f. U dū-u tɔ́kɔǹ tikɔkɔ pu ní ki dū-u ki ŋá Kriisitoo Nikitil yil. 23 Kriisitoo Nikitil di sá Kriisitoo wunti. Dinikitilee ni ní Kriisitoo bí gbīŋgbim ní Unimbɔti bí Kriisitoo ni mmɔm^g.