1 Peetroo 4

Mbimbipɔm min ti máaǹ kí nīn cááyee

1 Ni nyí yii Kriisitoo kpíì, míǹ puee ni mun ń nīn bímaan kii ni kpíìyee. Kun puee un kpíìyee, úǹ kaa ti ŋáań ikpiti. 2 Kí yòon̄ kɔŋkɔnnee kí nīn cée, ní dū ni-yuntii in kíǹ ní dūú kàl̄ duulinyanee kí dūú ŋá min Unimbɔti lèe, kí taa ti ŋá min fáatì ni-wuntee. 3 Dooooyee, ni nìn dū ŋyunti tikpil ki ŋá kii bin kaa nyí Unimbɔtee nín ŋáań puee. Ni nìn ŋáań tin kɔkɔ cāabìń ntimbiilee, ní ki ŋáań tijɔkɔndi, ki bí jiŋaalib poon baabadal, ki nyù idafi ki gbéè, ki jīǹ ki lákatí ni-ba pu, ki tòotī awaa, kun mun kaa ŋān̄ kpataaa Unimbɔti nimbiinee dee. Kɔŋkɔnnee an ŋmāntì. 4 An ŋá bin kaa nyí Unimbɔtee maamaaci ni nì bi nín kaa ti kpáfí ki ŋáań tin cāabìń ntimbiilee, ní bi sìí-ni. 5 Ama bi làá dāá yūĺ kí sòoǹ bi-tuŋkpitiŋ gbanti pu Unimbɔti un bɔ́ntì ki cí kí sòoǹ binifoobi nì bitaŋkpiibi bɔtee nimbiin. 6 An pu ní Tibɔmɔntiil bàn̄ bitaŋkpiibi, án nín làá ŋá pu bi yaa sòon̄ bi-bɔti kii binifoobee, bí nīn bí dimaŋfalin ŋfamin Unimbɔti nimbiinee.

Dū dipɔl din Unimbɔti pú-see kí tūtuǹ a-juti

7 Duulinya kúntitam tóobiń, ní ŋúb́ ni-ba mmɔntiim kí fìntīmaan kí ŋmā kí nīn mèé. 8 Ama kí wàatēe, ní nīn néeḿmaan tɔb tikpil, kun puee un cáá dineendi tikpilee bìintí ikpiti tikpil pu ní^a. 9 Ní nīn fòol̄ ni-jutiibi ni-dumpui kí taa nín̄ gbùkum̄. 10 Kii Unimbɔti nín pú-ni ŋŋmam mì bí tɔbin puee, nín̄ cáa tútúm̀maan tɔb. Ni yaa bíi ŋáań mimmee, binib làá ká Unimbɔti ŋanti kɔkɔ tin u là kí tīī-bee. 11 Un ní Unimbɔti pú ú nīn sòoǹ u-bɔtee, ń sòoǹ-tì. Un ní u yaa tí pú ŋŋmam ú nīn tútúǹ u-jutiibee máaǹ kí dū ŋŋmam min Unimbɔti tīī-uee ní kí dūú tūtuǹ binib, án nín làá ŋá pu tin kɔkɔ ni ŋáań nì Yeesu Kriisitoo tūtuntam puee, án nīn tìì Unimbɔti tinyoolee. Úǹ di pée yì tinyool nì mpɔn kí nīn cá jaanjaan! Ameeni.

Jī falaa Yeesu pu

12 Nnabineeŋkaamu, án taa ŋá-ni maamaaci icɔŋkikpaan in poon ni bí nee kii an sá-ni tibɔcanee. 13 An yaa sá yii ní jī falaa un Kriisitoo jíńee, ní nīn fàal̀maan, án nín làá ŋá pu daliŋkin u làá dāá dàkà u-nyootee, ní dāá ká dipɔɔpiŋkpaandi yaadalee. 14 Ni nín nóó Kriisitooyee pu ní bi yaa sìí-nee, án nīn mɔ̄ǹ-ni, kun puee Unimbɔti Fam min cáá tinyoolee bí ni-pu. 15 Ni-kansikin ubɔ falaau ń taa nín̄ sá yii u kūū unil àá u yùn̄ tiba, àá u sá digaŋgandaan, àá u cáá u-ba ki tɔ́ biba bɔtin. 16 Ama an yaa sá yii a nín nóó Kriisitooyee pu ní a yaa bíi jīǹ falaayee, án taa nín̄ cáá-si icoo, á nīn jáaḿ Unimbɔti yii binib béè yii a sá Kriisitoo yɔu.

17 Ŋyunti ŋun Unimbɔti làá sòoǹ báà ŋma bɔtee bāań ní nee. U làá péé péé kí sòoǹ bin sá u-yabee bɔti ní. Mimmee, u yaa ká timbi bin sá u-yabee pu tiba ki sòon̄ee, mana ní bin yíì kaa fōō Unimbɔti Bɔmɔntiiti ki kííyee cee dāa nín bí dee? 18 Kii Unimbɔti gbɔŋku poon nín lī puee yii:

«An yaa pɔ̄ɔ̄ ki tīī bin nóó Unimbɔtee

ń tin ŋmátée,

mimmee bin kaa nóó Unimbɔtee nì bikpitiŋaliibee,

bíǹ cee dāa nín bí mana dee?»

19 Míǹ puee, bin bí ki ŋáań min Unimbɔti là ní ki bíi jīǹ falaayee ń pɔ́ɔǹ bi-ba kí mɔ̀tīí nīn ŋáań tiŋan, kí dū bi-mákal kɔkɔ kí ŋá bi-náanliu un ŋáań tin u pōoǹee ni.