1 Peetroo 3

Binimpoobi nì bi-calib

1 Nimbi binimpoobi mun, ní sìntīmaan ni-ba taapu kí tīī ni-calib^a. Niinee ni-calib kansikin biba yaa kaa fōō Unimbɔti bɔti ki kííyee, bi yaa ká ni-bimbimɔntiimee, bí fōō kí kíí án taa nín̄ gíti sá nì kinyɔkɔ ní ní dū kí sòoǹ nì bi. 2 Di sá yii bi làá ká yii ni cáá mbimbimɔntiim ní ki tɔ́-bi. 3 Unimpu yaa là kí nīn ŋān̄ee, an kaa sá ú nīn dàkafī tiwun nyaaŋku ŋmaniŋma pu, an dàkà yii diyikpiboobil nì sindaariya falfatib nì an léeŋkaati, nì tiwammɔntiil dilòondi^b. 4 Ama u máaǹ kí dàkafì u-bimbim min u cááyee pu, an dàkà yii u-pɔbil poon ń nīn ŋān̄, ú nīn mɔ̄, ki bí soooo. An nyaaŋkuee di kaa jòontí. Míǹ di ŋān̄ ki jítiǹ tikɔkɔ Unimbɔti nimbiin. 5 Dooooyee nimpoobi bin nìn bí circir ki máká Unimbɔti puee nín nìn bɔ́ntí bi-ba puee dee, ní ki sìntīǹ bi-ba taapu ki tìì bi-calib. 6 Ti-naanja Abraam nimpuu Saara nín nìn bí puee dee. U nìn sīntiǹ u-ba ní ki tīī u-cal Abraam, ní ki yíì-u u-dindaan^c. Ni yaa ŋáań tiŋan, kaa yàntī tiba ń fàaǹ-nee, mimmee, ni kpántì Saara naantiibi dee. 7 Míǹ mbaantiim ní nimbi bininjabee, ni mun ń nīn ŋúb́ ni-nimpoobi tiŋan, kí nīn nyí yii bi-pɔŋŋu kaa bàn̄ ni-yɔŋu, kí nīn tɔ́-bi^d, kun puee dimaŋfal din kaa kúntée mbaanti ní Unimbɔti làá dāá tīī uninja nì unimpu. Ni yaa bí mimmee, tiba kaa lìkintí ni-wimmeem.

Jī falaa a-deedeeu pu

8 Nimbi bin kíǹee, ni-kɔkɔ ń nīn cáámaan nlandɔkɔbaanti kí nīn sūǹ tɔb saai kí nīn néeń tɔb kii nnabiyaamuee, kí nīn ŋáaḿmaan tɔb tiŋan kí nīn sìntīǹ ni-ba taapu ki tìì tɔb. 9 A-juti yaa ŋá-si min kaa ŋān̄ee á taa téeǹ-u. U yaa tí sīī-saaa, á taa sìì-u kí téeǹ, ama mèè Unimbɔti ń bìin̄ udaan pu^e. Di sá Unimbɔti pōoǹ yii u làá bìin̄ ni-pu ní, an pu ní u yíiń-ni. 10 Kii Unimbɔti gbɔŋku poon nín lī puee, yii:

«Un yaa là kí kàl̄ kí jī mmɔn u-wiiŋyi poonee,

ú cúú u-limbil

kí taa nín̄ sòoǹ tibɔkpitil

kí taa nín̄ mɔ́ntí.

11 Ú fá tikpitil kí nīn ŋáań tin ŋān̄ee,

kí nīn nyàab̀ ŋgbansɔŋfi nì dipɔ́ɔǹdi baabadal.

12 Kun puee ti-Dindaan kpèé bin bí deedeeyee tiŋan

ní ki fòol̄ bi-wimmeem,

ní ki fàtī u-kpaŋkpamboon ki tìì bikpitiŋaliibi^f.»

13 Ni yaa cáá difaŋgiil ki ŋáań tiŋanee, ŋma di làá ŋá-ni tikpitil? 14 Báà tiŋan tin ni ŋáańee pu ní ni yaa bíi jīǹ falaayee, ní taa yàntī án nīn wù-ni. Ní taa yàntī binib ń bīil̀ ni-pɔbiliŋ kí kɔ́ǹ-ni tifaandi. 15 Ama, ní nīn tɔ́maan ti-Dindaan Kriisitoo ni-pɔbiliŋin^g, kí bɔ́ntí kí nīn cí baabadal un kamaa di yaa bālifì-ni ni-mákal din ni cáá Kriisitoonee taapuee, ní ŋmā kí kíí-u. 16 Ama ní kíí an nibee soooo kí nīn tɔ́maan-bi, kí taa yàntī bí ká ni-pu ibɔkpiti iba kí sòoǹ. Ní nīn gbíntì ki dàkà ni-bimbimɔntiim min ni ká Kriisitoonee, án nín làá ŋá pu ubɔ yaa bàà làá bīil̀-nee, icoo ń cúú udaanee. 17 An ŋān̄ á jī falaa tiŋan tin a ŋáańee pu, míǹ di yaa sá min Unimbɔti lèe, ki jítiǹ á jī falaa a-kpitii pu. 18 Di sá yii míǹ ní Kriisitoo u-ba mun kpíì binib kpitii pu. U kpíì dibaba ja ní binib kpitii pu, úǹ un bí deedeeyee kpíì bin kaa bí deedeeyee pu. U ŋá míǹ kí ŋmā kí cáań-ti Unimbɔti cee ní. Bi kūū-u ama ní Unimbɔti Fam fātìi gíiǹní-u dimaŋfalin. 19 U kpíìyee ní ki cūtì ditaŋkpiilin ki sòon̄ Unimbɔti bɔti ki tīī bitaŋkpiibi bin bí sarkan niinee, 20 an dàkà yii binib bin kɔkɔ nìn bí Noowa yuntiŋuee. Bi-kansikinee, binib binii jantanja di nìn kɔ́ meelan ki dēeǹ nnyim pu ki ŋmátì. Ama bin kíǹee kpíì, kun puee bi kpēē Unimbɔti mɔtiiki fám ŋyunti ŋun Noowa nìn bíi kpáà meelee^h. 21 Nnyim min nìn fīī binib biniiyee náań nì min ni fùul̀ ki kāntí difiil nan ní. Unimbɔti nyim difaldee kaa sá kí lēē tiwun pu jɔkɔnti, an sá kí mèè Unimbɔti ú fíntí ti-pɔbiliŋ ń nyā circir ní. Yeesu Kriisitoo fìkititam pu ní Unimbɔti nyim difaldi cáá mpɔn kí fīī-ti. 22 U búntì yilpu ki kāl̀ Unimbɔti ŋaŋgiiliŋu pú, kí jī dibeel ituun nì bin kɔkɔ cáá ipɔn ki bí yilpuee pu.