Peetroo ŋmàn̄ kugbɔŋu nee ki tīī Kriisitoo yab kɔkɔ ní (1.1). Kun páb́-u u ŋmàn̄-kuee di sá ú jáǹ binib bin kɔ́ Kriisitoo nikitiŋ kansikin ki dàkà tinyimɔmbɔti tin nyáń ti-ba nì Tibɔmɔntiilee. Bi-dàkatam gbanti yāntì Kriisitoo yab biba gáatì ki kíǹ ki ŋáań bi nín là puee. Kí ŋmā kí jáǹ nnyimɔn dàkaliibee, see Kriisitoo yab ń pɔ́ɔǹ kí béé Unimbɔti nì Yeesu Kriisitoo tiŋan, kii bin ká Yeesu nì bi-nimbibulii ki gbìl̄ u-dàkatamee nín dàkā-bi puee.

Ijaam boonee (1.1-2), Peetroo sòon̄ ki bántì Kriisitoo yab nín máaǹ kí nīn cáá mbimbim min kí nīn yú deedee nì Unimbɔti nín yíiń-bi puee, kii bin ká ti-Dindaanee nín lēē u-pu seera puee (1.3-21). Míǹ boonee Peetroo nyántì bin dàkà tinyimɔmbɔtee tuuŋŋi nì bi-bimbim ki páaǹ mpaampiin pu (2.1-22). U sòon̄ nnyimɔn dakaŋ gbanti pu tiba ayil 3 poon. Bi bèel̄ bin kā ki cí Kriisitoo gítintamee ní ki lì yii an kpá kí ŋá míǹ. Ama Peetroo kíí bin sòoǹ mimmee yii Kriisitoo yaa kaa láá gítìńee, an sá Unimbɔti mɔtiiki pu. Di sá yii u bíi pūǹ binib tikpil diyimɔɔl bí fōō Yeesu kí kíí kí ká difiil ní.

Bin dàkà tinyimɔmbɔtee pée bí duulinyan ní. An puee Peetroo gbɔnliliitiiku nee sá ki tīī timbi waanee nib mun ní. Ku tìì fookiidambi kunyannyaau bí nyàab̀ kí mɔ̀tīí béé ti-Dindaan, án nín làá ŋá pu adaka ŋin kaa túĺee ń taa gáatí-bee.