Tibɔti tin Yeesu
lēē ki dàkā
Yoowaneesee
Tibɔkilkaal
Yoowaneesi un ŋmàn̄ Unimbɔti nyɔɔbundi poon gbɔnluŋkikaakuee sòon̄ tibɔti tin jítì jítì Yeesu Kriisitoo lēē ki dàkā-uee pu (1.1-2). U máafì tin u ká ŋyunti ŋun Circir Fam dɔ́miń u-nee (1.10). Ŋyunti ŋun u bíi ŋmà u-gbɔŋku neeyee, u nìn bí kitimbilii kin nnyim māntìi tú bi yíì yii Patimoosee ní. Kitimbilii gbanti bí Asii tiŋki ŋwìiń jeetilaŋki pú ní, (kitimbilii gbanti bí Tuurkii tiŋkin díǹ). U nìn sòon̄ Tibɔmɔntiil ní bi cúú-u ki cūnnì niin kuyuŋu (1.9). Ŋyunti gbantee, Room yab gɔminakpaaŋwu nìn bíi sàantí Kriisitoo yab. Yoowaneesi nìn ŋmàn̄ tigbɔn ki tīī Asiiwaai Kriisitoo nikitiŋ aluli ní.
Bi yaa nìn bíi sàantí Kriisitoo yabee, an nìn sá yii bi nín nìn fōō Yeesu Kriisitoo ki kíí yii úǹ baba di sá bi-Dindaanee pu. Agìń yuntiŋu gbanti poon ní Yoowaneesi ŋmàn̄ kugbɔŋu nee kí tīī bi-fookiiu nì bi-mákal mpɔn. Kugbɔŋu nee jaŋkpaandi sòoǹ aleedaka ŋin Yoowaneesi kée pu ní. Tidaandi nì tibɔŋmantikaal ní u dūu sòon̄ ŋi-pu, ní fookiidambi bin mántiǹ Dipooŋkpikilee ŋūǹ kí gbìl̄ taapu sɔkɔmii, ama ní ki sá maamaaci bɔti ki tīī bin kíǹee. Aleedaka ŋin bɔti Yoowaneesi sòoǹee nyáń ŋi-ba ŋi-ba, ama ní ŋi-kɔkɔ sòoǹ tibɔbaantiil pu. Binib nín gbìl̄ aleedaka gbanti taapu puee nyáń u-ba u-ba tikpil. Tibɔti tin pu kugbɔŋuee tɔ́kɔ́ee cántì tiŋan: min kamaa ipɔŋkpiti dá láá jíń dinyandee, Yeesu Kriisitoo un baba sá ti-Dindaanee làá dāá já kí fōō dijajil diluŋkikaal kí tīī Unimbɔti nì u-yab.
Yoowaneesi péé péé ki lēē u-ba ki dàkā yii u sá Kriisitoo un fīkitèe tuuŋŋu (1.1-8).
- Dijampeepeekaal poonee, Yoowaneesi sòon̄ an nín dī pu u ká dileedakapeekaalee. Dileedakal gbanti poonee, Yeesu tīī-u ditundi ú ŋmà tigbɔn kí tīī Kriisitoo nikitiŋ aluli ŋin bí Asiiwaayee (1.9–3.22).
Míǹ boonee ní an yōoǹ Yoowaneesi ki cáa jɔ́ntì yilpu, laakin u ká yilpu wannaaŋkaati tin bí ki jáaḿ Unimbɔti nì Yeesu Kriisitooyee (ayil 4–5), kugbɔŋu nì tiwamboobikaal tiluli (6.1–8.1), akantán aluli (8.2–11.9), kupeebiliŋŋu nì ipeel ili bɔti (12.1–13.18), Dipibil nì binib 144 000 bin u dée, ibɔsoon in bɔti ituun sòon̄ee (14.1-20), nsambiyaamu mululi mun poon Unimbɔti ŋuul kēe (15.1–16.21), Babiloon nàantam nì bi nín làá já kí pɔ̄ɔkiǹ upeel nì inyimɔn bɔnaatiliu nì sitaan puee (17.1–20.10). U tí ŋmàn̄ ki sòon̄ kutagbɔmpɔŋu nì kitimpɔŋ nì Jeerusaleempɔɔn un u kée (21.1–22.5). Kí kúntí kugbɔŋu neeyee, Yoowaneesi sòon̄ tibɔti ki kpáafì báà ŋma. U gíti sòon̄ dipoondi din Yeesu un fīkitì ditaŋkpiilinee líì-tee yii: «M dòoń kɔŋkɔnnee» (22.6-21).
Bin kàaǹ kugbɔŋu nee díǹee làá gbìl̄ kugbɔŋu nee taapu mmɔntiim ŋyunti ŋun ní baa nyàab̀ kí béé nnaabukpaan ŋun dòońee taapu nyíki nyikee. Yoowaneesi landɔkɔŋu kaa sá ú fàaǹ bin làá kàaǹ kugbɔŋu neeyee, ama kí tīī-bi kunyannyaau iyunti in pɔ̄ɔ̄yee poon ní. Dileedakal gbɔŋku leedakaŋ sá kí yàntī bí béé Kriisitoo tundi nì u-fìkititam nín cáá kudapɔɔu pu ki tīī u-yab kɔŋkɔnnee nì iyunti in bí ki dòońee puee ní.