Juudi 1

Kugbɔŋu kun

Juudi

ŋmàn̄ee

Ijaam

1 Man Juudi, Yakubu^a naal un sá Yeesu Kriisitoo tɔntɔnliuee di ŋmàn̄ kugbɔŋu nee.

M ŋmàn̄-ku ki tīī nimbi bin ti-Baa Unimbɔti yíiń ki néeń-ni ki dū-ni ki kpáafì ki yóoǹ Yeesu Kriisitooyee ní.

2 Unimbɔti ń nīn sūǹ ni-saai baabadal, kí nīn tìì-ni ŋgbansɔŋfi tiŋan, kí nīn néeń-ni tikpil.

Bin dàkà tinyimɔmbɔtee

(2 Peet 2.1-17)

3 M-nabineeŋkaamu, m nìn baasii mɔ̀ kí ŋmàń-ni difiil din ti-kɔkɔ ká nee bɔti. M dāa lafun kpēēyee, an pée sá yii ḿ ŋmàń-ni kí tīiń-ni kunyannyaau ní ŋmā kí nīn jáà ibaamɔn in Unimbɔti dūu tīī u-yab iaa bí kí kpántée pu. 4 Di sá yii binib biba bin kaa tɔ́ Unimbɔtee ŋá soooo ki kóoń ni-kansikin ki kpántì tiŋan tin Unimbɔti ŋá-tee bɔti, ki ŋáań min kaa kítèe, ki yíì, kaa là Yeesu Kriisitoo un baba sá ti-kpiliu ki sá ti-Dindaanee. Ama dooooyee ní ditafadaaldi din dɔ̄ ki cí bidambee pée ŋmàn̄ Unimbɔti gbɔŋkun.

5 M nyí yii ni pée nyí tibɔti nee ki yóoǹ dooooyee, ama m là kí gíti téetí-ni ti-pu. Kéè ni nyí ti-Dindaan nín nìn fīī Isirayeel yab ki nyántì Eejipitee, boonee u dāa fātìi kúntì bin kaa nìn là kí fōō kí kííyeeyaa^b! 6 Téetímaan tin nìn jítì ituun iba puee: iaa nìn là kí nīn bí mpaan ŋun pu Unimbɔti yóoǹ-iee, ama ní ki dūu fá ki póotì i-laŋki. Unimbɔti nìn bóob́-i nì ikusaka kí nīn cá jaanjaan, ní ki dū-i ki tɔ́ dibɔmbɔŋkpaandin í nīn kā niin ki cí ibɔsooŋkpaan dal. 7 Ní téetímaan ntimu mun bi yíì Soodoom nì Goomoora nì ntimbilimu mun nìn bí ki pìlīǹ-muee bɔti. Bi mun nìn tí ŋáaǹ kii ituunee nín nìn ŋá puee ní, ki mun nìn dū bi-ba ki tīī dijɔkɔntundi nì atuŋkpiti ŋin unil kaa máaǹ kí ŋée. An puee ní Unimbɔti nìn yāntì ŋŋmi ŋun kaa kúùyee dɔ́miń ki wùn̄-bi, ki dáaĺ bi-tafal, án nīn sá kudaaŋŋu kí dūú dàkà báà ŋma.

8 Binib bin kóoń ni-kansikinee, míǹ ní bi mun tí ŋáań ki bí yii bi wāĺ, ní an càntī bi cáá bi-ba ki kɔ̄ntí tijɔkɔndin, ní ki kpèé Unimbɔti pɔŋŋu fám, ki sìí Tinyooldambi bin bí yilpuee. 9 Ama, ŋyunti ŋun ituun kpiliu un bi yíì Mikayeelee nì Sitaan nìn bíi jáà ki kpákà Mooyiisi wunti puee, ntuunee kaa nìn kpáàa dākafì kí sìì Sitaan gba, see ŋu nín pée tùkū-u yii: «Ti-Dindaan di làá dáaĺ a-tafal^c.» 10 Ama ní bíǹ sìí tin baa nyée, ní tin bi nyí kii kumooun peelii nyítamee di kúntí-bi. 11 Mbusu dɔ̄ ki cí-bi, kun puee bi táá Kayeen saŋŋu, ní ki dū bi-ba ki tīī isaŋkpiti ki kāntí animbil kii Balaam nín nìn ŋá puee, ki kúù kii Kooree yab nín nìn yíì kaa tɔ́ Unimbɔti ki kpíì puee^d. 12 Ni nì bi yaa kpáfì ki jīǹ kunabitiiu jikaatee, bi-bimbim bíiĺ-ni ní. Bi jīǹ tikpil, an kaa cáá-bi icoo, ki sūǹ bi-ba pu ŋma. Bi bí kii atagban ŋin kubuŋu cáa yìiǹ, ntaanyim kpá poonee, ní ki bí kii isufi in kaa pée lòoǹ kpataaayee, ki kpíì an kɔkɔ pu, ki kpīkitì. 13 Bi bí kii tiŋku nín wòoǹ pu tinyiŋgban yíkí ki pùkufī puee ní, bi nyāntiń bi-tuuŋŋi ŋin cáá icooyee. Bi tí bí kii iŋmalbijaa in nyēē ki pùntēe ní. Unimbɔti yóoǹ-bi mpaan ŋun sá dibɔmbɔŋkpaŋkpaandee, niin ní bi làá nīn bí baabadal. 14 Bíǹ pu ní Eenɔki un sá Adam naantitɔntɔkɔl ululuútee nìn sòon̄ dooooyee ki yóoǹ yii: «Ní pīlifì, ti-Dindaan dòoń nì u-circir tuuŋyi kutukub kutukub. 15 U làá sòoǹ báà ŋma bɔti, ní kí kpɔ̀ bin kɔkɔ kaa tɔ́-uee bɔti, bi-tuŋkpitiŋ ŋin bi ŋáańee kɔkɔ nì bi nín yíì Unimbɔti kaa fōō-uee, nì bi nín kaa tɔ́-u ki sòoǹ-u tibɔfan tiŋyee kɔkɔ pu^e.» 16 Binib gbantee, baabadalee, an kaa pée mɔ̄ǹ bíǹ ŋma ní, ní bi yáliŋkí ní ki ŋáań tikpitil tin fáatì-bee, ní ki sòoǹ tilambibɔti, ki cáá nyɔɔmálmal ki ŋmàtíǹ binib ki jīǹ bi-pu.

Tibɔkpaafikaal

17 Ama m-nabineeŋkaamu, nimbi ń téetí ti-Dindaan Yeesu Kriisitoo kpambaliŋ nín nìn sòon̄ nì ni tibɔti tin ki síiǹ dooooyee pu. 18 Bi nìn tùkū-ni yii, iwinjoolkaa poonee, binib làá dāá nīn bèel̄-ni, ní ki ŋáań tikpitil tin fáatì-bee^f. 19 Bíǹ di cāabìń digàntil binib kansikin. Bi nín là miŋyee di kpòotī-bi, an kaa sá Unimbɔti Fam. 20 Ama nimbee, m-nabineeŋkaamu, nín̄ mɔ̀tīi cámaan nyɔkɔpu ni-fookiiu un bí circiree poon, ni-wimmeem ń nīn cáá Unimbɔti Fam pɔŋŋu. 21 Ní nīn pée gbíntì ki bí Unimbɔti un néeń-nee ŋaan, kí nīn cí ti-Dindaan Yeesu Kriisitoo usaasɔlee ń dāá tīī-ti dimaŋfal din kaa cáá dikúntilee.

22 Sɔ̄maan bin dàkafī ki gùkufēe saai, 23 kí dáaliń-bi kí nyāntiń ŋŋmi poon kí fīī-bi. Ní sɔ̄ bin kíǹee mun saai, kí nīn nyíǹ ni-ba bí taa dū bi-kpitii kí tìntī-ni. An puee, ni-ŋalii ń taa gbēē bi-bɔkutiŋ ŋin bi pēē ki ŋáań bi-jɔkɔntuuŋŋee kpaŋkpam.

Unimbɔti tinyooldaan

24 Tí nyɔ̄ŋkì Unimbɔti un di ŋūǹ kí ŋúb́-ni ní taa lítée. Úǹ di ŋūǹ kí cáá-ni kí cùnnì u-cee tinyoolin nì dipɔɔpindi, bí taa ká ni-pu tiba. 25 Tí nyɔ̄ŋkì Unimbɔtibaanti un dī ti-Dindaan Yeesu Kriisitoo pu ki fīī-tee. Úǹ di yì tinyool nì tikpaandi nì mpɔn, nì ŋŋmam doooo ŋkilkaamin nì kɔŋkɔnnee kí nīn pée cáa cá jaanjaan! Ameeni.