Dileedakal 2

Tibɔti tin Yeesu sòon̄ Eefeesi nikitil puee

1 «Á ŋmà kugbɔŋu kí tīī m-nikitil din bí Eefeesee tuuŋŋu yii:

«Un ŋúb́ iŋmalbijaa iluli u-ŋaŋgiilin ki còom̄ fitilab tɔ́kɔŋkaati tiluli tin sá sindaariyee kansikinee di lī yii: 2 M nyí a-tuuŋŋi ŋin a túńee kɔkɔ pu, m nyí falaa un jíń-see, ki nyí a-pɔ́ɔǹtam. M nyí a-pu yii aa là binikpitib bɔti. A cɔ́ŋkì ki béè bin bí yii bi sá Yeesu kpambaliŋ, kin kaa sée, ní ki bīitì binyimɔndambi pu. 3 A cáá dipɔ́ɔǹdi, ki jíń falaa m-pu kaa yɔ̄tì a-wunti. 4 Ama tiba ní m cáá kí wòoǹ-si, di sá yii a nín nìn néeń-mi ŋkilkaamin puee, a dūu fá, aa ti néeń-mi míǹ. 5 An puee á téetí laakin ní a lítèe. Á kpántí a-bimbim, kí fàtīí nīn tūǹ atummɔnti ŋin a nìn tūǹee. A yaa yíìyee, m làá dāan̄ a-cee ní kí yòon̄ a-fitilau nì u-tɔkɔŋkaati ti-paaŋŋu. 6 Ama nì míǹ kɔkɔee, a cáá tiba tì ŋān̄. Tíǹ di sá a nín ná atuun ŋin Niikoolaati yab tūǹee, kii ma mun nín ná-ŋi puee.

7 «Un yaa cáá ditafalee ń pīlifì Circir Fam nín bíi sòoǹ nì Kriisitoo nikitiŋ puee.

«Un yaa jáń ki jíńee, m làá tīī-u dimaŋfal subu bun yú Unimbɔti kpaabunee bil ú ŋmɔ́^a.»

Tibɔti tin Yeesu sòon̄ Simiirni nikitil puee

8 «Á ŋmà kugbɔŋu kí tīī m-nikitil din bí Simiirnee tuuŋŋu yii:

«Un sá upeepeekaa ki sá uluŋkikaayee, man un nìn kpíì ki fīkitèe di lī yii: 9 M nyí a-falaau nì a-sool, ama nì míǹ kɔkɔee, a sá ugaaja ní. M nyí bin kúŋfí a-boon ki yíì bi-ba yii Juuda yab kin kaa sée. An nibee sá Sitaan nikitil ní. 10 Á taa fàŋkì falaa un dɔ̄ ki cí-si a làá jēe pu. Di sá yii Sitaan làá cɔ̄ŋkì-ni kí yàntī bí cūtì ni-kansikin biba kí tɔ̄ sarka, ní ní dāá jī falaa iwiin saalaa. Nín̄ yú deedee áli a-kúm dal, ní ḿ dāá tīī-si dijajil beefuuliiki, an dàkà yii dimaŋfal din kaa kúntée.

11 «Un yaa cáá ditafalee ń pīlifì Unimbɔti Fam nín sòoǹ nì Kriisitoo nikitiŋ puee.

«Un yaa jáń ki jíńee, ŋkúnliliitiim kaa dāa gíti gbèetī udaan.»

Tibɔti tin Yeesu sòon̄ Peergaam nikitil puee

12 «Ŋmà kí tīī m-nikitil din bí Peergaamee tuuŋŋu yii:

«Un ŋúb́ kitàataajiki kin jītí ajan liitilee bí yii: 13 M nyí yii kitiŋ kin poon Sitaan jíń dibeelee ní a kóò. Ama ní a ŋúb́ m-bɔti deedee kaa páatì a-fookiiu m-pu. A gbíntì ki ŋúb́ an píkí ki kpáaǹ ŋyunti ŋun bi nìn kūū m-tɔntɔmmɔntiu Antiipa ni-tiŋki kin sá Sitaan kɔŋkooŋŋuee nee. 14 Ama nì míǹ kɔkɔee, m làá wòoǹ-si tiba pu. Di sá binib biba bí a-cee ki ŋáań kii Balaam nín nìn sáŋkì Balaaki ú ŋmàtiǹ Isirayeel biyaamu bí ŋmɔ́ tiwaatootinan kí ŋá tilaakpaal kí lítí ikpitinee^b. 15 Míǹ ní si mun a-ba cáá binib bin tūǹ atuŋkpiti kii Niikoolaati yabee. 16 An puee á kpántí a-bimbim. A yaa yíì, m làá dāan̄ kí dū m-nyɔɔbundi din sá kitàataajikee kí já nì an nibee kɔŋkɔnnee.

17 «Un yaa cáá ditafalee ń pīlifì Unimbɔti Fam nín bíi sòoǹ nì Kriisitoo nikitiŋ puee.

«Un yaa jáń ki jíńee, m làá tīī-u maana un bí dibalinee, nì ditaŋkpapindi din pu bi ŋmàn̄ diyimpɔndi^c diba din báà ubɔ kaa nyée, see un fōō ditaŋkpalee.»

Tibɔti tin Yeesu sòon̄ Tiyatiir nikitil puee

18 «Ŋmà kugbɔŋu kí tīī m-nikitil din bí Tiyatiiree tuuŋŋu yii:

«Unimbɔti Jipɔɔn un nimbiliŋ ŋmóò làka laka kii ŋŋmi, u-taaŋi jìl̀ pàlpal kii tasa ní bi fíntèe di lī yii: 19 M nyí tin kɔkɔ a ŋáańee, m ká dineendi din a cááyee, nì a-fookiiu, nì a nín tūǹ atuun ŋin ki tútúǹ binibee nì dipɔ́ɔǹdi din a cááyee. M ká yii atummɔnti ŋin a bíi tūǹ kɔŋkɔnnee jítiǹ apeepeekaa. 20 Ama nì míǹ kɔkɔee, m làá wòoǹ-si tiba pu, di sá a yāntì unimpu Jeesabeel^d un yíì u-ba yii u sá Unimbɔti bɔnaatiliuee cáá u-dàkatam ki kíiĺ m-tɔntɔnliibi yii bi yaa ŋáań tilaakpaalee, an kaa cáá tiba, ki yàntī bi ŋmóò tiwaatootinan. 21 M pú-u ŋyunti ú bàà kpántí u-ba kí fá u-bimbikpitim ní u yíì. 22 An puee m làá yàntī ú lítí iween pu kí jī falaa ki kpáaǹ u nì bin pēē kinyɔkɔ ki ŋáań tilaakpaalee. Asee bi yaa kpántì bi-ba ki fá bi-bimbikpitim baba. 23 M làá fáá kí kpɔ̀ u-yab bin nóó-uee ní m-nikitiŋ kɔkɔ ń béé yii man di sá un nyí binib landɔkɔi nì bi-làtamee. M làá dāá pà báà ŋma tuuŋŋi paati ní^e.

24 «Ama nimbi bin kíǹ Tiyatiir nikitil kansikin kaa bí bi-tuŋkpitiŋ gbanti poon, kaa bífì kun bíǹ yíì yii Sitaan bɔti tin bí dibalin ki nyóòyee, nimbee, maa pée cáá tiba kí lì ni-pu. 25 Ama tin baba m làá lèe di sá ní nīn ŋúb́ tin ni cááyee gbīŋgbim áli ḿ dāá gítiń.

26 «Un di yaa jáń ki jíń ki gbíntì ki nìkì ki ŋáań min fáatì-mee ki tin kátì-kuee, m làá yàntī ú jī dibeel atimbun pu. 27 Mpɔn ŋun m làá tīī udaan ú dūú kpàà-bee dāa pɔ̄ɔ̄ kii tikútee ní. U dāa ŋūǹ kí dūú wīī binib sɔkɔmii kii atansambilee. 28 Míǹ ní mama m-ba fōō mpɔn gbanti m-Baa cee. Ní ḿ dāá tīī un jáń ki jíńee utaafaaŋmalbija^f.

29 «Un yaa cáá ditafalee ń pīlifì Unimbɔti Fam nín sòoǹ nì Kriisitoo nikitiŋ puee.»