Tibɔti tin Yeesu sòon̄ Saardi nikitil puee
3
1 «Ŋmà kugbɔŋu kí tīī m-nikitil din bí Saardee tuuŋŋu yii:«Un cáá Unimbɔti Fam miluli nì iŋmalbijaa ilulee di bí-u yii: M nyí a-tuuŋŋi, ki nyí yii a-yindi yíkì yilpu. Bi nyí a-pu yii a sá dinikitil din cáá dimaŋfalee, ama ní a kpíì. 2 Fìntī kí tíkiń tin dáá bí a-ni kaa kpíì ama ki làá kpúee, kun puee maa ká a-tummɔntiŋ aba m-Nimbɔtiu cee. 3 Á téetí bi nín nìn dàkā-si Unimbɔti bɔti a fōō-tì ki kíí puee. Á nīn gbíntì ki ŋúb́-tì kí kpántí a-ba. A yaa kaa fīntèe, m làá dāan̄ ŋyunti ŋun saa nyí yii m làá dāan̄ee ní kí túuǹ-si kii unaayuu nín tūuntí unil pueea. 4 Ama nì míǹ kɔkɔee, biba bí Saardi nikitil kansikin kaa ŋá ikpiti bi-bɔkutiŋ pīiǹ. Binib gbanti dāa pēē abɔkutipiin káŋkaŋ ní man nì bi ń nīn táá ki còom̄, kun puee bi máaǹ míǹ.
5 «Míǹ ní un yaa jáń ki jíńee dāa pèentí abɔkutipiin káŋkaŋ. Maa làá dāá kpìtī udaan yindi dimaŋfal gbɔŋkub poon, ama m làá dāá lì m-Baa nì u-tuuŋyi kɔkɔ nimbiin yii man di yì-u.
6 «Un yaa cáá ditafalee ń pīlifì Unimbɔti Fam nín bí ki sòoǹ nì Kriisitoo nikitiŋ puee.»
Tibɔti tin Yeesu sòon̄ Fiiladeelfii nikitil puee
7 «Ŋmà kugbɔŋu kí tīī m-nikitil din bí Fiiladeelfiiyee tuuŋŋu yii:
«Un sá circir ki sá ubaamɔnee, un di ŋúb́ Daafiidi saafiiu ki yaa pīitì, ubɔ kaa ŋūǹ kí dūú pìin̄, ki yaa tí dūu pīiǹ, ubɔ kaa ŋūǹ kí pìitēe, 8 di bí-u yii: M nyí atuun ŋin kɔkɔ a túńee. M pīitì kipunyɔkɔ ki wāaǹ a-nimbiin, ní ubɔ kaa ŋūǹ kí dūú pìin̄. Kun puee m nyí a-pɔŋŋu kaa náaǹ, ama a ŋúń ki ŋúb́ m-bɔti, kaa dū-mi ki fá. 9 Á kpèè tin m làá ŋá kí tīī-see: Binib bin kpáfì ki sá Sitaan yab ki mɔ́ntí yii bi sá Juuda yab kin kaa sée, m làá dū-bi kí ŋá a-ŋaan. M làá yàntī bí dāá gbàan̄ a-taaŋi taapu ní kí béé yii m néeń-sic. 10 Kun puee a nín pɔ́ɔǹ ki ŋúb́ m-bɔtee, ma mun làá ŋúb́-si ŋyunti ŋun dinimbinaamandi làá dāá jēetí duulinya nib kɔkɔ pu kí cɔ̄ŋkì-bee. 11 M dòoń kɔŋkɔnnee. Á ŋúb́ tin a cááyee gbīŋgbim ubɔ ń taa fōō a-cee kibeefuulii kin bi tìì bin jáń ki jíńee.
12 «Un yaa jáń ki jíńee, m làá dū-u kí kpántí m-Nimbɔtiu diiku jaantalkuu ní ú báań kí nīn kíǹ ki bí niin kí taa ti nyā, ní ḿ dāá dū m-Nimbɔtiu yindi nì m-Nimbɔtiu tiŋki, Jeerusaleempɔɔn un nyánní yilpu m-Nimbɔtiu ceeyee yindi nì man yimpɔndi kí ŋmà udaan pud.
13 «Un yaa cáá ditafalee ń pīlifì Unimbɔti Fam nín bí ki sòoǹ nì Kriisitoo nikitiŋ puee.»
Tibɔti tin Yeesu sòon̄ Lawoodiisee nikitil puee
14 «Ŋmà kugbɔŋu kí tīī m-nikitil din bí Lawoodiiseeyee tuuŋŋu yii:
«Un bi yíì Ameeni u sá un lèekī seera deedee nì ibaamɔn, ki sá Unimbɔti wannaaŋkaati kɔkɔ nyeelee, 15 di bí-u yii: M nyí atuun ŋin a túńee kɔkɔ. Aa sɔ̀m̀aaa, kaa tùm̀ mun. A yaa là kí nīn sɔ̀m̀aaa, á nīn sɔ̀m̀. A yaa là kí nīn tí tùm̀maaa, á nīn tùm̀. 16 Kii a nín bí gbìmmm kaa sɔ̀m̀aaa, kaa tùm̀ muee, m làá wùliŋkì-si kí fá. 17 Di sá a lì yii sii sá ugaaja ní. A-gaajati tin a ká nee puee, aa ti là tiba nì tiba. Di sá kun pu a lì mimmee di sá yii aa nyí yii a sá ufalaadaan, ki sá unandaan, ki sá usoodaan, ki sá ujɔfu, ki sá ucancaŋgbeefu. 18 An puee m sáŋkí-si yii á dāan̄ m-cee kí dā sindaariya un bi dū ŋŋmi ki cɔ́ŋkì ki ká yii u sá umɔntee, ní kí nín ŋmā kí kpántí ugaaja, kí dā m-cee abɔkutipiin kí pèen̄ kí bìin̄ a-cooi pu, kí dā nnyɔkɔ m-cee kí jōō a-nimbiliŋ kí wāl̀. 19 Man dátí bin m néeńee tafal ní ki sáŋkí-bie. An puee á ká kunyannyaau kí kpántí a-ba. 20 Á pīlifì, m yú kipunyɔkɔ pu ki ŋáań gaafalaa. Un yaa gbìl̄ m-nyɔkɔ pu ní ki pīitì-mee, m làá kɔ́ udaan cee ní man nì u ń kpāfì kí jī.
21 «Un yaa jáń ki jíńee, m làá yàntī ú dāan̄ kí kàl̄ kí kɔ́ĺ-mi m-beelin, kii ma mun nín jáń ki jíń pu ki dɔ́miń ki kāl̀ m-Baa beelin ki kɔ́ĺ-u puee.
22 «Un yaa cáá ditafalee ń pīlifì Unimbɔti Fam nín bí ki sòoǹ nì Kriisitoo nikitiŋ puee.»