Dileedakal 12

Unimpu ubɔ nì Sitaan

1 Boonee ní maamaacikpaŋkpaan ubɔ nyáń ki páaǹ kutagbɔŋu pu: unimpu ubɔ pēē ŋwìiń ní ki tɔ́kɔ́ uŋmal pu ní ki cíkí kibeefuulii iŋmalbijaa saalaa nì ili náká ki-pu. 2 Unimpuee làá màal̀ ní ki yáliŋkí imatiŋween ki gbáà ibiil.

3 Ní maamaaci ubɔ gíti nyáń ki páaǹ kutagbɔŋu pu: an sá kupeebiliŋŋu kubɔ, ku sá kumaŋu ki cáá ayil aluli nì iyin saalaa, ní kibeefuulii cíkí diyil sá kamaa pu^a. 4 U-juul ní u dūu fùkū iŋmalbijaa yaa yākatì mitee diba pu ki lúkufìń kitiŋ pu, ní ki kíǹ ki yú ki kɔ́ĺ unimpu un làá màal̀ee, u yaa màl̄ee ú cúú kibikee kí ŋmɔ́^b. 5 Ní unimpuee dūu màl̄ kibininjabiki. Kíǹ di làá nīn cáá mpɔn kii tikútee^c kí dūú kpòotī atimbun kɔkɔ, ní bi yōoǹ u-bikee malaa ki jɔ́m̀ Unimbɔti cee, u-beejal laŋki. 6 Ní unaati sáǹ ki búntì kuteeun laakin binib kpée. Niin ní Unimbɔti bɔ́ntì ki yóoǹ-u ú cùú kàl̄ bí nīn kpīintí-u kí tin sāā abin ata nì dijandi.

7 Niinee ní kujaau fōō ki píĺ kutagbɔŋu pu, Unimbɔti tuuŋyi kpiliu Mikayeel nì u-yab bí ki jáà nì kupeebiliŋŋuee nì u-yab, 8 ní Mikayeel nì u yab jáń ki pɔ́ɔkiǹ-bi, ní ki jìn̄-bi bí taa ti kàl̄ kutagbɔŋun. 9 Ní bi téeń kupeebiliŋŋuee, ukookpiki un bi yíì Sitaan u kíil̀ duulinya kɔkɔee nì u-tuuŋyi ki tɔ́ń duulinyan^d.

10 Ní m gbìl̄ nneen ŋubɔ téeń mpɔn yilpu yii: «Kɔŋkɔnnee Unimbɔti fiil bāań dee! Min bí nee ní ti-Nimbɔtiu nyántì u-beel pɔŋŋu ki dàkā! Kɔŋkɔnnee u-Meesiyau dàkā mpɔn ŋun u cááyee, kun puee ukuŋfil un yú Unimbɔti nimbiin ki kúŋfí ti-nabiyaamu boon ŋwiimpu nì kunyeeuee, bi téé-u ki nyántì^e. 11 Dipibil fatikuu nì Unimbɔti bɔti tin ti-nabiyaamu sòon̄ee pu ní bi jáń ki pɔ́ɔkiǹ-u, kaa fāŋkì kí dū bi-ba kí tīī ŋkúm. 12 An puee án nīn mɔ̄ǹ yilpu yab. Án nīn mɔ̄ǹ nimbi bin kóò kutagbɔŋu puee, ama an sá mbusu ní ki tīī-ni tiŋku nì kitiŋ pu yab, kun puee nì diŋuukpaandi ní Sitaan dūu kpákatìń ni-cee, ki nyí mun yii ŋyunti fiii di kíǹ-u.»

13 Kupeebiliŋŋuee nín ká yii bi téeń-ku ki lúkuń taapuee, ní ku nín jì unimpu un nìn màl̄ kibininjabikee boon. 14 Ní bi tīī unimpuee ifeen ili kii ukaalun feeŋyee, ú ŋàaǹ kí nīn cá kuteeun laakin bi bɔ́ntì ki yóoǹ-u ú cùú kàl̄ bí kpíiǹ-u abin ata nì dijandee^f, ukoobu ń taa ŋmā kí ká-u. 15 Ukoobuee sáń ki jì-uee ní ki wūliŋkì nnyim ki tɔ́ unimpuee boon pú án kpántí dimɔɔl kí yòon̄-u. 16 Ama ní kitiŋ fīī unimpuee. Kitiŋ wāaǹ ki dū nnyim min min kupeebiliŋŋuee bàà wūliŋkì ki tɔ́ń u-boon án bàà yòon̄-uee ki náĺ. 17 Niinee ní kupeebiliŋŋuee fōō unimpuee pu diŋuul ní ki cūtì ki bíi jáà nì unimpuee biyaamu mun kíǹee, bin kɔkɔ tɔ́ Unimbɔti marab ki ŋúb́ Yeesu bɔti deedeeyee.

18 Ní kupeebiliŋŋuee kíǹ ki yú tiŋku gbandi.