Dileedakal 13

Ipeel ili bɔti

1 M kpēēyee, ní ki ká upeel ubɔ nyánní tiŋkun, ki cáá ayil aluli nì iyin saalaa ní ki cíkí u-yiŋŋu kamaa pu kibeefuulii, ní diyil sá kamaa puee disiibil náká ki sìí Unimbɔti. 2 Upeel un m kée náań nì ugbii ní, ní u-taaŋi náań nì digbiŋgbil, ní u-nyɔkɔ náań nì gbikinti nyɔkɔ, ní kupeebiliŋŋuee dū ku-pɔŋyi kɔkɔ nì ku-beel ki tīī-u^a. 3 U-yiliŋee diba nìn fōō tiweendi ki cá ŋkúm, ama ní iweenee dāa dóò, ní an mɔ́ɔkiǹ duulinya yab kɔkɔ ní bi nóó upeelee. 4 Ní binib kɔkɔ bí ki nyɔ́ŋkí kupeebiliŋŋuee ku nín dū ku-pɔŋyi kɔkɔ nì ku-beel ki dūu tīī upeel un nyánní tiŋkunee pu, ní bi bí ki nyɔ́ŋkí upeelee ki lì yii: «Ŋma di ŋūǹ kí dū u-ba kí ŋmàntīǹ upeel nee? Ŋma di ŋūǹ kí já nì u?»

5 Ní bi pú upeelee kinyɔkɔ ú nīn sòoǹ tibɔfan ki bíiĺ Unimbɔti, ní ki tīī-u mpɔn ú nīn ŋáań míǹ kí tin sāā abin ata nì dijandi. 6 U nìn lafun kíĺ ki bíi sòoǹ tibɔfan ki bíiĺ Unimbɔti yindi, nì u-kɔŋkooŋŋu nì bin kɔkɔ kóò yilpuee. 7 Bi nìn pú upeelee nsan ú já nì Unimbɔti yab kí pɔ̄ɔkiǹ-bi^b, ní ki tīī-u tinaakɔti kɔkɔ nì anibul kɔkɔ, nì isoon kɔkɔ nib nì atimbun kɔkɔ pu mpɔn. 8 Kitiŋ pu nib bin yiŋŋi kaa ŋmàn̄ doooo duulinya kíltam dimaŋfal gbɔŋku kun Dipibil din kpíìyee yèe poonee, an nibee kɔkɔ dāa jáaḿ upeelee ní.

9 «Un yaa cáá ditafalee ń pīlifì tiŋan. 10 Un Unimbɔti lī yii bi làá cúú kuyuŋuee, see bí cúú-u kuyuŋu. Un Unimbɔti lī yii bi làá kpɔ̀-u nì kitàataajikee, see bí kpɔ̀ udaan nì kitàataajiki. An sá Unimbɔti yab ń dàkà bi-pɔ́ɔǹtam nì bi-fookiiu un bi cáá Unimbɔti puee ní.»

11 Boonee ní m ká upeel ubɔ mun púń ki nyáń kitiŋ ki cáá iyin ili an bí kii dipibil yiŋyee, ní ki sòoǹ kii kupeebiliŋŋuee. 12 Upeel upeepeekaayee nimbiin ní u ŋáań maamaacib nì mpɔn ŋun u fōō u-ceeyee, ní ki yàntī binib bin kɔkɔ bí kitiŋ puee jáaḿ upeel upeepeekaa un nìn fōō ŋkúm weeŋyi ki dāa pɔ́ɔkèe. 13 Upeel uliliitee nìn ŋáań maamaacikpaambi, ki yàntī ŋŋmi nyēeń yilpu ki lítí kitiŋ binib kɔkɔ nimbiin. 14 Mpɔn ŋun bi nìn tīī-u u cáa ŋáań maamaacib upeel upeepeekaa nimbiinee ní u nìn cáa kíiĺ binib ní ki páb́ binib bí náań upeel un bi nìn gāā kitàataajiki ki tīī tiweendi waa kpíìyee naŋku kí yóoń. 15 Ní u fōō mpɔn kí ŋmā kí tīī upeelee naŋku kun bi máńee kufoou, án nín làá ŋá pu kú ŋmā kí nīn sòoǹee, ní bin yaa kaa gbāaǹ ki jáam̀-kuee ú kpɔ̀ bidambee. 16 Mbiyaamueeee, bikpaambeeee, bigaajabeeee, bisoodambeeee, bin tɔ́ bi-beeyeeee, iyumbueeee, u cāntì bi nákáǹ bi-kɔkɔ ŋaŋgiilii nì bi-yigbeeŋi pu tidaandi. 17 Ubɔ kaa ŋūǹ kí dā tiba, kaa tí ŋūǹ kí nyāfì tiba, upeelee yindi nì u-yindi nambau yaa kaa náká udaan pu.

18 An sá mpɔ́ɔn ní, un cáá iciinee ń tùkù taapu. Kun puee tita nì ita nì biluuyee (666) dàkà unil ubɔ yindi ní.