Dileedakal 17

Ulaakpaakpaan tafadaaldi

1 Boonee ní ituun iluli in kpáatì diŋuul ki sītì duulinya puee ŋubɔ sútìń m-cee ní ki bí-mi yii: «Dāan̄ tí cù ḿ dàkà-si bi nín làá dáaĺ ulaakpaadaan un pée sá ukpaan ki kā ikpin puee tafal miŋyee. 2 Kitiŋ pu bɔtiibi dōoǹ nì u ní kitiŋ pu nib mɔ̄nnì-u ní u-laakpaati gbí-bi kii ndaamee^a.»

3 Ní Unimbɔti Fam dɔ́miń m-ni ní ntuun yōoǹ-mi ti búntì kuteeun, ní m tin ká unimpu ubɔ kā upeel pu. Upeelee sá uman, ní u-wunti kɔkɔ náká asiibil ki sìí Unimbɔti, ki cáá ayil aluli nì iyin saalaa. 4 Unimpu gbanti pēē dibɔkutinyaandi diba dì máǹ, ní u-falfatib nì u-bɔmbiliŋ nì u-beedimbiliŋ sá sindaariya nì ataŋkpee ŋin pɔ̄ɔ̄ kudaau ki jìl̀ee, ní ki ŋúb́ sindaariya sambiki ikpiti nì tilaakpaal tin u ŋáańee jɔkɔnti gbí poon. 5 Ní dimaamaaciyindi diba ŋmàn̄ ki náká u-yigbeel pu yii: «Babiloon kitiŋkpaaŋŋi, tilaakpaal dambi nì bitiŋwiiliibi na.» 6 Ní m ká yii unimpuee nyùn̄ Unimbɔti nib nì bin nóó Yeesu deedee bi kūū-bee fatikuu ki gbí.

M nín ká mimmee ní m bākatì sèeee. 7 Ní Unimbɔti tuuŋŋu bālifì-mi yii: «Ba ŋá ní a bākatì? M làá bìitī unimpuee nì upeel un pu u kā u cáá ayil aluli nì iyin saalaayee bɔɔŋŋi pu kí tùkù-si. 8 Upeel un a ká nee nìn bí dooooyee, ama kɔŋkɔnnee waa ti bí. U làá nyānní mbookpaan ŋun ni u nìn bée ní kí nīn cá laakin bi làá nàan̄-uee. An làá dāá ŋá bin doooo duulinya kíltam baa ŋmàn̄ bi-yiŋŋi dimaŋfal gbɔŋkunee maamaaci, bi yaa láa fātìi gíti ká upeel gbantee. Di sá upeelee nìn pée bí dooooyee ní ki dāa wáŋkì, ní ki dāa gíti fātìi nyánní.

9 «Tibɔti nee pu ní unil máaǹ kí dàkà u-landɔkɔŋu nì u-ciiŋŋu. Upeelee yiliŋ alulee di sá ajoon aluli ŋin pu unimpuee kēe, ní ki sá bibɔtiibi biluli mun. 10 Bibɔtiibi bilulee kansikin biŋmoo lítì, ubɔ kā dibeejal pu, ní un kíǹee kaa láá bāań, ama u mun yaa láa bāańee, waa làá dāá kàl̄ kí yúntí. 11 Upeel un nìn bí ní kaa ti bée u-ba kútì ki sá ubɔtininiiti, u mun sá bibɔtiibi bilulee kansikin ubɔ ní. Úǹ ní bi làá nàan̄.

12 «Iyin saalaa in a kée di sá bibɔtiibi saalaa^b bin kaa láá kāl̀ dibeel puee, ama bi làá tīī-bi mpɔn bi nì upeelee ń jī dibeel kukúluu kubɔ poon. 13 Bibɔtiibee kɔkɔ dāa pēē kinyɔkɔ ní kí dū bi-pɔŋyi kí kūtì upeelee. 14 Ní bí jáǹ Dipibil, ní Dipibil ń dāá pɔ̄ɔkiǹ-bi, u nì bin kɔkɔ sá u-yab u lútì-bi bi yú deedeeyee, kun puee úǹ di sá bidindambi kɔkɔ Dindaan, nì bibɔtiibi kɔkɔ Bɔtiu.»

15 Ní ntuunee gíti bí-mi yii: «Inyiŋfi in pu a ká kilaakpaayee kēe di sá atimbun nibiim nì isoon kamaa nib. 16 Iyin saalaa in a kée nì upeelee làá nīn ná kilaakpaayee ní. Bi làá dāá gbākal̀ tiwan tin kɔkɔ kā ki-wunti puee ní kí kíń dicancaŋgbeel, ní kí dāá ŋmɔ́ ki-nanti ní kí dū-kì kí wà ŋŋmi. 17 Di sá Unimbɔti di dū min u lèe ki ŋá bi-pɔbiliŋin bí ŋá ubaanti kí dū bi-pɔŋyi kí kūtì upeelee pu, kí nīn cí ŋyunti ŋun Unimbɔti làá dāá ŋá min u nìn lī yii u làá ŋée.

18 «Unimpu un a kée di sá kitiŋkpaaŋŋi kin tɔ́kɔ́ duulinya bɔtiibi puee.»