Dileedakal 16

Nsambiyaamu mun poon Unimbɔti ŋuul kēe

1 Ní m gbìl̄ nneen ŋubɔ nyánní kunimbɔtidiin ki sòoǹ mpɔn ki tùkù ituun ilulee yii: «Nín̄ cámaan kí kpáatí Unimbɔti ŋuul din kā nsambiyaamu mululinee kí sìtīmaan duulinyan.»

2 Ní ntuun mpeepeekaa kpáatì diŋuul din gbí ŋu-sambikinee ki sītì duulinyan, ní ibunsoon^a dɔ́miń ki jéetì bin kɔkɔ cáá upeelee daaŋku ki jáaḿ u-naŋkuee pu.

3 Ní ntuun nliliiti kpáatì diŋuul din gbí ŋu-sambikinee ki sītì tiŋkun, ní tiŋku nyim kpántì fatiku a lì kii unil un bi kūūyee fatikuuee, ní tin kɔkɔ bí tiŋkun ki cáá kufoouee kpíì.

4 Ní ntuun ntataati kpáatì diŋuul din gbí ŋu-sambikinee ki sītì amɔɔ nì ikpin poon, ní inyiŋfi kpántì fatiku^b. 5 Niinee m gbìl̄ ntuun ŋun yì inyiŋfi pɔŋŋuee bí yii: «A sá deedeedaan ní a nín ŋá min nee pu, sii un bí ki nìn pée bí dooooyee, a sá circirdaan ní. 6 Di sá bi nìn kūū a-nib nì a-bɔnaatiliibi bi-fatikuu nyáń ki fá, míǹ pu ní a yāntì inyiŋfi kpántì fatiku bí nyɔ̀, bi nín máaǹ puee ní a ŋá-bi nee!» 7 Ní m gbìl̄ nneen ŋubɔ nyánní nsaraafanni ki lī yii: «Tiŋman, ti-Dindaan Unimbɔti Mpɔŋkɔdaan, a nín sòon̄ binib bɔti miŋyee sá mbaamɔn ní ki sá deedee.»

8 Ní ntuun nnanaati kpáatì diŋuul din kā ŋu-sambikinee ki sītì ŋwìiń pu yii ŋwìiń ń píĺ binib tikpil. 9 Ní kutuntuŋu píĺ binib tikpil ní bi bí ki bíiĺ Unimbɔti un cáá mpɔn falaabi gbanti puee yindi, ki yíì kaa fá bi-kpitii kí tīī Unimbɔti tinyool.

10 Ní ntuun ŋŋmooŋmooti kpáatì diŋuul din gbí ŋu-sambikinee ki sītì upeelee beejal pu, ní u-beelin nib jéetì dibɔmbɔndin^c, ní tifaandi yāntì binib júntí bi-limbiliŋ, kun puee iween nìn gbìl̄-bi. 11 Bi-bunsooŋyi nì bi-falaau un bi bí ki jīǹee pu ní bi nìn bí ki bíiĺ Unimbɔti un yì yilpuee. Ama bi yíì, kaa fá bi-tuŋkpitiŋ.

12 Ní ntuun nluluuti kpáatì diŋuul din kā ŋu-sambikinee ki sītì Eefiraati mɔɔkpaandin, ní dimɔɔl fóotì ki kūń ní nsan dōoǹ ní ŋwìiń nyalaŋki pú bɔtiibi kíǹ ki dì^d. 13 Ní m ká arasiniibi bita, bi náań nì kpaadalib ki nyánní kupeebiliŋŋuee nì upeel un kíǹee nì u-bɔnaatiliu unyimɔndaan nyɔmmun. 14 Arasiniibi^e bitee ŋáań maamaacib, ní ki cūtì ki ká duulinya kɔkɔ bɔtiibi ki kpáfì-bi bí dāá já nì Unimbɔti Mpɔŋkɔdaan u-wiŋkpaaŋŋu dal.

15 «Ní pīlifì, m làá dāan̄ kii unaayuu yamee ní! Un kaa gèen̄ ki kā ki cí u-bɔkutil dɔ̄ ki kɔ́ĺ-uee bí mmɔnni. Udaan kaa dāa nyēē dicancaŋgbeel bí ká u-cooi.»

16 Ní arasiniibee kóoǹ bibɔtiibi ki cáa kpáfì laakin Eebru yab yíì yii Arimageedɔŋyee.

17 Ní ntuun nluluúti kpáatì diŋuul din kā ŋu-sambikinee ki yàl̄ kutaa pu, ní m gbìl̄ nneen ŋubɔ nyánní kunimbɔtidiin dibeejal cee ki sòon̄ mpɔn yii: «An ŋá ki dóò!» 18 Niinee an bíi ŋmóò nyàlnyal ki tátí kii utaayee, ní m gbìl̄ dibintiŋkpaandi pu ní kitiŋ cīŋkì ŋkpitim pu. Kí yòon̄ ŋwiin ŋun binib kíĺ ki kóò kitiŋ pu ki dāa sāā díǹ nee, kitiŋ kaa láá cīŋkì míǹ bi ká. 19 Ní kitiŋkpaaŋŋi lítì ki nābitì agin ata, ní atimbun tiŋkpaammu kɔkɔ wīil̀. Niinee Unimbɔti téetì Babiloon kitiŋkpaaŋŋi pu, ní ki dū u-ŋuul din pɔ̄ɔ̄ kpaŋkpamee ki nyūntì-kì kii ndaamee^f. 20 Ní ntimu mun bí amɔɔ kansikinee nì ajoon wáŋkì. 21 Ní ataanyiŋkumbil^g ŋin nyìm̀ kii kiiloobi imuŋku ilee lítí ki tàbitī binib, ní binib bí ki sìí Unimbɔti ditafadaaldi gbanti pu, kun puee ditafadaaldee nìn pɔ̄ɔ̄ ki lákatì.