Yesus dinganaꞌk
2
1 Angin lama udah Yohanes dinganaꞌk, pamempen pamrintah Roma, ia na Kaisar Agustus, mere printah ka urak nang ia nguasa, nyuruh ndaptar diri. 2 Baro ntu nyan pandata dimuat. Waktu na Kerenius njaji gubunur ka banua Siria. 3 Lalu smua urak kajah ampus ndaptar diri ka kampong ape puyak ia.4 Bage sana uga duan Yusup. Taꞌk kota Nasaret daerah Galelea, ampus ka kota Betlehem daerah Yudea, tampat Raja Daut dinganaꞌk, krana ia uga katoron Daut. 5 Yusup ndaptar diri ia duan tunang ia Maria, nang tangah buntik aya.
6 Waktu umpu-ia datak ka Betlehem, waktu na uga Maria namu nyarang parut. 7 Lalu ia branaꞌk, nganaꞌk anaꞌk ia nang tua, anaꞌk na laki. Maria mbadong mmuda na duan lampin, lalu nggurik Ia ka tampat domba-domba majuh, krana angin si rumah ontoꞌk umpu-ia bamalam.
Rombong tukang nunggu domba
8 Malam nsana, ka daerah na, ada rombong tukang nunggu domba nang diap ka padang rumput tangah nunggu domba-domba ia. 9 Tampe-tampe ada malekat badiri samaꞌk umpu-ia duan sinar Tuhan nang mbada tampaꞌk nyilo umpu-ia, waktu na uga umpu-ia mbada gali. 10 Lalu malekat na bakata ka umpu-ia, “Usah gali, krana aku daꞌk madah ka ngkanaꞌk kabar nang mbada baiꞌk, ontoꞌk taleno biabis: 11 Ari ntu ka kota Daut udah dinganaꞌk ontoꞌk ngkanaꞌk Raja nang Tukang nylamat, Ia na Kristus, Ia na uga Tuhan. 12 Ntu tande ia ontoꞌk ngkanaꞌk: Ngkanaꞌk daꞌk batamu duan mmuda nang dimbadong duan lampin, nang dinggurik ka dalap tampat domba-domba majuh.”
13 Udah nsana, kluar rombong malekat nang lain taꞌk sruga muji Allah, kata umpu-ia,
14 “Pujilah Allah ka sruga, tampat nang Mbada tingi!
Ka dalap dunia ngia urak nang Ia milih namu idup nang tanang.”
15 Udah na malekat napuꞌk rombong tukang nunggu domba na tadi, lalu baleꞌk ka sruga. Lalu rombong tukang nunggu domba na tadi bakata ka page nang lain, “Jon diri ampus ka Betlehem, nele ape nang dah tajadi taꞌk ngan, bage nang dimadah ulih Tuhan tadi.”
16 Lalu umpu-ia capat-capat ngaga Maria wan Yusup uga anaꞌk ia nang dinggurik ka tampat domba-domba majuh na tadi.
17 Waktu umpu-ia nele Mmuda na, umpu-ia langsong ngesah ape nang dimadah ulih malekat tantang mmuda na tadi ka urak nang ada ka sana. 18 Urak nang ada ka sana kajah eran nangar ape nang rombong tukang nunggu domba na ngesah. 19 Tape Maria angin banyaꞌk omong, cukup ia naroh smua kajadi na ka dalap ati ia surak. 20 Udah na rombong tukang nunggu domba na tadi pulak, sambel muji basambah ka Allah, krana ape nang udah umpu-ia nangar wan nele pas biabis bage nang dimadah ulih malekat na ka umpu-ia.
Yesus dimbalak duan dinyarah ka Tuhan - Semeon duan Hana
21 Waktu mmuda na ganap lapan ari, Ia dimbalak lalu dimere dama Yesus. Dama Ia sasuai nang dimadah ulih malekat waktu giangin dimuntik ulih indo Ia.
22 Kira-kira sabulat udah na, sasuai duan plator agama Yahudi, Maria duan Yusup arus nyuci diria ia. Umpu-ia uga maba Yesus ka Yerusalem ontoꞌk disarah ka Tuhan. 23 Bage nang dinulis ka dalap plator Tuhan, “Anaꞌk tua nang laki arus disarah ka Tuhan.” 24 Umpu-ia uga nyarah pamere nang dah dinyiap nnurut ape nang dimadah ka plator Tuhan, ia na sapasang buruk ngkokor atau dua iko anaꞌk buruk acang.
25 Ada ka Yerusalem urak nang badama Semeon. Ia urak nang banar, taat ka Tuhan. Ia nunggu Raja nang daꞌk nylamat urak Israel. Roh Tuhan ada ka ia, 26 uga udah dimadah ulih Roh Tuhan, ia angin daꞌk mati kaloꞌk ia giangin nele Raja Tukang nylamat urak Israel nang dinjanyi ulih Tuhan. 27 Lalu Roh Tuhan maba Semeon datak ka rumah Allah.b Udah nsana, Yesus dimaba tama ulih indo-ama Ia supaya disarah ka Tuhan nnurut plator agama Yahudi. 28 Waktu na uga Semeon nyamun mmuda na, lalu ngangkat ia sambel muji Allah, kata ia,
29 “Waktu ntu Tuhan, Maꞌksana udah napat janyi,
waktu ntu uga, aku siap ngabis nyawa duan tanang, sasuai kata Maꞌksana,
30 krana mata aku udah nele
Raja nang Tukang nylamat, nang taꞌk Maꞌksana,
31 nang udah Maꞌksana mere ontoꞌk bangsa-bangsa lain,
slain urak Israel.
32 Mmuda ntu bage sinar nang dimere Tuhan ka bangsa-bangsa
supaya umpu-ia datak ka Maꞌksana. Uga daꞌk maba dama baiꞌk ontoꞌk urak Israel.”
33 Ama duan indo Ia mbada eran nangar ape nang dimadah ulih Semeon tantang mmuda na. 34 Lalu Semeon mere tuah ka umpu-ia, lalu bakata ka Maria indo Ia, “Mmuda ntu udah dimilih ulih Allah. Supaya ulih krana Ia banyaꞌk urak Israel kana ukum, tape banyaꞌk uga urak nang dinylamat. Ia uga njaji tande taꞌk Allah nang daꞌk dilawan ulih urak banyaꞌk, 35 supaya ape nang ada ka dalap ati urak banyaꞌk banar-banar tatele. Uga, kau Maria, ada waktu ia nana, ati kau tarasa sakit bage kana tusuꞌk ulih iso punti.”
36 Ka rumah Allah na ada urak nang badama Hana, nabi mbini nang udah tua. Ia na anaꞌk Panuel taꞌk suku Aser. Udah kawen, ia idup tujuh taut duan laki ia. 37 Kinintu ia janda, omor ia lapan puluh ampat taut. Ia ngkala napuꞌk rumah Allah, siak malam ia sambayang ka Allah duan cara badoa wan bapuasa. 38 Waktu Hana nyamaꞌk Yusup duan Maria, ia langsong muji Allah. Lalu ia madah tantang Mmuda na ka urak-urak nang nunggu waktu Tuhan daꞌk mbebas Yerusalem.c
39 Udah Yusup duan Maria nyuci diri ia, uga nyarah Yesus ka Tuhan sasuai duan plator Tuhan, pulaklah umpu-ia ka Nasaret nang ada ka Galelea. 40 Mmuda na mukin aya, koat, Ia mmuda nang pande, uga Ia dinyayang ulih Allah.
Yesus baomor dua balas taut ada ka dalap Rumah Allah
41 Tiap taut indo-ama Yesus ampus ka Yerusalem ontoꞌk ngraya ari Paska.d 42 Waktu Yesus baomor dua balas taut, umpu-ia uga ampus ka Yerusalem, bage nang biase umpu-ia muat. 43 Udah ari raya na umpu-ia pulak, tape Yesus tapuꞌk ka Yerusalem. Indo-ama Ia angin nao. 44 Krana umpu-ia nyangka, Ia ada ka ntara urak nang barayuk duan umpu-ia. Udah sari marik umpu-ia bajalat, baro tringan ka Yesus. Lalu umpu-ia ngago Yesus ka ntara ayuk boroh uga ka ntara page-page ia nang barayuk duan umpu-ia na tadi. 45 Tape umpu-ia angin namu Yesus, lalu umpu-ia baleꞌk ka Yerusalem ngago Ia. 46 Slama tege ari umpu-ia bagago, lalu umpu-ia namu Yesus ka dalap Rumah Allah. Ia duduꞌk ka tangah-tangah guru-guru agama Yahudi sambel nangar umpu-ia, Ia uga malar batanya ka umpu-ia. 47 Urak nang ada ka sana kajah eran, krana ape nang Ia madah mbada pas. 48 Indo-ama ia uga eran nele Ia, lalu indo Ia bakata, “Nong, ngape Kau babuat bage sana duan ntua? Indo wan ama mbada kuater ngago Kau.”
49 Yesus nyaut, “Ngape indo wan ama ngago Aku? Anginkah indo wan ama nao kaloꞌk Aku arus ada ka Rumah Ama Aku?” 50 Tape umpu-ia angin ngrati ape nang Yesus madah.
51 Lalu Yesus barayuk duan umpu-ia, pulak ka Nasaret. Ia nnurut ka indo-ama Ia. Lalu indo Ia naroh smua kajadi na ka dalap ati ia. 52 Yesus mukin aya, pande, Ia dinyayang ulih Allah uga ulih urak banyaꞌk.