Umpama akim nang angin adel
18
1 Udah na Yesus madah ka murit-murit Ia umpama ontoꞌk nakan pangajar Ia tantang badoa, supaya umpu-ia usah jara-jara badoa. 2 Kata Ia, “Ka dalap sabuah kota ada siko akim nang angin ngromat Allah wan angin nduli urak lain. 3 Ka kota na uga ada mbini janda nang malar datak ka akim na lalu bakata, ‘Tolong mbela aku taꞌk urak nang angin adel ka aku.’ 4 Tape akim na malar inga nolong mbini nang janda na. Udah lama tajadi bage sana, akim na bapikir dalap ati ia, ‘Biar gaꞌk aku angin ngromat Allah wan angin nduli urak lain, 5 tape krana janda ntu malar datak, labih baiꞌk aku mutus pakara ia duan adel, supaya ia angin nyusah aku agi.’ ”6 Lalu Tuhan madah, “Coba prati ape nang dimadah ulih akim nang angin adel na! 7 Kaloꞌk akim nang angin adel na ja mao nolong, ape agi duan Allah! Ia pasti mbela urak nang Ia milih nang minta ka Ia siak wan malam. Allah uga pasti langsong nolong umpu-ia. 8 Aku madah ka ngkanaꞌk: Allah pasti daꞌk mbela umpu-ia. Tape, kaloꞌk Aku Anaꞌk Taleno datak nana, apekah Aku daꞌk namu urak nang ada ka dunia ngia tatap pacaya ka Aku?”
Umpama urak Parisi duan tukang nagih pajak
9 Yesus madah umpama ka urak nang nganggap diri ia banar wan suka ngrandah urak lain, bage pitu, 10 “Ada dua urak nang ampus ka Rumah Allah ontoꞌk badoa, nang siko urak Parisi, siko agi tukang nagih pajak. 11 Urak Parisi na badiri lalu badoa dalap ati ia, ‘O, Allah, aku basokor ka Maꞌksana, krana aku angin bage urak lain, aku bukat prampok bukat uga urak jaat, aku bukat urak nang suka bajinah, aku uga bukat bage tukang nagih pajak ngia. 12 Aku bapuasa dua kali saminggu, aku uga mere papuluh taꞌk pangasel aku biabis.’ 13 Tape tukang nagih pajak ngan badiri jauh-jauh, malah ia angin brani ngkadah ka langin, ia murus dada tande ia nyasal taꞌk dosa-dosa ia sambel bakata, ‘O, Allah, kasihlah ka aku urak nang badosa ntu.’
14 Aku madah ka kau: Waktu urak ntu pulak ka rumah, ia dah dingampon ulih Allah, tape urak Parisi na angin. Krana sape nang nyombong diri ia, ia daꞌk dinjatoꞌk, tape sape nang ngrandah diri ia, maka nsana ia daꞌk dingangkat.”
Yesus mere tuah ka mmuda Amuꞌk
15 Lalu urak-urak kajah maba anaꞌk ia nang amuꞌk ngaga Yesus supaya Ia napo langan ka ulu anaꞌk-anaꞌk umpu-ia ontoꞌk mere tuah. Nele bage sana murit-murit Yesus bila ka urak-urak nang maba anaꞌk ia ntadi. 16 Tape Yesus nyaru mmuda-mmuda na lalu bakata ka murit-murit Ia, “Biar ja mmuda-mmuda ngia datak ngaga Aku, usah ngkanaꞌk ngalang ia, krana urak-urak nang babuat bage mmuda-mmuda ntadi, ia nalah nang ngumpu Krajaan Allah.
17 Aku madah ka ngkanaꞌk: Sape nang angin nrima printah Allah bage mmuda amuꞌk ngia, ia angin daꞌk tama ka dalap Krajaan Allah.”
Urak kaya susah tama ka dalap Krajaan Allah
18 Ada siko pamempen Yahudi batanya ka Yesus, “Guru nang baiꞌk, ape nang arus aku muat supaya aku bisa namu idup nang kakal?”
19 Yesus nyaut, “Ngape kau madah Aku baiꞌk? Angin mang siko urak nang baiꞌk cuali Allah. 20 Kau udah nao ape nang Allah mrintah: Usah bajinah, usah munuh, usah malik, usah suka ngomong boong tantang urak lain, uga kau arus ngromat indo wan ama kau.”
21 Pamempen Yahudi ntadi nyaut, “Taꞌk muda ndulu, printah na udah ku nnurut biabis.”
22 Nangar ape nang urak na madah, Yesus bakata, “Masih ada sote agi nang arus kau muat, jual biabis ape nang ada ka kau lalu dibagi ka urak-urak kodo, jaji kau daꞌk namu rata ka sruga. Udah na datak kitu lalu tuna Aku.” 23 Waktu urak na nangar Yesus bakata bage sana, ati ia mbada sabal, krana ia mbada kaya.
24 Lalu Yesus nele urak na sambel bakata, “Memang mbada susah urak-urak nang kaya tama ka dalap Krajaan Allah. 25 Krana labih gampang siko unta tama namu lubak jarup ketimbang urak kaya tama ka dalap Krajaan Allah.”
26 Umpu-ia nang nangar kata Yesus na bakata, “Sigaꞌk bage sana, sape nang bisa dinylamat?”
27 Yesus nyaut, “Ape nang taleno angin bisa muat, Allah pasti bisa muat ia.”
Upah nuna Yesus
28 Lalu Petrus bakata, “Uraꞌkitu udah napuꞌk ape nang ada ka uraꞌkitu ontoꞌk nuna Maꞌksana.”
29 Yesus bakata banar-banar ka umpu-ia, “Sape nang napuꞌk rumah ia, bini ia, biliꞌk ia, indo-ama ia, uga anaꞌk-anaꞌk ia krana mlayan Allah, 30 maka nsana waktu ia masih idup ka dunia, ia daꞌk nrima agi balipat-ipat ape nang dah ia napuꞌk, malah dudi nana ia daꞌk namu idup nang kakal.”
Yesus madah nang katege kali kaloꞌk Ia daꞌk sangsara
31 Yesus nyaru dua balas murit Ia inyan ontoꞌk bakumpur duan Ia, lalu madah ka umpu-ia, “Waktu ntu diri ampus ka Yerusalem, knaan nana ape nang dinulis ulih nabi-nabi tantang Aku Anaꞌk Taleno, daꞌk tajadi. 32 Aku daꞌk dinyarah ka bangsa-bangsa nang angin nganal Allah. Aku daꞌk kana olo, Aku daꞌk kana hina, Aku uga daꞌk kana lujah. 33 Umpu-ia daꞌk nyiksa lalu munuh Aku, tape ari nang katege Aku daꞌk idup agi.”
34 Tape murit-murit Yesus angin ngrati ape nang Ia madah; rati kata na banar-banar angin ditao ulih umpu-ia, uga umpu-ia angin nao ngape Yesus madah bage sana.
Yesus nyambuh urak buta samaꞌk kota Yeriko
35 Waktu Yesus ampir cacah ka kota Yeriko, ada urak buta duduꞌk ka pengger jalat sambel minta-minta. 36 Waktu ia nangar urak banyaꞌk lalu taꞌk sana, ia batanya, “Ada ape doꞌk?”
37 Urak banyaꞌk na bakata ka ia, “Yesus urak Nasaret namu jalat ntu.”
38 Lalu urak buta na mpue Ia, “Yesus, Anaꞌk Daut,a kasihlah ka aku!”
39 Lalu urak banyaꞌk nang bajalat ka adap Yesus mbila ia, nyuruh ia ngadam. Tape mukin nyarek ia mpue Yesus, “Anaꞌk Daut, kasihlah ka aku!”
40 Yesus branti ka sana, lalu Ia nyuruh urak nang ada ka sana ngirit urak buta na ka adap Ia. Waktu ia dah ka sisi Yesus, Yesus batanya, 41 “Ape nang kau mao taꞌk Aku supaya Aku bisa muat ia ontoꞌk kau?”
Urak buta na nyaut, “Tuhan, aku mao supaya aku bisa nele!”
42 Lalu Yesus bakata ka ia, “Ncalaꞌklah, krana kau pacaya ka Aku, kau sambuh!”
43 Waktu na uga ia langsong bisa nele, lalu ia nuna Yesus sambel muji Allah. Urak-urak nang nele kajadi na kajah muji-muji Allah biabis.